Адыгэ Республикэм изаслу­женнэ сурэтышIэу, Хэ­гъэгу зэошхом хэлэ­жьагъэу Владимир Мехед къы­зыхъугъэр илъэси 100 зэрэхъу­рэм фэгъэхьыгъэ къэгъэлъэгъон Адыгеим исурэт къэгъэ­лъэгъуапIэ къыщызэ­Iуахыгъ. Ащ IэпэIасэм иIэшIа­гъэ сурэт 40 хэхьагъ.

Iофтхьабзэр къызэIуихыгъ Урысые Федерацием культу­рэмкIэ изаслуженнэ IофышIэу, Адыгеим ыкIи Къэрэщэе-Щэр­джэсым язаслуженнэ сурэты­шIэу Бырсыр Абдулахь.
— Мыщ фэдэ сурэтхэр пшIынхэм пае бэмэ уащыгъозэн фае: Адыгеим итарихъ, икультурэ, нэмыкIхэм. Сурэт пэпчъ псэ пытэу фэбагъэ горэ къыбгъо­дэкIы, чIыопсым идэхагъэ нэ­рылъэгъу къыпфешIы, — къы­Iуагъ Бырсыр Абдулахь.

Зэхахьэр лъигъэкIотагъ АР-м культурэмкIэ и Министерствэ иотдел ипащэу Шэуджэн Бэлэ:
«В. Мехед Урысыем щызэлъашIэрэ сурэтышI IэпэIасэхэм ащыщ. Ащ иIэшIагъэхэр зыми хэкIуакIэхэрэп, исурэт пэпчъ дэхагъэ горэ хэогъуатэ, псэ пытым фэдэу ахэр тапашъхьэ къырегъэуцох».
— Кавказым ичIыопс дэхэ зэкIужь игупсэфыныгъэ-тынчыгъэ ыкIи нэмыкI зэхашIэхэр
В. Мехед исурэтхэм къагъэущых, дунэе гъэшIэгъоным ухащэ, — къыIуагъ АР-м исурэтышIэхэм я Союз итхьаматэу Елена Аба­кумовам.
В. М. Мехед итворчествэ уасэ фэзышIыхэрэр къэгъэлъэгъоным икъызэIухын хэлэжьагъэх, IэпэIасэм иIофшIэгъугъэ­хэм, культурэм щылажьэхэрэм анэмыкIэу студентхэр, ныбжьыкIэхэр ахэм бэу ахэтыгъэх. Зэхахьэр къыгъэдэхагъ Адыгеим иартист цIэрыIоу Бэрзэдж Светланэ.
IэпэIасэм икъэгъэлъэгъон мэлылъфэгъум и 21-м нэс ­кIощт.
IэпэIасэм фэгъэхьыгъэу
В. Мехед гъэтхапэм и ­24-м, 1924-рэ илъэсым Мые­къуапэ къыщыхъугъ. ИцIыкIугъом къыщегъэжьагъэу сурэтшIыным пыщэ­гъагъ. Дзэ къулыкъум ыуж Краснодар дэт художественнэ училищыр къыу­хыгъ. Анахьэу пейзажым пылъыгъ ыкIи ар дэгъоу къыдэхъущтыгъ.
IэпэIасэм дунаим шIулъэгъуныгъэу фыриIэр исурэтыбэмэ къащигъэлъэгъуагъ. ЗэлъашIэрэ сурэтышIым икъэгъэлъэгъонхэр Крас­нодар, Налщык, Италием икъалэу Тревон ыкIи нэмыкI IэкIыб хэгъэгухэм ащыкIуагъэх.
СурэтышIмэ я Унэ истудие ипащэу илъэсыбэрэ Iоф ышIагъ.