Мэлылъфэгъум и 1-м рагъэжьэгъэ гъэтхэ дзэ дэщыгъом къыдыхэлъытагъэу Адыгэ Республикэм идзэ комиссариат щагъэкIотагъ Урысыем идзэхэм къулыкъур ащызыхьыщт ныбжьыкIи 10-р.

Iофтхьабзэм хэлэжьагъэх АР-м ныбжьыкIэхэм яIофхэмкIэ и Комитет итхьаматэу Максим Галушкиныр, лъэпкъ Iоф­хэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ Комитетым итхьаматэ игуадзэу Кон­стантин Щербаковыр, народнэ депутатхэм якъэлэ Совет ипащэу Джарымэкъо Азмэт, генерал-майорэу Александр Дорофеевыр, республикэм ирайон администрациехэм, идзэ комиссариатхэм ялIыкIохэр, юнармейцэхэр, дзэ къулы­къум агъэкIотагъэхэм ягупсэхэмрэ яIахьыл­хэмрэ.
Константин Щербаковым шIуфэс пса­лъэкIэ къэзэрэугъоигъэхэм закъыфигъэзагъ.
— Тихэгъэгу ишъхьафитыныгъэ язымыгъэукъощт дзэкIолIхэм япIун-гъэсэнкIэ хэбзэ шIагъор тикъэралыгъо щылъыгъэ­кIотэгъэн фае. Зи Хэгъэгу къэзыухъумэрэ дзэкIолI пэпчъ мэгушхо, шъори шъуи­чIыгу гупсэ шъурыгушху. Тиреспубликэ ыцIэкIэ шъощ фэдэ кIэлэ ищыгъэ ныбжьыкIэхэм Урысыем и УIэшыгъэ КIуа­чIэхэм къулыкъу зэращахьыщтыр лъэшэу сигуап. Шъуиакъыли, шъукIуачIи нахь къахэхъуагъэу, шъуипсауныгъи нахь пытагъэу къэжъугъэзэжьынэу сышъуфэ­лъаIо», — къыIуагъ комитетым итхьаматэ игуадзэ.
— ЕджапIэми, шъуянэ-шъуятэхэми дзэ къулыкъум шъуфагъэхьазырыгъ. Шъуихэгъэгу иухъумэкIо шъыпкъэ шъо шъухъун фай. Шъуащыщыбэмэ хэушъхьафыкIыгъэ дзэ операцием хэлажьэмэ зэрашIоигъор сэшIэ. Ау джыдэдэм шъо пшъэрылъэу шъуиIэр шъуикомандование къышъуфигъэуцурэ пшъэрылъхэр цыхьэшIэгъоу жъугъэцэкIэнхэр ары, — къыIуагъ Александр Дорофеевым.
Нэужым муниципальнэ администрациехэм ялIыкIохэм дзэ къулыкъум ащэщтхэм шIухьафтынхэр аратыгъэх.
— КъытфэгумэкIыгъэ, дзэ къулыкъум тызыгъэкIотэгъэ пстэуми синыбджэгъу­хэм ацIэкIэ тызэрафэразэр къэсэIо. Тихэ­гъэгуи, Адыгей гупсэри лIыхъужъны­гъэ тхэлъэу къызэрэтыухъумэщтхэмкIэ шъу­тэгъэгугъэ, — къыIуагъ Трахъо Алый.
АР-м идзэ комиссарэу Александр Авериным ыпэкIэ зэрэхигъэунэфыкIыгъа­гъэу, ныбжьыкIэхэм дзэ къулыкъур Урысыем щахьыщт, хэушъхьафыкIыгъэ дзэ операцием хагъэлэжьэщтхэп. Адыге­им икIыгъэ кIалэхэр Къыблэ дзэ округым илъэсыдзэхэм яшхончэо часть хэтыщтых.
Александра Балабась.
Сурэтыр авторым ий.