Гъогухэм ягъэцэкIэжьын рагъэжьагъ
«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу 2024-рэ илъэсымкIэ Адыгеим щагъэцэкIэжьыщтхэм IофшIэнхэр ащырагъэжьагъэх.
Къалэу Мыекъуапэ къэзыухьэрэ гъогум щыщ Iахьэу километри 2,3-рэ хъурэм игъэкIэжьын апэу зыуж ихьагъэхэр. 2009-рэ илъэсым ар ашIыгъагъ, гъэцэкIэжьынхэр ищыкIэгъагъ. Ащ Мыекъуапэ икIэу къалэхэу Лэбапэрэ ТIуапсэрэ якIолIэрэ гъогуитIур зэрэзэрипхырэр къыдалъыти, хы ШIуцIэ Iушъом зыщызгъэпсэфыщтхэм яуахътэ къемыжьэзэ фежьагъэх.
Мы Iахьыр гъогушI гъэIорышIапIэу
N 3-м егъэцэкIэжьы. Техникэ зэфэшъхьафэу 9 рифылIагъ. ХъызмэтшIапIэм ежь къыдигъэкIырэ асфальт-бетон зэхэгъэкIухьагъэр егъэфедэ. Ащ Iофхэр нахь къегъэпсынкIэх.
Гъогу гъунэхэри подрядчикым зэригъэфэщтых, нэужым тамыгъэхэр ыгъэуцущтых, зыщищыкIагъэм щигъэтхъыщтых. ГъэцэкIэжьын IофшIэнэу мы гъогу Iахьым щызэшIуахыщтхэм пстэумкIи сомэ миллион 69-рэ апэIухьащт.
Шъугу къэтэгъэкIыжьы, «Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу мыгъэ шъолъыр мэхьанэ зиIэ гъогу Iахь 17 республикэм щагъэцэкIэжьыщт. Ахэр зэкIэ къэкIощт 2025-кIэ агъэнэфэгъагъэхэм ащыщых.