Iахьзэхэлъ обществэу «Ростелеком» зыфиIорэм Адыгеим ыкIи Краснодар краим яжурналистхэм пресс-тур афызэхищагъ. ИкIыгъэ илъэсым Iофэу ашIагъэм изэфэхьысыжьхэм ар афэгъэхьыгъагъ.

2023-рэ илъэсым Адыгэ Республикэм щыпсэурэ унэгъо мини 7-м ехъумэ ыкIи культурнэ учреждение 86-мэ интернетыр «Ростелекомым» афырищагъ. Компанием итехническэ IофышIэхэм километрэ мин 1,5-м ехъурэ хъытыу инфраструктурэ республикэм щагъэпсыгъ, ащ щыщэу километри 120-р — 2023-рэ илъэсым.
— Телекоммуникационнэ фэIо-фашIэхэм ябэдзэр Адыгеим зэрэщыгъэпсыгъэр фэтэрыбэу зэхэт унэхэм анахьи чIылъэ унэхэр нахьыбэу интернетым къызэлъегъэубытыгъэнхэр ары. Арышъ, цIыфхэм зыпкъ ит ыкIи псынкIэу зекIорэ интернетым зыпашIэным иамал ягъэгъотыгъэным мэхьанэ иI. Мыщ­кIэ оптическэ рыкIуапIэхэр гъэпсыгъэнхэм социальнэ екIолIакIэу тикомпание фыриIэм ишIуагъэ къэкIо, — къыIуагъ ПАО-у «Ростелекомым» икъутамэу Краснодар краим щыIэм АР-мкIэ ипащэ игу­а­дзэу Бжьэмыхъу Азэмат.
Журналистхэм зекIозещэ афэхъугъ ПАО-у «Ростелекомым» АдыгеимкIэ исервиснэ гупчэ ипащэу Александр Пи­саренкэр. Интернетыр зиIэ хъугъэ чIыпIэхэр ащ къаригъэлъэгъузэ, цIыфхэмкIэ мэхьанэ зиIэ Iофэу ашIагъэр къыIотагъ.

Апэрэ чIыпIэр хьылъэзещэ автомашинэхэр зыщащэчырэ пунктэу поселкэу Тульскэм дэтыр ары.
«Хьылъэзещэ автомашинэхэр зыщащэчыщт псэолъитIу Красногвардейскэ районым щашIыгъ. Мыекъопэ ыкIи Джэджэ районхэм псэолъэ зырыз ащызэтырагъэпсыхьагъ. Лъэпкъ проектэу «Щынэгъончъэ ыкIи шэпхъэшIухэм ади­штэрэ гъогухэр» зыфиIорэм къызэрэщыдэлъытагъэу ахэр ашIыгъэх. «Ростелекомым» интернет псынкIэу арищэлIагъэм ыкIи видеокамерэу атыригъэуцуагъэхэм яшIуагъэкIэ гъогурыкIоным ишапхъэхэр зыукъо­хэрэр псынкIэу къыхегъэщых», — хигъэунэфыкIыгъ А. Писаренкэм.
Гъогу хъызмэтымкIэ Министерствэм илIыкIоу Валерий Кулагиным къызэриIуа­гъэмкIэ, Iахьзэхэлъ обществэу «Ростелекомым» проектэу ыгъэцэкIагъэм ишIуагъэкIэ хьылъэзещэ автомобилышхохэм ящэчалъэ уахътэм диштэу шIыгъэ. Непэ республикэм игъогухэм япроцент 55-р шапхъэхэм атетых. Ар Адыгеим зекIоным зыщиушъомбгъуным, тиреспуб­ликэ гъэпсэфыпIэу къыхэзыхыхэрэм гъогу инфраструктурэр Iэрыфэгъу афэхъуным атегъэпсыхьагъэу зэшIуахырэ IофшIэнхэм ащыщ.
ЯтIонэрэ чIыпIэр искусствэ­хэмкIэ кIэлэцIыкIу еджапIэу поселкэу Тульскэм дэтыр ары.
АР-м культурэмкIэ иминистрэу Аулъэ Юрэ хигъэунэфыкIыгъ:
«Iахьзэхэлъ обществэу «Ростелекомым» ипро­екткIэ культурэм епхыгъэ объектхэм интернет арищэлIагъ: тхылъеджапIэхэм, культурэм иунэхэм, музейхэм. Псэолъэ 86-м интернетым 50 Мбит/с ипсынкIагъэу яIэ хъугъэ. Проектым игъэцэкIэн къыдыхэлъытагъэу километри 10 зикIыхьэгъэ линиер еджапIэм ращэлIагъ».
ЕджапIэм ипащэу ГъукIэлI Батыр:
«ЕджапIэмкIэ мэхьэнэ ин зиIэ Iофышхо «Ростелекомым» ышIагъ, видеолъыплъэныр зэтыригъэпсыхьагъ, интернет псынкIэр къытIэкIигъэхьагъ. ЦIыфмэ ящыIакIэ непэрэ уахътэм диштэным, цифрэ шIэныгъэм хэгъэхъогъэным мыщ иIахьышIу зэрэхишIыхьагъэм ишыхьат Iофэу агъэцэкIагъэр».
Ящэнэрэ чIыпIэр Лэгъо-Накъэ уезы­щэлIэрэ гъогум ыбгъукIэ Iут гъэпсэфыпIэ чIыпIэу, «Экофермэу» зипчъагъэкIэ бэ мыхъурэ псэушъхьэхэр зыщаIыгъхэр ары. Ащ иIофышIэу Мария Овчаренкэм тыщигъэгъозагъ:
«Мы организацием ишIуагъэкIэ интернет псынкIэр тиIэ хъугъэ. Псэушъхьэхэр зыдэт Iэщ пэпчъ видеокамерэ тет, Iэпы­Iэгъу зищыкIагъэ хъурэ псэ­ушъхьэм тишIуагъэ псынкIэу едгъэкIын амал тиI. «Экофермэм» иIофышIэхэм экскурсие гъэшIэгъонхэр зэхащэх. Мыщ хэти зэщыгъо къыщекIурэп».
Нэужым интернетыр зэращэгъэ къо­джэ псэупIэхэу Мыекъопэ районым итхэм зэхэтхэу кIуагъэх.
ЗекIо купыр яплIэнэрэ чIыпIэу къызыщыуцугъэр поселкэу Цветочнэм игупч. А. Писаренкэм къызэриIуагъэмкIэ, интернет рыкIуапIэу жъы хъугъэхэр непэрэ шапхъэхэм адиштэхэрэмкIэ зэблахъу­гъэх. Унагъохэм интернетыр аIэкIагъэхьагъ. Iофтхьабзэу зэрахьэрэм нахь зызэрэрагъэушъомбгъущтым щыгъуазэ тишIыгъ.

