Фондэу «Хэгъэгум иухъума­кIохэр» зыфиIорэм ишъолъыр къу­тамэрэ Мыекъопэ къэлэ администрацием физическэ культурэмкIэ ыкIи спортымкIэ и Комитетрэ шхонч щэрыонымкIэ зэнэкъокъу зэхащагъ. ЩэрыонымкIэ республикэ спорт еджапIэу С. Алифиренкэм ыцIэ зыхьырэм щыкIогъэ Iофтхьабзэм хэлэжьагъэх хэушъхьафыкIыгъэ дзэ операцием иветеранхэр, дзэ обще­ственнэ организациехэм ялIыкIохэр.
Мыщ фэдэ зэнэкъокъу ятIонэрэу зэхащагъ, апэрэр дзэ операцием хэлэжьагъэхэм лъэшэу агу рихьыгъагъ.
— Шъолъыр фондым ипшъэрылъхэм зэу ащыщ хэушъхьафыкIыгъэ дзэ операцием хэлэжьагъэхэм алъыплъэнхэр, щыIэныгъэм хэгъэ­гъо­зэгъэнхэр. АщкIэ амалышIоу тэлъытэ шхонч щэрыонымкIэ зэ­нэкъокъухэр. Мыщ къыдыхэлъытагъэу ахэр зэIокIэх, гущыIэгъу зэфэхъух. Непэрэ Iофтхьабзэм нэбгырэ 20 фэдиз зэфищагъ, щэрыонымкIэ яIэпэIэсэныгъэ къызэрагъэлъэгъощтым ахэр пылъы­гъэх, — хигъэунэфыкIыгъ фондэу «Хэгъэгум иухъумакIохэр» зыфи­Iорэм икъутамэ ипащэ игуа­дзэу Елена Малковам-Джарымэм.
— Мыщ фэдэ купым хахьэхэрэм нахь ашIогъэшIэгъоныщтхэр къыдэтлъытэзэ, программэр тэгъэпсы. Джы шхонч щэрыонымкIэ зэнэкъо­къугъэхэмэ, зэритхъухьагъэмкIэ, ащ ыуж щэбзащэхэмкIэ заушэтыщт, — къыIуагъ къэлэ спорт Комитетым итхьаматэу Дмитрий Щербаневым.
Зэнэкъокъум хэлэжьагъэхэм щэрыонымкIэ IэпэIэсэныгъэ дэгъу къагъэлъэгъуагъ. Апэрэ чIыпIэр зыфагъэшъоша­гъэм очко 50 къыриутыгъ. Тыжьын ыкIи джэрз медальхэр къэзыхьыгъэхэр а пчъагъэм бэкIэ ыуж къинагъэхэп.
ХагъэунэфыкIырэ чIыпIэхэр къыдэзыхыгъэхэм шъолъыр фондым къафигъэ­хьазырыгъэ медальхэр, щытхъу тхылъхэр ыкIи шIухьафтынхэр аратыгъэх.
Iэшъынэ Сусан.