Лъэпкъ проектэу «Культурэм» ипрограммэ къыдыхэлъытагъэу академическэ мэкъамэм ишъолъыр фестиваль бэмышIэу Адыгеим щыкIуагъ.

Iофтхьабзэр зэхащагъ Адыгэ Республикэм культурэмкIэ и Министерствэрэ республикэм и Концерт объединениерэ.
Фестивалым пшъэрылъэу иIагъэр хэгъэгу ыкIи лъэпкъ искусствэр къызэтегъэнэгъэнхэр, тапэкIэ хэхъоныгъэ ягъэшIыгъэныр, цIыфхэр академическэ искусствэм фэщэгъэнхэр, зэлъашIэгъэ композиторхэм афэ­шъхьафэу музыкант ныбжьыкIэхэми нэIуасэ афэшIыгъэнхэр ары.
Фестивалыр Адыгеим и Къэ­ралыгъо филармоние щыкIуагъ. АР-м культурэмкIэ иминистрэ игуадзэу Ольга Гавшинам ипэублэ псалъэу ащ къыщи­шIыгъэм къыщыхигъэщыгъ: «Непэрэ фестивалым шъолъыр мэхьанэ иI. Мыщ фэдэ Iоф­тхьэбзэ иным шIуагъэу, дэхагъэу, кIуачIэу хэлъыр бэ. АР-м и ЛIышъхьэрэ министрэхэм я Кабинетрэ тиIэпыIэгъухэу академическэ мэкъамэм икъызэтегъэнэнрэ ихэгъэхъонрэ тадэлажьэ. Тиоркестрэ ищыкIагъэр зэкIэ едгъэгъотыным тыпылъ, тапэкIи ар зэпыдгъэущтэп».
Фестивалым иапэрэ пчыхьэ мэкъэмэ зэфэшъхьафыбэ щы­Iугъ. Зэраублагъэр Урысыем инароднэ артистэу, орэдыIо-­къэшъокIо ансамблэу «Ислъамыем» ихудожественнэ пащэу Нэхэе Аслъан ирапсодиеу «Хьа­гъэудж изэфакIу» зыфиIорэр ары. Ащ къыкIэлъыкIуагъэх Хьаупэ Джэбраилэ ия 3-рэ симфониеу «Псыхэгъэ», КIыргъ Юрэ и «Нарт сюитэу» Къуекъо Налбый ипьесэу «Нарт Саусырыкъо имашIу» зыфиIорэм щыIугъэ мэкъамэхэм ате­хыгъэр, Къэбэрдэкъо Мурат и «Адыгэ мэкъамэхэр» ыкIи нэмыкIхэри.

IэгутеошхокIэ агъэкIотэжьыгъ Санкт-Петербург къикIыгъэ артистэу, виолончелым къезыгъэ­Iогъэ Игорь Ботвин, АР-м и Концерт объединение иорэдыIоу Дарья Урбинар. Фестивалым иапэрэ мафэ концерт программэр къытыгъ АР-м исим­фоническэ оркестрэ ихудо­жественнэ пащэу ыкIи идирижер шъхьаIэу СтIашъу Къэп­лъан. Зэхахьэм иятIонэрэ мафэ оркестрэм ипэщагъ АР-м ина­роднэ артистэу, симфоническэ ор­кестрэм идирижерэу Аркадий Хуснияровыр.
Михаил Глинка ыныбжь ­
илъэс 220-рэ зэрэхъугъэм фэгъэхьыгъэ мэфэкI концертыр фестивалым иятIонэрэ мафэ къыдыхэлъытэгъагъ. Композиторым имэкъамэхэр зэхахьэм щыIугъэх.
Фестивалым иконцерт программэхэр зэрищагъэх лектор-музыковедэу Хьакъуй Заремэ.
Фестивалыр мэфитIо кIуагъэ. Музыкантхэм къагъэхьа­зырыгъэ къэгъэлъэгъонхэм ­гухахъо хагъуатэу цIыфхэр яплъыгъэх.