Адыгеим ижурналистхэр поселкэу Каменномостскэм игупчэ зэхэщакIохэм рагъэблэгъагъэх, чIыпIэ администрацием ипащэ игуадзэу Андрей Шлюпкиным къыIотагъ «Ростелекомым ишIуагъэкIэ зэхъокIыныгъэу яIэ хъугъэхэр:
«Типоселкэ фэдэ цIыкIум удэсэу, дунаим щыхъурэ-щышIэ­рэм упэчыжьэу упсэуныр псын­кIагъоп. Джы интернет псын­кIэ тиIэ зэрэхъугъэм ишIуагъэ­кIэ а щыкIагъэр дэгъэзыжьыгъэ хъугъэ. Официальнэ тхылъ горэхэр дгъэпсыщтхэми, Мые­къуапэ тымыкIоу джы тшIы­шъущт. Ащ пае къэралыгъо фэIо-фашIэхэм япортал дгъэфедэн тлъэкIыщт. Непэ амалыкIэу тиIэ хъугъэм типсэупIэ ищыIэныгъэ шэпхъакIэхэм атырищэщт. «Ростелекомым» ишIуагъэкIэ видеокамери 6 паркым дагъэуцуагъ, цIыфхэм интернет псынкIэр агъэфедэн амал къаратыгъ. ЕджакIохэр пэIудзыгъэ шIыкIэм тетэу еджэнхэ алъэкIы».
Поселкэм щыпсэурэ унагъоу интернет псынкIэр зыIэкIагъэхьэгъэ Александр Скороходовым ащ шIуагъэу къыхьырэр къыIотагъ, «Ростелекомым» зэрэфэразэр къыхигъэщыгъ.
Iахьзэхэлъ обществэу «Ростелекомым» гъэпсэфыпIэ чIыпIэу «Белая река» зыфиIорэм интернет псынкIэр нигъэ­сыгъ, унэ пэпчъ камерэ ригъэуцуагъ.
Iофтхьабзэм икIэщакIо зэрэхигъэунэфыкIыгъэмкIэ, Адыгеим иунэгъо мини 10-м мы илъэсым интернет псынкIэр аIэкIагъэхьанэу рахъухьагъ.
ЩынэгъончъэнымкIэ амалхэр икъоу зехьэгъэнхэм пае интернет псынкIэ аIэкIэгъэхьэгъэным фэIорышIэрэ проектышхо компанием щыIэныгъэм щыпхырещы.
Лъэпшъыкъо Фатим.