Адыгеим и НыбжьыкIэ парламент хэтэу, социальнэ политикэмкIэ, унагъом иIофхэмкIэ ыкIи псауныгъэм икъэухъу­мэнкIэ икомитет ипащэу Бэрзэдж Асиет УФ-м и Федеральнэ ЗэIукIэ ФедерациемкIэ и Совет ихэбзэихъухьэ ныб­жьыкIэхэм я Палатэу щызэхащагъэм социальнэ политикэмкIэ ыкIи псауны­гъэм икъэухъумэнкIэ и Комитет итхьаматэ игуадзэу агъэнэфагъ.
Комитетым ипащэхэр зыщыхадзыгъэ зэхэсыгъоу блэкIыгъэ тхьамафэм иIагъэм видеоконференцие шIыкIэм тетэу ар хэлэжьагъ. Адыгеим и НыбжьыкIэ парламент илIыкIо икандидатурэу къагъэлъэгъуагъэм зэкIэми дырагъэштагъ.

— Социальнэ политикэмкIэ ыкIи псауныгъэм икъэухъумэнкIэ Комитетым Iоф зэрэщысшIэщтыр пшъэдэкIыжьышхо зыпылъ пшъэрылъэу сэлъытэ. СиIофшIэгъоу ащ хэтхэм шIуагъэ къытэу садэлэжьэнэу сыхьазыр, — къыIуагъ Асиет.
Бэрзэдж Асиет къалэу Мыекъуапэ инароднэ депутатхэм я Совет хэт, Урысые общественнэ организациеу «Единэ Россием и НыбжьыкIэ Гвардие» и Адыгэ шъолъыр къутамэ ипащ.