Мэлылъфэгъум и 19-м мафэм сыхьатыр 13-м «Ньютон имы­Iэрыс» зыфиIорэ къэгъэлъэгъоныкIэр КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр Кавказ къутамэу Мыекъуапэ щыIэм къыщызэIуахыщт.

Мы проектыр Московскэ купэу «Наша утопия» зыфиIорэм ыкIи ащ иныбджэгъухэм къагъэхьазырыгъ. Къэгъэлъэгъоным IофшIэгъэ 40-м ехъу къыдыхэлъытагъ. Ахэм ащыщыбэхэр хэушъхьафыкIыгъэу къэгъэлъэгъоным пае къагъэхьазырыгъэх ыкIи унэе коллекциехэм къахэхыгъэх.
Къэгъэлъэгъоным дунаим исурэтышIхэм якартэу «Наша утопия» зыфиIорэм ухещэ. Мыр шIыкIакIэу ыкIи уахътэм диштэу щыт. СурэтышIхэм къаугупшысыгъэ хъугъэ-шIагъэхэр мыщ щыпхырыщыгъэх, лъэныкъо мини 3500-м ехъу ыкIи локацие зэфэшъхьафхэр къыдыхэлъытагъэх. Ахэм зэу ащыщ «Ньютон имыIэрыс» зыфиIорэ чIыпIэр. Ар картэм хэзгъэхьагъэр Мыекъуапэ щыщэу Вова Перкиныр ары. Ар мы къэгъэлъэгъоным изэхэщакIу.
Iофтхьабзэм хэлажьэх Москва исурэтышIхэу Вова Перкиныр, Виктор Гоппе, Дима Маконда, Роман Ермаковыр, Сережа Фили, Лиза Плакса, Юра Забсе ыкIи Арчикилий.
Вова Перкиныр 1995-рэ илъэсым Мыекъуапэ къыщыхъугъ. Итворческэ гъогу 2008-рэ илъэсым къыщежьэ. Ащ Дима Маконда игъусэу сурэтышIхэм якупэу «Наша утопия» зыфиIорэр 2015-рэ илъэсым зэхищагъ. Анахь узщыгугъын плъэкIыщт кIэлэ ныбжьыкIэхэм (илъэс 30-м нэс зыныбжьхэм) ярейтинг хэт лъэныкъоу «ИскусствэмкIэ» журналэу «Forbes Russia» зыфиIорэм 2021-рэ илъэсым ихьагъ.
Къэгъэлъэгъоным хэлэжьэрэ сурэ­тышIхэр фестивальхэм, Iофтхьэбзэ зэфэшъхьафхэм ахэлажьэх. ГущыIэм пае: «Перкуссия», «я III-рэ Московскэ арт-премиер», «Красный сад» ыкIи нэмыкIхэри. IофшIагъэхэр Урысые ыкIи IэкIыб къэралыгъохэм яунэе ыкIи ямузейнэ фондхэм ахэхьэх.
Лъэпшъыкъо Фатим.