АР-м и Лъэпкъ театрэ «Шъузабэхэр» зыфиIорэ къэгъэлъэгъонэу ыгъэуцу­жьыгъэм илъэтегъэуцо пчыхьашъхьэ сыхьатыр 7-м Пушкиным ыцIэ зыхьырэ унэм къыщигъэлъэгъощт.

РСФСР-м изаслуженнэ, АР-м инароднэ артистэу, актерэу ыкIи драматургэу Мурэтэ Чэпай ипьесэ ар техыгъ ыкIи авторыр къызы­хъугъэр илъэс 85-рэ зэрэхъурэм ехъулIэу агъэуцужьыгъ. Режиссерыр — УФ-м ыкIи АР-м янароднэ артистэу Зыхьэ Заурбый.
— Зэо-банэм тхьамыкIагъо нэмыкI зи къыздихьырэп. ШIэжьыр гум елъыфэ а лъэхъаныр цIыфхэм ащыгъупшэщтэп. Гукъау нахь мы­шIэми, ар джырэ уахътэми зэ­хэтэшIыкIы, — хегъэунэфыкIы спектаклэр зыгъэуцужьыгъэ режиссерым. — Къэгъэлъэгъоным зэхъокIыныгъэу фэсшIыгъэхэм ащыщ Чэпай къэгъэлъэгъон едзыгъохэм пэублэхэр къафишIызэ сценэм къызэрэтезгъахьэщтыгъэхэр джы экраным итэу, тетхагъэу щыIэр дгъэфедэнышъ, спектаклэм къызэрэхэзгъэуцорэр. Джащ фэдэу сыгу къэкIыгъ.
Унэ зэхэтэкъуагъэ сценэм тетыщт заом цIыфхэм къафихьырэр нэрылъэгъоу. ЗэхашIэ инхэр мы къэгъэлъэгъоным къегъэущых, цIыф­хэм къинэу алъэгъугъэм, ушэтыпIэу зыпхырыкIыгъэхэм якъэгъэлъэ­гъуапI. Къэгъэлъэгъоныр цIыфхэм шIухьафтын ыкIи гукъэкIыжь афэ­хъунэу сыфай. Театральнэ IофышIэ­хэм я СоюзкIэ шIэжь пчыхьэзэха­хьэхэр тшIынхэ фае. Арышъ, Му­рэтэ Чэпай ипьесэ зэрэдгъэуцурэм мэ­­хьанэшхо есэты, — къыфиIотагъ «Адыгэ макъэм» Зыхьэ Заурбый.
Театрэр шIу зылъэгъухэрэр зэкIэ пчыхьашъхьэ къэгъэлъэгъоным рагъэблагъэх.
Тэу Замир.