Апэрэ Индие-Урысые гъэсэныгъэ саммит-­зэхэсыгъоу ыкIи къэгъэлъэгъон-ермэ­лы­къэу «Урысые гъэсэныгъэр — 2024» зыфиIоу мы мафэхэм Нью-Дели щыкIорэм Адыгэ къэралыгъо университетым илIы­кIохэр хэлажьэх. Апшъэрэ еджапIэм ипроректорэу ЛIы­хъэтыкъо Сусанэрэ дунэе зэдэлэжьэны­гъэмкIэ отделым ипащэу Сокар Саламрэ университетым ипрограммэхэр ащ къыщагъэлъэгъуагъэх.

Апшъэрэ гъэсэныгъэмкIэ Урысыем иамалхэм Индием зыщягъэушъомбгъугъэныр ары пшъэрылъ шъхьаIэу зэхэщакIохэм яIэр. Урысые апшъэрэ еджэпIэ анахь дэгъухэм — лъэпкъ зэныб­джэгъуныгъэмкIэ Урысые университетэу П. Лумумбэ ыцIэ зыхьырэм, Урысые экономическэ университетэу Г.Плехановым ыцIэ зы­хьырэм, шIэныгъэмкIэ ыкIи технологиехэмкIэ Универ­ситетым, Москва къэралыгъо техническэ университетэу Н.Бауман ыцIэ зыхьырэм ыкIи нэмыкIхэм ялIыкIохэр ащ къекIолIагъэх.
Iофтхьабзэм хэлэжьагъэ­хэм хэушъхьафыкIыгъэ ­программэмкIэ Iоф ашIагъ. Къэ­гъэлъэгъоным къыдыхэлъытагъэу апшъэрэ еджапIэхэм япроектхэм ащагъэгъозагъэх. Нэужым Урысые-­Индие Ассоциацием изэ­хэсыгъо щыIагъ. ЛIыхъэтыкъо Сусанэ Адыгэ къэралыгъо университетым итарихъ, амалэу иIэхэм афэгъэхьыгъэ доклад ащ къыщишIыгъ.
Форумым хэлэжьагъэхэм ыкIи ихьакIэхэм Нью-Дели дэт университет зэфэшъхьаф­хэр нэужым къакIухьагъэх, яIофшIэн зэрэзэхащэрэр зэ­рагъэлъэгъугъ.
Адыгэ къэралыгъо ­университетым ипресс-къулыкъу