ТекIоныгъэшхом ия 79-рэ илъэс фэгъэхьыгъэ Урысые Iофтхьабзэу «ШIэжьым ичъыгхат» зыфиIорэм Адыгеир ­хэлэжьагъ.

Ащ къыдыхэлъытагъэу къэлэ администрацием иунашъокIэ бзыф чъыг 44-рэ Мыекъопэ къэлэ паркым щагъэтIысхьагъ. Iофтхьабзэм хэлэжьагъэх муниципальнэ гъэпсыкIэ зиIэ «Къалэу Мыекъуапэ» иадминистрацие ипащэу Геннадий Митрофановыр, АР-м и Къэралыгъо Совет — Хасэм и Тхьаматэ игуадзэу, УФ-м и ЛIы­хъужъэу Цэй Эдуард, респуб­ликэм мэзхэмкIэ и ГъэIорышIапIэ, фондэу «Хэгъэгум иухъумакIохэр» зыфиIорэм и Адыгэ шъолъыр къутамэ ялIыкIохэр, «Урысыем илъыхъон зэхахьэ» республикэмкIэ икъутамэ хэтхэр, волонтерхэр.

— Илъэс къэс фэдэу мыгъи Урысые Iофтхьабзэм тыхэлажьэ. АщкIэ Хэгъэгу зэошхом хэкIодагъэхэм яшIэжь тэгъэлъапIэ. Гукъау нахь мышIэми, ветеранхэм япчъагъэ гъэ къэс хэкIы. Непэ Мыекъуапэ ахэм афэдэу нэбгырэ 18 щыпсэурэр. Ахэм анэмыкIэу хэушъхьафыкIыгъэ дзэ операцием хэкIодагъэхэри мы мафэм тыгу къэтэгъэ­кIы­жьых, — къыIуагъ къалэу Мые­­къуапэ имэрэу Геннадий Митрофановым.
ЗэхэщакIохэм къызэраIуа­гъэмкIэ, къэлэ гупчэ паркым икъокIыпIэ лъэныкъо чъыгыкIэхэм афэныкъуагъ. Ащ елъытыгъэу, Гагариным ыцIэ зы­хьырэ урамымкIэ укъикIымэ, дэхьагъум ылъэныкъуитIу бзыф чъыгхэмкIэ агъэдэхагъ. Джащ фэдэу чъыгыкIэхэм ягъэтIыс-
хьан къалэм инэмыкI чIыпIэхэми ащылъагъэкIотэщт. ПстэумкIи бзыф чъыги 150-рэ Мые­къуапэ кIэу къыдэхъощт.

— Мыщ фэдэ Iофтхьабзэхэм сэркIэ мэхьанэшхо яI. Хъу­гъэ-шIагъэу блэкIыгъэр угу къэбгъэ­кIыжьынымкIэ, лIыгъэ зезы­хьагъэхэм яфэшъошэ шъхьэ­кIафэ афэпшIынымкIэ ахэр амалышIух. Сигуапэу сыхэлэ­жьагъ. Тэ зэрэтхахъорэм дакIоу чъыгхэми заубгъущт, — къыддэгощагъ псэупIэу Краснооктябрьскэм игъэсэныгъэ гупчэ иеджэпIэ мэз­хъызмэтшIапIэ хэт Нэпсэу Миланэ.
Шъугу къэдгъэкIыжьын, «ШIэ­жьым ичъыгхат» зыфиIорэ Iоф­тхьабзэр УФ-м и ЛIышъхьэу Владимир Путиным иунашъокIэ 2020-рэ илъэсым къыще­гъэжьагъэу къэралыгъом щы­зэхащэ. Пшъэрылъ шъхьаIэр чъыг миллион 27-рэ Урысыем щагъэтIысхьаныр ары. Ащ ишIуа­гъэкIэ Хэгъэгу зэошхом хэкIо­дэгъэ ыкIи джырэ хэушъхьафыкIыгъэ дзэ операцием щыфэ­хыгъэ нэбгырэ пэпчъ яшIэжь агъэлъэпIэщт.
Анцокъо Ирин.