Сомэ миллион 30 къахьыгъ
Урысыем шIэныгъэмкIэ и Министерствэ зэхищэгъэ зэнэкъокъум Адыгэ къэралыгъо университетыр хэлэжьагъ ыкIи грант къыфагъэшъошагъ.
Федеральнэ проектэу «Популяризация науки и технологий» зыфиIорэм ар къыдыхэлъытагъ. Проектэу «Наука вокруг» зыфиIорэр щыIэныгъэм щыпхырыщыгъэным фэшI университетым грантэу сомэ миллион 30 къыфатIупщыгъ, проект анахь ин 18-мэ ар ахэхьагъ.
«Наука вокруг» зыфиIорэ проектым пшъэрылъ шъхьаIэу иIэр естественнэ, хьисап шIэныгъэхэм ыкIи къэбарлъыгъэIэс технологиехэм япхыгъэу Iоф зышIэхэрэм ягъэхъагъэхэм ахагъэхъоныр ары.
Грантым пылъ ахъщэр къызфагъэфедэзэ Урысые кIэлэцIыкIу гупчэу «Орленок» зыфиIорэм шIэныгъэм епхыгъэ фестиваль щызэхащэщт. Къэралыгъом ишIэныгъэлэжьхэм лекциехэр къатыщтых, естествознаниемкIэ ыкIи хьисапымкIэ кIэлэеджакIохэм онлайн- урокхэр афызэхащэщтых.
ШIэныгъэм и Мафэ епхыгъэ фестивалым шъолъыр зэфэшъхьафхэм якIэлэеджэкIо мин 20-м ехъу хэлэжьэнэу агъэнафэ. ЖъоныгъокIэ мазэм къыщегъэжьагъэу чъэпыогъум нэс ар кIощт. ДжэгукIэ шIыкIэм тетэу хьисапымкIэ, биологиемкIэ, физикэмкIэ, астрофизикэмкIэ ыкIи химиемкIэ яшIэныгъэхэм ахагъэхъощт.
АКъУ-м ипресс-къулыкъу.