Мы илъэсым игъэтхапэ зимылъку чIэзынэгъэ нэбгырэ 91-мэ Адыгеим иполицие зыкъыфагъэзагъ, пэIудзыгъэ шIыкIэм тетэу зэрагъэпцIагъэхэр ахэм къаIуагъ. Джащ фэдэ шIыкIэкIэ бзэджашIэхэм нэбгырэ 49-рэ — Мыекъуапэ, 14 — Тэхъутэмыкъое районым, нэбгыри 10 — Мыекъопэ районым ащагъэпцIагъэх.

НахьыбэрэмкIэ ямынэIосэ цIыфхэр къафытеохэзэ, ямылъку счет «щынэгъончъэм» рагъэхьан фаеу къараIощтыгъ. Джащ тетэу агъэплъэхъугъэ нэбгырэ 25-мэ сомэ миллион 13 чIэнагъэу ашIыгъ.
ЗэкъодзакIохэм нэмыкI бзэджэшIагъэхэри зэрахьагъэхэу къыхагъэщыгъ. БзэджашIэхэм зарагъэгъэдели, респуб­ликэм ис нэбгырэ 14-мэ яахъщэ онлайн-биржэ зэфэшъхьафхэм «аIэкIагъэхьагъ», товархэр маркетплейсхэм къащащэфыхэзэ, яхахъо нахьыбэ ашIы­нэу ахэр гугъэщтыгъэх. Ау къызэрэчIэкIыжьыгъэр нэмыкI шъыпкъ, ахэм чIэнагъэу сомэ миллиони 8-м ехъу арагъэшIыгъ.
Республикэм щыщ нэбгыритIумэ банкхэм къаIахыгъэ чIыфэхэр амышIэрэ счетхэм зэрарагъэхьагъэр, сомэ миллиони 4-м ехъу чIэнагъэу зэрашIыгъэр къаIотагъ.
Джащ фэдэу нэбгырэ 28-рэ онлайн сайтхэм ащагъэпцIагъэх. Сатыу онлайн-платформэхэм товар зэфэшъхьаф­хэр къащащэфэу, фэIо-фашIэхэм ауасэ ащатэу къашIошIызэ, сомэ миллиони 3 ашIокIодыгъ.
Нэбгыри 6-мэ къызэраIотагъэмкIэ, бзэджашIэхэр ахэм янэIуасэхэмрэ яIахьылхэмрэ яаккаунтхэм арыхьэхи, ящыкIэгъэ къэбархэр къызIэкIагъэхьагъэх. ЯнэIуасэхэм е яIахьылхэм IэпыIэгъу афэхъухэу къашIошIызэ, амы­шIэрэ счетхэм сомэ мин 300-м ехъу арагъэхьагъ. ЯIахьыл благъэхэм уголовнэ пшъэдэкIыжь арагъэхьын фэдэу къызыщагъэхъугъэ нэбгыри 3-мэ сомэ миллионым ехъу ашIокIодыгъ.
БзэджашIэхэм нэмыкI шIыкIэкIи цIыфхэр агъэпцIагъэх. Абонент номерым итариф ипIалъэ лъагъэкIотэщт фэдэу, банкым имобильнэ приложение бонусхэр къащаратынэу, пенсионерхэм компенсациехэр къаратынхэу, пхъэдзым щатекIуагъэхэу агурагъаIозэ, цIыфхэм ямылъку аIэкIахыгъ.
Мы илъэсым игъэтхапэ Адыгеим ис нэбгырэ 91-мэ полицием зыкъыфагъэ­загъ, сомэ миллион 32-рэ чIэнагъэу зэрашIыгъэр къаIотагъ.
Адыгэ Республикэм и МВД къэбархэмкIэ ыкIи общественнэ зэпхыныгъэхэмкIэ иотдел.