Ныдэлъфыбзэр языгъашIэхэрэм язэнэкъокъу
НыдэлъфыбзэмкIэ кIэлэегъэджэ ыкIи кIэлэпIу анахь дэгъухэм ягъэунэфын фэгъэхьыгъэ зэнэкъокъу мы мафэхэм Мыекъуапэ щэкIо. Муниципальнэ уцугъом текIоныгъэ къыщыдэзыхыгъэ кIэлэегъэджи 7-рэ кIэлэпIуи 6-рэ ащ хэлажьэх. АР-м гъэсэныгъэмрэ шIэныгъэмрэкIэ и Министерствэ Iофтхьабзэм кIэщакIо фэхъугъ.
Тыгъуасэ зэнэкъокъум иятIонэрэ уцугъо рагъэжьагъ. Анахь дэгъоу зыкъэзыгъэлъэгъогъэ кIэлэегъаджэхэм къатыгъэ «Класснэ сыхьатэу» Адыгэ республикэ гимназием щыкIуагъэм тыщыIагъ.
Адыгэкъалэ дэт гурыт еджапIэу N 3-м пэублэ классхэмкIэ икIэлэегъаджэу ХъокIо Муслъимэт 2024-р унагъом и Илъэсэу зэрагъэнэфагъэр къыдилъытэзэ «Унагъор — лъэпкъым ылъапс» зыфиIорэм къытегущыIагъ. ГущыIэжъхэмкIэ класснэ сыхьатыр ригъэжьагъ, ащ мэхьанэу иIэр кIэлэеджакIохэм къаригъэIуагъ, адыгэ шэн-хэбзэ зэфэшъхьафхэр щысэу къыхьыгъэх.
— Адыгабзэм икъызэтегъэнэнкIэ мыщ фэдэ зэнэкъокъухэм мэхьанэшхо яI. Сабыеу зиныдэлъфыбзэкIэ къэгущыIэхэрэр нахь макIэ мэхъу зэпыт. Унагъор ары бзэр къызыщежьэрэр. Илъэс 32-рэ хъугъэ Iоф зысшIэрэр, сыкъыхиубытагъ урокхэр зэкIэ адыгабзэкIэ зыщядгъэхьыщтыгъэ лъэхъанми, джы зы сыхьатэ кIэлэеджакIохэм Iоф адапшIэкIэ жэбзэ дахэ аIулъыщтэп. Зэнэкъокъум иятIонэрэ уцугъо сызэрэхэлажьэрэр сигуапэ, хэушъхьафыкIыгъэу зыфэзгъэхьазырынэу игъо сифагъэп, сэ Iоф зэрэсшIэрэ лъэныкъохэр ары къэзгъэлъэгъуагъэхэр, — къытиIуагъ Муслъимэт.
НыдэлъфыбзэмкIэ Iоф зышIэрэ кIэлэегъэджэ дэгъуищмэ ахэхьагъэх Кощхьэблэ районым къикIыгъэ Къэщый Жаннэрэ Мыекъопэ районым илIыкIоу Наталья Митинамрэ.
КIэлэпIу анахь дэгъуищэу къыхахыгъэх Адыгэкъалэ къикIыгъэ Хьакъуй Фатимэ, Мыекъуапэ икIэлэцIыкIу IыгъыпIэу N 33-м щылэжьэрэ ЛъэпцIэрыкъо Заирэ ыкIи Кощхьэблэ районым щыщ Айтэчыкъо Заремэ.
— КIэлэегъаджэхэм джыри зы заочнэ уцугъо яIэщт, яIофшIэн зэрэзэхащэрэр видео техыгъэмкIэ къагъэлъэгъощт. Зэнэкъокъум хэлажьэхэрэм шIэныгъэ куухэр зэряIэхэр, яныдэлъфыбзэ шIу зэралъэгъурэр ыкIи кIэлэцIыкIухэм дэгъоу зэрарагъашIэрэр къагъэлъэгъуагъ. Егъэджэн сыхьатхэр зыщызэхэтщэгъэ Адыгэ республикэ гимназием, кIэлэцIыкIу IыгъыпIэу N 28-м ачIэс кIэлэцIыкIухэм алъэгъурэр зэрашIогъэшIэгъоныр, бзэр зэраIулъыр тигуапэ хъугъэ. Анахь дэгъоу зыкъэзыгъэлъэгъуагъэхэм ахъщэ шIухьафтынэу сомэ мин 50,30 ыкIи 20 зырыз афэдгъэшъошэщт. Ащ нэмыкIэу апэрэ чIыпIэр къэзыхьыгъэ кIэлэегъаджэмрэ кIэлэпIумрэ Урысые уцугъэу Казань щыкIощтым хэлэжьэщтых, — къыIуагъ АР-м гъэсэныгъэмрэ шIэныгъэмрэкIэ и Министерствэ иIофышIэу, осэшIхэм ахэтэу Мамый Марыет.
ДЕЛЭКЪО Анет.
Сурэтхэр авторым тырихыгъэх.