АР-м гъэсэныгъэмрэ шIэныгъэмрэкIэ и Ми­нистерствэ кIэщакIо зы­фэхъугъэ Iофтхьабзэу «Гъэхъагъэм ишъэф» зы­фиIорэр мы мафэхэм гурыт еджапIэхэм ащэкIо.

ЗыкI къэралыгъо ушэтыным ныбжьыкIэхэм зэрифэшъуашэу зыфагъэхьазырыным ыкIи балл инхэр къахьынхэм фэшI кIэлэ­еджакIохэм анахьэу анаIэ зытырагъэтын фаехэм ате­гущыIэх.
Iофтхьабзэм къыдыхэлъытагъэу зыкI къэралы­гъо ушэтынхэр дэгъоу зытыгъэ ныбжьыкIэхэр, ахэр зы­гъэхьазырыгъэ кIэлэегъа­джэхэр гурыт еджапIэхэм арагъэблэгъагъэх, я 11-рэ классыр къэзыухыхэрэм гущыIэгъу афэхъугъэх.
Мы Iофтхьабзэр респуб­ликэм имуниципальнэ об­разованиехэм зэкIэми ащы­кIонэу агъэнафэ. Мэлылъфэгъум и 11-м къыщегъэжьагъэу и 19-м нэс ар зэхащэщт.
Гимназиеу N 5-р гъэ­рекIо къэзыухыгъэу, химиемкIэ балли 100 къэзы­хьыгъэ Алина Дрожжинар зыщеджэгъэ еджапIэм рагъэблэгъагъ. Мыщ фэдэ гъэхъагъэхэр ышIынхэмкIэ IэпыIэгъу къыфэхъугъэр, ушэтынхэм зызэрафигъэ­хьазырыгъэр, балл ин къэп­хьыным пае анахьэу унаIэ зытетын фаер, шъэ­фэу хэлъхэр пшъэшъэжъы­ем къыIотагъэх. Джырэ уахътэм ар Мыекъопэ къэ­ралыгъо технологическэ университетым щеджэ. Джащ фэдэу пшъэшъэ ныбжьыкIэр зыгъэхьазырыгъэ кIэлэегъаджэри къэзэрэугъоигъэхэм гущы­Iэгъу афэхъугъ.
— Дэгъоу еджагъэхэу, балл ин къэзыхьыгъэхэр щысэтехыпIэ афэхъунхэмкIэ мыщ фэдэ Iофтхьа­бзэхэм мэхьанэшхо яI. Я 11-рэ классыр мыгъэ нэ­бгырэ 32-мэ къаухы, ахэм ащыщэу дэгъоу еджэу, тыжьын медаль къэзыхьы­нэу къызытефэрэр нэбгырищ, дэгъу дэдэу еджэрэ нэбгыри 6 тиI. Ахэм шIэныгъэу агъотыгъэр къагъэ­шъыпкъэжьынэу, ямурадхэр къадэхъунхэу тэ­гугъэ, — къыIуагъ гимназиеу № 5-м ипащэ игуа­дзэу Валентина Зем­скаям.
Iофтхьабзэм къыдыхэлъытагъэу зыкI къэралыгъо ушэтыным зыфэзыгъэхьазырхэрэм психологхэр гущыIэгъу афэхъущтых. МыгумэкIыхэу шIэныгъэу зэрагъэгъотыгъэхэмкIэ заушэтыжьын зэрэфаер агурагъэIощт.