Мыекъопэ къэралыгъо технологическэ университетым «пчъэ зэIухыгъэхэм» ямафэ щызэхащагъ.

Апшъэрэ классхэм ащеджэрэ кIэлэеджакIохэр ыкIи гурыт сэнэхьат зэзыгъэгъотырэ ныбжьыкIэхэр ащ къырагъэблэгъагъэх, гущыIэгъу афэхъугъэх, шэпхъакIэхэр къафаIотагъэх.
ДжырэкIэ анахь ящыкIэгъэ сэнэхьатхэу апшъэрэ еджапIэм зыфигъэхьазырхэрэм ныбжьыкIэхэр нэIуасэ афашIыгъэх. Университетым узэрэчIэхьащтым шапхъэу пылъхэр, стипендиеу къаратырэр, ныбжьыкIэ чанхэм фэгъэкIотэнэу яIэхэр къафаIотагъэх.
Анахьэу ашIогъэшIэгъоныгъэр мы илъэсым Iоныгъом и 1-м Дзэ егъэджэн гупчэ мыщ къыщызэрэщызэIуахыщтыр ары. НыбжьыкIэхэм егъэджэн ла­бораториехэр къарагъэплъыхьа­гъэх, факультетхэм якIэ­лэ­егъа­джэхэм нэIуасэ афэхъугъэх, зы­гъэгу­мэкIырэ упчIэхэм яджэуапхэр агъотыжьыгъ.
Проректорэу Людмила За­дорожнаям апшъэрэ еджапIэм амалэу къытыхэрэр къафиIотагъ. Мыщ щеджэхэрэм шIэныгъэ зэрэзэрагъэгъотырэм дакIоу лъэныкъо зэфэшъхьафхэм хэшIыкI афыряIэу, ящыIэныгъэкIэ ахэр къафэфедэжьынхэм Iоф дашIэ, федеральнэ проектхэм ахэлажьэх.
Джащ фэдэу 2024-рэ илъэсым гъэсэныгъэ программэхэу бакалавриатым, специалитетым ыкIи магистратурэм уачIэхьанымкIэ зэхъокIыныгъэу щыIэхэм, бюджет чIыпIэу яIэхэм, тхьапэ­хэр зэрепхьылIэщтхэм, джащ фэдэу платформэу «Работа в России» зыфиIорэм амалэу къытыхэрэм афэгъэхьыгъэу къа­фиIотагъэх апшъэрэ еджапIэм иIофышIэу Бэрзэдж Розэ.
Мыекъопэ къэралыгъо тех­нологическэ университетым 2024-рэ илъэсым мэзаем и 1-м къы­щегъэжьагъэу тхьапэхэм яштэн ыублагъ. Бакалавриатым, специалитетым ыкIи магистратурэм япрограммэхэмкIэ еджэнхэу нэбгыри 100-мэ тхьапэхэр чIалъхьагъэх. Мэкъуогъум и 20-м къыщегъэжьагъэу онлайн шIыкIэм тетэу ыкIи къэралыгъо фэIо-фашIэхэмкIэ порталымкIэ тхьапэхэр агъэхьын амал яIэщт.
— Илъэс къэс «пчъэ зэIухыгъэхэм» ямафэ зэхэтэщэ ыкIи ар мэфэкI шIыкIэм тетэу макIо. Анахь мэхьанэ зиIэр ныбжьыкIэхэм ящыIэныгъэ зэрапхыщт лъэныкъор къыхахын амал зэ­ряIэр ары, — къыIуагъ проф­ориентациемкIэ ыкIи апшъэрэ еджапIэм джыри чIэмыхьагъэ­хэм ягъэхьазырынкIэ гупчэм ипащэу Олег Франко.
Мыекъопэ къэралыгъо технологическэ универси­тетым ипресс-къулыкъу