Илъэсым икIэлэегъэджэ анахь дэгъур къыхэхыгъэным фэгъэ­хьыгъэ республикэ зэнэкъокъур мэфэкI шIыкIэм тетэу мы ма­фэхэм Адыгэ кIэлэегъэджэ колледжэу Андырхъое Хъусен ыцIэ зыхьырэм къыщызэIуа­хыгъ.

Ащ район ыкIи къэлэ зэнэкъокъухэм ащытекIогъэ кIэлэегъэджэ 14 хэлажьэ. Зэнэкъокъур тхьамэфитIо кIощт, анахь дэгъоу къыщыхахырэр Урысые зэнэ­къокъум хэлэжьэщт.
Адыгэ Республикэм и ЛIышъхьэу КъумпIыл Мурат ыцIэкIэ Iофтхьабзэм къекIолIагъэхэм шIуфэс къарихыгъ АР-м гъэсэныгъэмрэ шIэныгъэмрэкIэ ими­нистрэу Евгений Лебедевым.
— ШъуисэнэхьаткIэ IэпэIэсэныгъэу шъухэлъыр къэжъугъэлъэгъонэу непэ шъукъэкIуагъ, кIэлэегъэджэ дэй респуб­ликэ зэнэкъокъум хэлажьэрэп. Шъуигъэ­хъагъэхэм ахэжъугъахъозэ, шъуиIоф­шIэн лъыжъугъэкIотэнэу шъуфэсэIо, — къы­Iуагъ Евгений Лебедевым.

Зэнэкъокъур уцугъуищэу зэтеуты­гъэщт. Апэрэм хэхьэх ушэтынхэу «Сэлам шъосэхы! Ар сэры!», «КIэлэеджакIом гущыIэгъу сыфэхъу», «Еджэгъу сыхьат». ЯтIонэрэм мастер-класс ыкIи пресс-конференциеу «Илъэсым икIэлэегъаджэ упчIэ етэты» зыфиIорэр щызэхащэщт. А уцугъуитIум ауж кIэуххэр зэфахьысыжьынхэшъ, кIэлэегъэджэ анахь дэ­гъуи 5-р къыхахыщт. Ахэр ящэнэрэ уцугъом хэлэжьэщтых ыкIи текIоныгъэр, хагъэу­нэфыкIырэ чIыпIэр къыдэзыхыгъэхэр къэнэфэщтых.
Зэнэкъокъум хэлажьэх Мыекъуапэ щыщхэу Светлана Великовамрэ Анна Николаевамрэ, Мыекъопэ районымкIэ Юлия Газарян ыкIи Кристина Карагезьян, Кощхьэблэ районымкIэ Александр Ериныр, Тэхъутэмыкъое районымкIэ Геннадий Васьковыр ыкIи Руфина Кипчатовар, Шэуджэн районымкIэ Милана Ермаковар, Теуцожь районымкIэ ЯхъулIэ ­Гощсим, Адыгэкъалэ къикIыгъэх ЖэнэлI Эммэрэ Таус Бэллэрэ, Красно­гвардейскэ районым Ирина Крамарен­кэр, СтIашъу Рузанэ, Джэ­джэ районым Олеся Оленич.
Апэрэ уцугъом изэфэхьысыжьхэр мэлылъфэгъум и 20-м къэнэфэщтых.