Нэгыежъ Iуашъхьэ ичапэ дэжь шъолъырыкIэу «Мэздахэр» зыщызэтырагъэпсыхьэрэ чIыпIэм IофшIэнэу щагъэцакIэхэрэм АР-м и ЛIышъхьэу КъумпIыл Мурат защигъэгъозагъ.

Нафэу зэрэщытымкIэ, унагъохэм зыщагъэпсэфынымкIэ, пкъышъолыр щыгъэ­пытэгъэнымкIэ амал дэгъухэр а чIыпIэм къытыщтых. РеспубликэмкIэ анахь мэхьанэ зиIэ проектхэм ар ащыщ, Iэрыфэгъу къэлэ щыIакIэм игъэпсынкIэ Урысые зэнэкъокъоу зэхащэгъагъэм анахь проект дэгъоу къыщыхагъэщыгъэхэм ар ахэ­хьагъ. Проектым изэшIохын иапэрэ чэзыу сомэ миллион 200 пэIуагъэхьащт, ащ щыщэу сомэ миллиони 106-р федеральнэ мылъкоу грантым къыкIэкIуагъ.
«ДОМ.РФ» зыфиIорэм зэдэлэжьэныгъэу дыряIэщтым епхыгъэ зэзэгъыныгъэ­хэм адиштэу дизайн-проектыр зэхагъэуцогъагъ. Мы лъэхъаным проектыр щы­Iэныгъэм щыпхырыщыгъэным фежьагъэх. 2024-рэ илъэсым ыкIэм нэс апэрэ чэзыур аухын мурад яI. Республикэм и ЛIышъхьэ гъэпсэфыпIэ шъолъырэу зэтырагъэпсыхьащтымкIэ IофшIэнэу къапыщылъхэм, гухэлъэу ашIыгъэхэр зэрэпхыращыщтхэм ащигъэгъозагъэх.
ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м псэолъэшIынымкIэ, унэ-коммунальнэ ыкIи гъогу хъызмэтымкIэ иминистрэ игуадзэу Лафышъэ Рэ­мэзан, АР-м архитектурэмрэ къэлэгъэпсыным­рэкIэ и Комитет итхьаматэу Зезэрэхьэ Азэмат, къалэу Мыекъуапэ имэрэу Геннадий Митрофановыр, архитектурэмрэ къэлэгъэпсынымрэкIэ ГъэIорышIапIэм ипащэ ипшъэрылъхэр зыгъэцэкIэрэ Ацумыжъ Мэдинэ, подряднэ организацием ипащэхэр.
КъызэрэхагъэщыгъэмкIэ, пстэумкIи «Мэздахэм» гектар 435-рэ фэдиз зэлъе­убыты. Ащ щыщэу мы илъэсым зэтырагъэпсыхьащтыр гектари 7,7-рэ. Апэрэ чэзыум дэкIояпIэм ылъэныкъокIэ псэолъакIэхэр ашIыщтых.

