Къэбзэныгъэм имазэ республикэм щылъэ­кIуатэ. ХъызмэтшIапIэхэр, чIыпIэ зыгъэIорышIэжьыпIэхэм, къэлэ, район администрациехэм яIофышIэхэр ыкIи цIыф къызэрыкIохэр къэбзэныгъэм ишIыхьафхэм ахэлажьэх. Iофтхьабзэр джыри ыкIэм фэмы­кIуагъэми, шIуагъэу къыхьырэр къэлъэ­гъуагъ: тыдэкIи чъыгхэр аупкIыхьагъэх, алъап­сэхэр пагъэлыкIыгъэх, общественнэ чIыпIэхэр агъэ­къэбзагъэх. Ежь цIыфхэми ящагухэм, къапэIулъ чIыпIэхэм Iоф ащашIэ.

Къэбзэныгъэм имазэ къыдыхэлъытагъэу республикэм щызэшlуахырэм яз хэбзэнчъэ хэкlитэкъупlэхэм ящыгъэзыен. Гукъау нахь мышIэми амыгъэнэфэгъэ чlыпlэхэм цlыфхэм бэрэ пыдзафэхэр ащыратэкъух. Мыекъуапэ щызэхащэгъэ къэлэ шlыхьафхэм хэкl кубометри 170-рэ къащаугъоигъ, гектар 14-мэ уцыр ащаупкlагъ. Ащ дакlоу республикэм икъэлэ шъхьаIэ ипащэу Геннадий Митрофановым иунашъокlэ хэбзэнчъэ хэкlитэкъупlэм Iулъыр Iуащыгъ. lофшlэным техникэ 16 хэлэжьагъ. Къэлэ администрацием псэупlэ-коммунальнэ хъызмэтымкlэ игъэlорышlапlэ къызэритырэмкlэ, ар мы илъэсымкlэ агъэкlодыгъэ ящэнэрэ хэбзэнчъэ хэкlитэкъупl. 2023-м ащ фэдэу 29-рэ агъэкъэбзэгъагъ, пыдзэфэ кубометрэ 1358-рэ къалэм дащыгъ.
Республикэмкlэ хэкlым иlущын фэгъэзэгъэ «ЭкоЦентрэм» ишъолъыр оператор ипресс-къулыкъу тызэрэ­щигъэгъозагъэмкlэ, хэбзэнчъэ хэкlитэкъупlэхэр кlэух зыфэмыхъурэ гумэкlыгъу. Ахэм ягъэкlодынкlэ lофшlэныр зэпыурэп.
— ХэкIитэкъупIэ ашlыгъэ чIыпIэхэм ягъэкъэбзэнкlэ lофшlэнхэр гъэтхапэм редгъэкlокlыгъэх. Пстэумкlи пыдзэфэ кубометри 150-рэ дэтщыгъ. Ахэм хэкl лъэпкъ зэфэшъхьафхэр ащызэхэлъыгъ — псэолъэшlыным къе­лыгъэхэр, чъыг къутамэхэр, унэгъо хъызмэтым щыщ пкъыгъохэр. Гукъау нахь мышlэми, ащ къыгъэлъагъорэр зы — цlыфхэм ежь ашъхьэ агъэгупсэфымэ адырэ пстэумэ зэрамыгъапэхэрэр ары. Чlыопсым изытети ыгъэгумэкlыхэрэп, — тыщигъэгъозагъ шъолъыр операторым ипресс-къулыкъу.
Джащ фэдэу гумэкlыгъуабэ къапэкlы «ЭкоЦентрэм» зэзэгъыныгъэ дэзымышlыгъэ сатыу хъызмэтшlапlэхэм. Ахэр lофыгъуитlум яушъхьагъу мэхъух. Апэрэмкlэ, къатыбэу зэтет унэхэм апае агъэуцугъэ хэкlылъэхэм япыдзафэхэр аратакъох. Ащ къыхэкIыкIэ мы пкъыгъо­хэм псынкlэу арыз мэхъу, анахьэу къалэм дэтхэм.

Шъугу къэдгъэкlыжьын, блэкlыгъэ илъэсым Мыекъуа­пэ ичlыпlэ 38-мэ чIыгум хэт укуугъэ хэкlитэкъупIэ 91-рэ ащагъэуцугъ. Ятlонэрэмкlэ, гъэбылъыгъэкlэ lузы­щыщтхэр къагъотых, ахэм чlыпlэ зэгъокlым щыратэкъушъ, хэбзэнчъэ хэкIитэкъупIэ мэхъу. Ахэм якъыхэгъэщынкlэ шъолъыр операторым ренэу уплъэ­кlунхэр зэхещэх. Аужырэу гъэтхапэм ригъэкlокlыгъэм мыщ фэдэ сатыушlэ 200 ыгъэунэфыгъ. Джырэ уахътэм ахэм яlофхэр зэхафых.
Къэбзэныгъэм имазэу рекlокlырэм ишlушlагъэ зыгъэкlодырэмэ ащыщ хэкl зэтеуагъэу чlылъэ унэхэм мымакlэу аIуплъэгъощтыр. Гумэкlыгъор анахьэу зыщылъэшыр Мыекъуап. Къатыбэу зэтет унэхэм ачlэсхэм апае шlоилъэхэр щытхэмэ, унэе псэупIэхэм ачIэсхэм хэкlыр япчъэlупэхэм къаlуагъэуцо. Ахэр шъолъыр операторым игъом lуимыщхэу тхьаусыхабэ къэлэ администрацием фэкlо. Къэбарым ишъыпкъапIэ зэдгъашIэ тшIоигъоу Мыекъуапэ ичIыпIэ зэфэшъхьафхэм тарыкIуагъ, урамэу Лениным ыцIэ зыхьырэм дэжь, Некрасовымрэ Ветерановымрэ азыфагу, хэкI зэтеуагъэхэм тяолIагъ.
— Чlылъэ унэхэм ащыпсэухэрэм хэкlыр зыlуащырэ мэфэ гъэнэфагъэм е ащ фыхэхыгъэ чlыпlэм шlоир зэрылъ дзыохэр къыдахынхэ фае. Мыщ дэжьым анахь шъхьаlэр хэкlыр lузыщырэ машинэр урамым къырымыкlозэ, ар агъэцэкlэн фае. Сыда пlомэ, а мэфэ хэхыгъэм ар зэ мы урамым зэрэрыкlощтыр. Ащ къытыригъэзэжьэу ыуплъэкIужьынэу уахътэ иlэп. Ау къытфытеохэу къэбарыр тэзыгъашlэхэрэм адэжь ятIонэрэ мафэм тиlофышlэхэр макlох, хэкIыр къыlуа­щы. Арышъ, зыгорэкlэ упчlэхэр яlэхэмэ телефон номерхэу 8-800-707-05-08-м, 8-962868-14-62-м къатеонхэ алъэкIыщт, — къытыгъ шъолъыр операторым ипресс-къулыкъу.
Сыдэу щытми, хэкlыр мыухыжь lоф. Цlыфыр зыдэщыlэм ар щыIэщт. Анахь шъхьаlэр игъом ар Iущыгъэ­ныр ары. Къэбзэныгъэм имазэу, шlыхьафэу зэхащэ­хэрэри ащ къыфэджэх. Къэбзэныгъэм зы мазэ фы­хэ­хыгъэнэу щытэп. Щыlэныгъэм имафэ къэс ишэпх­ъэн фае.
Анцокъо Ирин.