«Хэгъэгум иухъумакIо ян» зыфиIорэ меда­лыр Кореновскэ район администрацием ипащэ бэмышIэу къыфигъэшъошагъ Тыу Марьянэ.

Ащ икIалэу Замир хэушъхьафыкIыгъэ дзэ операциер зы­рагъэжьагъэм къыщыублагъэу къулыкъур ехьы. Хэти илъфыгъэ икIалэ мэшIошхом пигъэ­хьанэу фэещтэп, Замир яни ахэм ащыщ. ИкIалэ иIофшIэн зыфэдэр къыгурэIоми, къулыкъум къэтыфэ мэгумэкIы.
— СикIалэ ыцIэкIэ тын лъапIэ къызэрэсфагъэшъошагъэр лъэшэу сигуапэ хъугъэ. Сыгуи зэхигъэхьагъ, ау етIани кIалэм ихьатыркIэ сыкъызэрэхагъэщыгъэм сигъэгушIуагъ. ЗикIалэ къулыкъу зыхьыхэрэм зэкIэми сафэлъаIо ахэм псаоу къагъэзэжьынхэу, ны-тыхэм гумэкI зыфаIорэр амышIэнэу, мамыр щыIакIэ тиIэнэу, — къыIуагъ Замир янэ.
Марьянэ къызэриIуагъэмкIэ, хэушъхьафыкIыгъэ дзэ операциер зырагъэжьагъэм къыщыублагъэу ежьми, ышыпхъуитIумэ якIалэхэри мыщ щыIэх. Ставрополь дэт авиационнэ инженер училищыр икIалэ къызеухым, практикэ агъакIуи Благовещенскэ, Темырым ащылэ­жьагъ. Джащ фэдэу Шам, Чэ­чэным командировкэ пчъагъэрэ ащы­Iагъ. ИшэнкIэ цIыф псынкI, зэ­кIэмэ апэ итын фае, хэгъэгур къыухъумэныр ипшъэ­рылъ шъхьа­Iэу зыфелъэгъужьы.
ДзэкIолIэу ущытыным фэшI лIыхъужъныгъэ ыкIи лIыблэнагъэ пхэлъын фае. Зихэгъэгу фэшъыпкъэу, къыткIэхъухьэрэ ныбжьыкIэхэмкIэ щысэтехыпIэу ар щыт.

Замир зэрилъытэрэмкIэ, дзэ къулыкъушIэхэм пшъэрылъ ­шъхьаIэу яIэр я Хэгъэгу къау­хъумэныр, зыщыщхэм, зыфэдэ цIыф лъэпкъхэм ямылъытыгъэу мамыр цIыфхэр къагъэгъунэнхэр ары. Ар ицIыкIугъом къыщыублагъэу дзэм фэгъэхьыгъэ фильмхэм яплъыныр, тхылъхэм яджэныр икIасэу къэтэджыгъ ыкIи гурыт еджапIэм чIэсызэ ышIэщтыгъ ищыIэныгъэ дзэм зэрэрипхыщтыр. ЕджапIэр къы­зеухым, ыгу джэнджэш къимыхьэу Ставрополь апшъэрэ дзэ авиационнэ инженер училищэу маршалэу В. А. Судец ыцIэ зыхьырэм (дзэ институтым) чIэхьагъ. 2008-рэ илъэсым ар къызеухым, Амурскэ хэкум ит поселкэу Серышевым къулыкъур щихьынэу агъэкIуагъ, ТУ-95 МС-м исэу шъолъырыр къыбыбыхьагъ.
2015-рэ илъэсым Краснодар краим ит къалэу Кореновскэ къащэжьыгъ, я 55-рэ хэушъхьафыкIыгъэ вертолетнэ полкым къулыкъур щихьыгъ. Замир Шам (Сирием) щыкIогъэ зэпэуцужьым хэлэжьагъ. ПшъэдэкIыжьышхо зыпылъ Iофым лIыблэнагъэ зэрэщызэрихьагъэм фэшI УФ-м зыкъэухъумэжьынымкIэ и Министерствэ медалэу «Шам щы­кIогъэ зэпэуцужьым хэлэжьагъ» зыфиIорэр къыфигъэшъошагъ. Джащ фэдэу медалэу «За боевое отличие» ыкIи «За воинскую доблесть» зыфиIорэм я 2-рэ шъуашэ зиIэр къыратыгъэх.
ХэушъхьафыкIыгъэ дзэ операциер зыщыкIорэ апэрэ мафэм къыщыублагъэу Замир щытхъу хэлъэу къулыкъур ехьы, непэ къызнэсыгъэм дзэ пшъэ­рылъэу къыфагъэнэфагъэхэр дэх имыIэу егъэцакIэх. Ащ къызэрэтиIуагъэмкIэ, ипшъэ­рылъхэм ахэхьэ авиационнэ техникэм игъэцэкIэжьын. Вертолетхэм ятехническэ зытет лъэплъэ. Апэрэ кIогъум илъэсныкъорэ къэтыгъ, нэужым къа­гъэкIожьи мэзитIурэ зигъэпсэфыгъ. Джыри бэшIагъэп къы­зыкIожьыгъэр, зызэблахъузэ ашIы, мэзитIу зытешIэкIэ ыгъэ­зэжьыщт.
— Пшъэрылъэу къагъэуцу­гъэм изэшIохын ренэу уфэхьазырын фае, — еIо Замир.
Iоф мыпсынкIэр ыгъэцакIэзэ, и Хэгъэгу ыкIи мамыр цIыфхэр къэзыухъумэхэрэ Замир къыгурэIо иунагъо, янэ-ятэхэр ыкIи исабыйхэр ренэу къызэрэпаплъэхэрэр, къызэре­жэхэрэр. Замиррэ ишъхьэгъу-­сэу Заремэрэ сабыищ зэдапIу. НахьыжъитIур кIэлэцIыкIу IыгъыпIэм макIох. ИкIалэхэр ятэ рэгушхох ыкIи ащ фэдэу хъунхэу фаех. Тымрэ нымрэ якIалэ лъагъоу къыхихыгъэм дырагъаштэ, ащ рэгушхох ыкIи хэткIи ар щысэтехыпIэ хъунэу мэгугъэх.
КIАРЭ Фатим.