АР-м и ЛIышъхьэ чIыпIэр къыплъыхьэ зэхъум пшъэрылъ афишIыгъ зызщагъэ­псэфыщтыр аукъэбзынэу, Iуашъхьэм ылъапэкIи, дэкIояпIэм ылъэныкъокIи чIыпIэм итеплъэ нахь агъэдэхэнэу. ДэкIояпIэр метрэ 45-рэ фэдиз мэхъу, Мыекъуа­пэ ичIыпIэ анахь дахэхэм ар зыкIэ ащыщ. Я 70-рэ илъэсхэм ыкIэхэм адэжь ар ашIыгъагъ, нэужым 2018-рэ илъэсым зэтырагъэпсыхьэгъагъ. Нэгыежъ Iуашъхьэ ышыгу укъызеплъыхыкIэ, къалэу Мыекъуа­пэ итеплъэ дахэ нэм къыкIедзэ. Мы илъэсым дэкIояпIэм дэжь Iуашъхьэр нахь зэтырагъэпсыхьащт. А чIыпIэм щагъэуцущтых къэбархэм уащызгъэгъозэщт стендхэр, хъаринэхэр, тетIысхьапIэхэр. Ащ нэмыкIэу кушъхьэфачъэхэмкIэ къызщачъыхьащтхэу автомобиль гъогухэм якIолIэщтхэр агъэпсыщтых. Къушъхьэ­хэмрэ псэупIэу Краснооктябрьскэмрэ дэгъоу нэплъэгъум къызщиубытыщт хэIэтыкIыгъэ чIыпIэхэу зызщаплъыхьан алъэкIыщтхэр агъэпсыщтых, спортым зыщыпылъыщтхэ, зызщагъэпсэфыщт чIыпIэхэр, кIэпсэ пышIагъэхэр ашIыщтых, кафе ыкIи зыщышхэщтхэ нэмыкI псэолъэ цIыкIухэм яшIынкIи амалэу щыIэхэм ахэплъэх.

Адыгеим и ЛIышъхьэ пшъэрылъ къафишIыгъ инженер коммуникациехэм, чIыпIэр къэзгъэнэфыщтхэм, видеолъып­лъэным иамалхэм тэрэзэу ягупшысэнхэу. Мыщ дэжьым тыкъэзыуцухьэрэ дунаим тынаIэ тедгъэтын зэрэфаер ащ къыхигъэ­щыгъ. КъумпIыл Мурат пшъэрылъ къыгъэ­уцугъ мэзым амал зэриIэкIэ зэрар рамыхыным пае хэкIыпIэхэр къагъотынхэу, экологием ылъэныкъокIэ материал къабзэхэр агъэфедэнхэу. ЗэкIэ чIыпIэм ща­гъэпсыщтыр тыкъэзыуцухьэрэ дунаим ди­штэу ашIыным анаIэ ащ тыраригъэ­дзагъ.
«ЦIыфхэм загъэпсэфынымкIи, апкъы­шъол апсыхьанымкIи амал дэгъухэр тичIыопс къетых. Мэз­дахэм къикIырэр «мэз дах». Iофэу зэшIотхыщтхэм япхыгъэ Iоф­тхьабзэхэми а мэхьанэр апхырыщыгъэн фае. ЦIыфхэмкIэ Iэрыфэгъоу, дахэу, ищыкIэгъэ лъэныкъохэр зэкIэ къыдэлъы­тагъэхэу IофшIэнхэр зэшIохыгъэ хъунхэм мэхьанэшхо иI. ЧIы­опсым гур къыIэтэу, зекIоным епхыгъэ фэIо-фашIэхэр дэгъоу зэшIохыгъэхэу хъунхэ фае. ЗекIо къэкIощтхэми тичIыопс дахэ фэгъэхьыгъэ къэ­бар икъу алъыгъэIэсыгъэн фае. Тарихъ мэхьанэ зиIэ чIыопс чIыпIэхэм зэрар тафэмыхъоу джырэ уахътэм диштэрэ шIыкIэ-амалхэм та­къыпкъырыкIызэ, итхъухьэгъэ Iофтхьабзэхэр зэшIотхынхэм мэхьэнэ гъэнэфагъэ иI. Мые­къуапэ дэсхэм ямызакъоу, рес­публикэм къэкIорэ хьакIэхэми дэгъоу загъэпсэфыным пае ящыкIэгъэ амалхэр зэкIэ ядгъэгъотынхэ фае», — къыIуагъ КъумпIыл Мурат.
ЧIыпIэм рахъухьэгъэ IофшIэнхэр зэкIэ зыщаухыхэкIэ, лъэсрыкIо гъогоу къэлэ паркымрэ зыгъэпсэфыпIэ чIыпIэу «Мэз­дахэмрэ» зэзыпхыщтхэр хьазыр хъущт.
АР-м и ЛIышъхьэ ипресс-къулыкъу