Гъунэгъухэм уиягъэ ямыгъэкIэу фэтэр лыеу уиIэр бэджэндэу птын уфит хъугъэ.

Ау шIокI имыIэу, ащ псым, электроэнергием, ищыкIагъэмэ, гъэстыныпхъэ шхъуантIэм апае счетчикхэр итынхэ фае. УФ-м и Къэралыгъо Думэ мыщ фэ­гъэхьыгъэ хэбзэгъэуцугъэ ща­штагъ.
Фэтэрыбэу зэхэт унэхэм хьа­кIэщ цIыкIухэр е «хостелхэр» ащыбгъэпсынхэ уфимытэу ­къызщиIорэ законыр 2019-рэ илъэсым къыдэкIыгъ, ау охътэ кIэкIым телъытэгъэ бэджэндым шапхъэ пымылъэу къэнэгъагъ. УФ-м и Конституционнэ хьыкум а щыкIагъэр дэгъэзы­жьыгъэным фэгъэхьыгъэ уна­шъоу къышIыгъэм къыпкъы­рыкIхэзэ, депутатхэм хэбзэгъэу­цу­­гъакIэ аштагъ.
Ащ къызэрэщиIорэмкIэ, фэтэрыр зыем охътэ кIэкIкIэ бэ­джэндэу ытын фит, зэритыщтхэмкIи, физическэ лицэмэ хьау­ми компаниемэ, гъунэпкъэ гъэнэфагъэ иIэп, ау гъунэгъу­хэм яфитыныгъэхэр, ярэхьатныгъэ ыукъон фитэп. Шапхъэу ыгъэцэкIэн фаехэр зэхэугуфыкIыгъэу ащ итхагъэх.
Депутатэу ар зэхэзгъэуцуагъэхэм къызэраIорэмкIэ, бысымым иунэ бэджэндэу зэритыгъэхэм мэкъэшхо къапыIукIэу, къэбзэныгъэм лъымыплъэхэу, унэм чIэсхэм зэда­гъэфедэрэ мылъкум яягъэ рагъэкIы зы­хъукIэ, ахэм ямыза­къоу, ежьыми пшъэдэкIыжь ыхьыщт. Ащ фэшI, мы темэм джыри нахь зырагъэушъомб­гъузэ, бэджэндэу зытымэ зы­шIоигъом ыпэра­пшIэу игъунэ­гъухэр ащ къы­зэрезэ­гъыхэ-
рэр яIэпэкIадзэ­хэмкIэ къа­ри­гъэушыхьатын фаеу къызщиIорэ законопроектыр агъэхьазыры.
— ЦIыфхэр бэу зыщызэ­блэкIыщтхэу, мэкъабэ къызэ­рыIукIыщт унэр ягъунэгъоу щытынэу цIыфхэр фэмыенхэ фит, — аIуагъ депутатхэм.
2023-рэ илъэсэу икIыгъэм фэтэрхэр бэджэндэу зытыгъэ­хэм пстэумкIи сомэ миллиард 213-рэ хахъоу яIагъ. Депутатхэм къызэрэхагъэщырэмкIэ, ащ инахьыбэр гъунэгъухэм зэрар къафахьызэ къаугъоигъ. Фэтэрыбэу зэхэт унэхэм ачIэсхэм ятхьаусыхэ тхылъхэм къа­пкъырыкIхэзэ ар къаIо. Джы ащ фэдэ мылъку къэгъэхъакIэр законым «афидэжьыщтэп». Ащ имыза­къоу, къэралыгъо бюджетми хэ­бзэIахьхэр халъхьащтых.
Унэм исхэм псэу, электро­энергиеу агъэфедэрэр зыфэдизыр къэзыгъэлъэгъорэ счетчик­хэр зэрымытхэр бэджэндэу атын фимытхэуи хэбзэгъэуцугъакIэм итхагъ. IэкIыб хэгъэгу благъэхэм къарыкIыгъэхэу мыщ Iоф щызышIэхэрэр (гастарбайтерхэр) нэбгыритф-пшIым къыщымыкIэхэу бэджэндэу аштэгъэ псэупIэм зэрисхэрэр къыдэ­плъытэмэ, ар игъо дэдэу зэрэщытыр нафэ къэхъу.
Санитар шапхъэхэри фэтэ­рым исхэм агъэцэкIэнхэ фай, псэупIэ-коммунальнэ фэIо-фа­шIэ­хэм апкIэ игъом атыныр шIокI зимыIэ Iоф. Ахэр замыгъэ­цакIэкIэ, гъунэгъухэм хьыкумым тхьаусыхэ тхылъыр ратынэу законыкIэм фитыныгъэ къареты.