АР-м и Правительствэ иунэ Адыгеим и ЛIышъхьэу КъумпIыл Муратрэ Урысыем IэкIыб къэ­рал IофхэмкIэ и Министерствэ илIыкIохэм я ЛIыкIо IофшIапIэу къалэу Краснодар дэтым ипащэ ипшъэрылъхэр зыгъэцакIэу Ольга Шалимовамрэ IофшIэгъу зэIукIэгъу щызэдыряIагъ.

Лъэныкъохэр зытегущыIагъэхэр УФ-м и Президентэу Владимир Путиным шъо­лъырхэм экспортымкIэ яамалхэр нахь икъоу агъэфедэнхэмкIэ пшъэрылъэу къыгъэуцугъэхэр зэдызэшIуахынхэмкIэ Iофыгъоу щытхэр, джащ фэдэу Адыгеир дунэе экономикэ, культурнэ, гъэсэныгъэ проектхэм зэрахэлажьэрэр ары.
ЗэдэгущыIэгъум хэлэжьагъэх АР-м и ЛIышъхьэ иIэпыIэгъоу Хьакъунэ Бэллэрэ УФ-м IэкIыб къэрал IофхэмкIэ и Министерствэ илIыкIохэм я ЛIыкIо IофшIапIэу Красно­дар дэтым иапэрэ секретарэу Игорь Терзиянрэ.
КъумпIыл Мурат къызэрэхигъэщыгъэм­кIэ, Урысыем и Президент кIэщакIо зыфэхъугъэ лъэпкъ проектэу «Предпринимательствэ цIыкIумрэ гурытымрэ» зыфиIорэм ишIуагъэкIэ мы аужырэ илъэсхэм республикэм къыдигъэкIыхэрэм ащыщэу IэкIыб къэралхэм аIэкIигъахьэрэм хэпшIыкIэу хигъэхъон ылъэкIыгъ. Адыгеим экспортымкIэ IэпыIэгъу етыгъэным и Гупчэ диштэу предпринимательствэ цIыкIумрэ гурытымрэ къахиубытэхэрэм мылъку IэпыIэгъу араты, илъэс къэс ахэм аIэкIагъэхьэрэ ахъщэр нахьыбэ ашIы. Республикэм итоварышIхэр чанэу дунэе къэгъэлъэгъонхэм ахэлажьэх, экспортымкIэ зэзэгъыныгъэхэр адашIых. НепэкIэ республикэм ипродукцие хэгъэ­губэмэ алъегъэIэсы, ахэм ахэхьэх Китаир, Зэхэт Араб Эмиратхэр, Тыркуер, Иорданиер, Казахстан, Беларусь ыкIи нэмыкIхэр.
ГущыIэм пае, мы илъэсым гъэтхапэм Урысыем IэкIыб къэрал IофхэмкIэ и Министерствэ илIыкIохэм я ЛIыкIо Iоф­шIапIэу Краснодар дэтым иIэпыIэгъу хэлъэу Адыгеим къэкIогъагъэх Респуб­ликэу Беларусь иIофышIэ куп. Белоруссием ибизнесменхэр республикэм ипредприятиехэм ащыIагъэх, ахэм яамалхэм защагъэгъозагъ, продукциеу къыдагъэкIырэм нэIуасэ зыфашIыгъ, лъэныкъуитIумкIи бизнесым епхыгъэу Iоф зышIэхэрэм ялIыкIохэм зэдэгущыIэгъоу зэдыряIагъэ­хэм ахэлэжьагъэх. Ащ нэужым Адыгеим илIыкIо куп Белоруссием щыIагъ. Экономикэ Iофыгъо­хэм анэмыкIэу наукэмкIэ ыкIи техникэмкIэ, гъэсэныгъэмкIэ ыкIи культурэмкIэ язэдэлэжьэныгъэ тапэкIи зэрэлъагъэкIотэщтым тегущыIагъэх.
«Федеральнэ пащэхэм IэпыIэгъоу къы­татырэм промышленностым ылъэныкъокIэ нахь хэхъоныгъэ тшIыным епхыгъэ амалышIухэр къыздехьых. Республикэмрэ хэгъэгумрэ ямызакъоу, IэкIыб къэралхэми аIэкIэдгъахьэрэр нахьыбэ мэхъу. Бизнесым IэпыIэгъу етыгъэнымкIэ джырэ­кIэ щыIэ амалхэр икъоу Адыгеим щытэгъэфедэх», — къы­Iуагъ АР-м и ЛIышъхьэ.
Ольга Шалимовам къызэриIуагъэмкIэ, къулыкъум ищыкIэгъэ IэпыIэгъур респуб­ли­кэм къыреты, Урысые Федерацием гъусэныгъэ зыдыриIэ хэгъэгухэмкIэ зэпхы­ныгъэхэм ягъэпытэн фэгъэхьыгъэ Iоф­тхьаб­зэхэми адыре­гъаштэ.

Адыгэхэу IэкIыб къэралхэм арысхэм мэхьанэу яIэми шъхьафэу къыщыуцу­гъэх. Республикэм культурэм ыкIи экономикэм алъэныкъокIэ зэпхыныгъэу хэгъэгу зэфэшъхьафхэм арыс тилъэпкъэгъухэм адыриIэхэм яшIуагъэкIэ IэкIыб къэралхэм зэдэлэжьэныгъэ-гъусэныгъэ зыдытиIэн тлъэкIыщт цIыфыкIэхэр къащыхэтэгъэщых. ГущыIэм пае, Адыгеим илIыкIо куп 2019-рэ илъэсым Тыркуем зэкIом ыкIи Тырку­ем илIыкIохэр 2022-рэ илъэсым Адыгеим къызэкIохэм хагъэунэфыкIыгъагъ адыгэ нэбгырэ миллион пчъагъэу Тыркуем щыпсэухэрэм экономикэ, инвестицие, культурнэ-гуманитар зэпхыныгъэу адытиIэхэр нахь пытэ зэрэхъухэрэр. Тыркуем илIыкIохэм къы­зэрэхагъэщыгъэмкIэ, Тыркуемрэ Урысыемрэ арыс адыгэхэм язэдэлэжьэныгъэ хэгъэгуитIуми федэ къафехьы. Адыгэхэу IэкIыб къэралхэм арысхэр ятарихъ чIыгужъ нахь пэблагъэ зэрэхъущтхэм пы­лъых, IофшIэнымкIи, социальнэ ыкIи культурнэ лъэныкъохэмкIи, экономикэмкIи амал зэфэшъхьафхэм ягъэунэфын анаIэ тырагъэты. IэкIыб къэ­ралхэм арыс адыгэхэм Урысыемрэ нэмыкI IэкIыб къэралхэмрэ язэпхыныгъэ нахь пытэным яIахьышIу хашIыхьэ.
АР-м и ЛIышъхьэ ипресс-къулыкъу