НыбжьыкIэхэм патриотизмэр ахэлъхьэгъэ­ным гъэсэныгъэм иучреждениехэр ыкIи об­щественнэ организациехэр кIэщакIо афэхъух.

Мыекъопэ къэралыгъо технологическэ университетымрэ Пшызэ къэзэкъыдзэ обществэм икъутамэу Мыекъуапэ щыIэмрэ зэзэгъыныгъэм зэдыкIэтхагъэх.
Урысыем идзэ-патриотическэ шэн-хабзэхэм зягъэушъомбгъугъэнымкIэ ыкIи студентхэм дзэпатриотическэ пIуныгъэ икъу ягъэгъотыгъэнымкIэ шIуагъэ къэзытырэ зэдэлэжьэныгъэр мы зэзэгъыныгъэм къыделъытэ.
Зэхэсыгъор зэрищагъ МКъТУ-м иректорэу Къуижъ Саидэ. Ащ хэлэжьагъэх Мые­къопэ къэзэкъ обществэм иата­манэу, есаулэу Сергей Захаровыр, ныбжьыкIэ политикэмкIэ апшъэрэ еджапIэм ипроректорэу БрантI Мурат, Урысые обществэу «ШIэныгъэм» иреспуб­ликэ къутамэ ипащэу Галина Измайловар, чIыдэгъэ IофхэмкIэ МКъТУ-м икафедрэ идоцентэу, техническэ шIэныгъэхэмкIэ кан­дидатэу Николай Старковыр.
Зэзэгъыныгъэм аIапэ кIа­дзагъ МКъТУ-м иректорэу Къуижъ Саидэрэ Мыкъопэ къэ­зэкъ об­ществэм иатаманэу, есаулэу Сергей Захаровымрэ.
Студентхэм ядзэ-патриотическэ пIуныгъэ шIэныгъэ-методическэ екIолIакIэ къыфэгъоты­гъэныр зэзэгъыныгъэм иIахьхэм ащыщ. Къэралыгъом ищынэ­гъончъагъэ, ухъумэкIо къулы­къухэм ныбжьыкIэхэр ахэщэ­гъэнхэм зэзэгъыныгъэр афэIорышIэщт.
Тренингхэр, лекциехэр, практическэ IофшIэнхэр студентхэм афызэхащэхэзэ ашIыщт, гражданскэ пшъэдэкIыжьэу яIэм щагъэгъозэщтых, нахь чанэу об­ществэм ищыIакIэ хагъэлэ­жьэщтых.
Ащ фэшъхьафэу, бгъуитIумэ язэхэт проектхэр зэрагъэцэ­кIэщтхэм тегущыIагъэх, псауныгъэм икъэухъумэн ыкIи физиче­скэ культурэм ямэхьанэ къызэ­раIэтыщтым дэлэжьэщтых. Зэ­зэгъыныгъэм къыдыхэлъытагъэу зэнэкъокъу зэфэшъхьафхэр зэ­хащэщтых, дзэ ыкIи спорт лъэпкъ заулэхэмкIэ гъэцэкIэнхэр рагъэкIокIыщтых.
Зэзэгъыныгъэм диштэу апэрэ Iофтхьабзэу къэзэкъ классмэ арысхэр ыкIи къэзэкъ ныбжьыкIэхэр зыхагъэлэжьагъэхэр Мыекъопэ къэралыгъо технологическэ университетым пчъэ зэIухыгъэхэм я Мафэу зэхащэгъагъэр ары.