Мыекъуапэ щыщ хъулъфыгъэу дзэм фэ­гъэхьыгъэ къэбархэр хэушъхьафыкIыгъэ нэмыц къулыкъум IэкIэзыгъахьэ зышIо­игъуагъэм хьапс тыралъхьагъ.

Мы хъулъфыгъэм Мыекъопэ гарнизоным идзэ частьхэм ащыщым Iашэу, техникэу иIэхэм сурэтхэр атырихыщтыгъэу, дзэ къулыкъушIэхэм, хэушъхьафыкIыгъэ дзэ операцием хэлэжьэнэу кIохэрэм япчъагъэ зэрэхъурэр къылъытэщтыгъэу агъэунэфыгъ. Зигугъу къэтшIыгъэ къэбархэр Германием разведкэмкIэ икъулыкъу иIофышIэхэм аIэкIигъахьэхэ, Урысые Федерацием ищынэгъончъагъэ зэщыгъэкъогъэнымкIэ къызфигъэфедэхэ ащ шIоигъуагъ.
Ыугъоигъэ къэбархэр Германием изыщынэу фежьэгъэгъэ бзэджашIэр Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ 2023-рэ илъэсым имэзае къалэу Шъачэ къыщиубытыгъ. Ащ мобильнэ телефонрэ сурэтхэр зэрэтырахырэ пкъыгъорэ къыкъуагъотагъэх.
Следствием нафэ къызэришIыгъэмкIэ, бзэджашIэу къычIэкIыгъэр Мыекъуапэ щыщ, зыныбжь имыкъугъэ Лик Кевин ары. Урысыемрэ Германиемрэ ягражданин къэбарэу ыугъоигъэхэр заIэкIигъахьэкIэ, Германием иеджапIэ горэм чIэхьанымкIэ, разведкэ зышIырэ нэмыц къулыкъум аштэнымкIэ фэгъэкIотэныгъэхэр къыфашIынхэм щыгугъыщтыгъ.
ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ къыугъоигъэ материалхэр IэубытыпIэ къызыфишIыхэзэ, Адыгэ Республикэм и Апшъэрэ хьыкум ылъытагъ хъулъфыгъэм къумалыгъэ зэрихьагъэкIэ (Урысыем и Уголовнэ кодекс ия 275-рэ статья) ыкIи илъэси 4 хьапс тырилъхьагъ.
Общэ юрисдикциемкIэ ящэнэрэ апелляционнэ хьыкумым уголовнэ IофымкIэ унашъоу аштагъэм къыдыригъэштагъ. Кевин Лик имысагъэ еуцолIэжьыгъ, зэрэкIэгъожьырэри къыIуагъ. Ащ ыныбжь зэримыкъугъэр, характеристикэ дэгъу къызэрэратыгъэр, ипсауныгъэ изытет хьыкумым къыдилъытагъэх.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу