Космонавтикэм и Мафэ непэ Урысыем щыхагъэунэфыкIы. Адыгеим мэфэкIым мэхьанэшхо щыраты ыкIи мы лъэныкъомкIэ ныбжьыкIэхэм шIэныгъэ­хэр ягъэгъотыгъэнхэм щыдэлажьэх. ГущыIэм пае, сэнаущыгъэ зыхэлъ кIэлэцIыкIухэр къыхэгъэщыгъэнхэмкIэ шъолъыр гупчэу «Полярис-Адыгея» зыфиIорэм астрофизикэмкIэ ыкIи космическэ системэхэмкIэ илабораторие ишIуагъэкIэ ныбжьыкIэхэр космосым нэIуасэ фэхъух. Мы гупчэр къызызэIуа­хыгъэм щегъэжьагъэу космическэ шIэныгъэхэм язэгъэгъотын яегъэджэнхэм къадыхалъытагъэх. Ащ илъэныкъо зэфэшъхьафи 6 щыпхыращы.
«ДжырэкIэ псыкIэ дэбыбэерэ ракетэхэм яшIын ыуж тит. А лъэныкъомкIэ ушэтынхэри тшIыгъэх. Метри 8 — 10-кIэ дэдгъэбыбыенхэ тэлъэкIы. Джыри тыдэлажьэмэ, ащ хэдгъэхъон тлъэ­кIыщт, — къытфиIотагъ «Полярис-Адыгеям» астрофизикэмкIэ ыкIи космическэ системэхэмкIэ ялабораторие ипащэу Александр Шамбиным.
НыбжьыкIэхэр космосым пэблагъэ шIыгъэнхэм фэIорышIэх «Полярис Адыге­ям» зэхищэрэ Iофтхьэбзэ зэфэшъхьаф­хэр. ГущыIэм пае, мы мафэхэм кос­монавтикэм и Мафэ ипэгъокIэу гурыт еджапIэхэм дэкIыгъо зэхахьэхэр ащыряIэх. Ащ нэмыкIэу Iофтхьабзэу «Пчъэ зэIухыгъэхэм ямаф» зыфиIорэр гупчэм щыкIощт. ЯIофшIэн нахь благъэу нэIуасэ фашIыщтых. Хэт ышIэра космонавтикэм зищыIэныгъэ езыпхы зышIоигъохэр ныжьыкIэхэм къахэкIынхэкIи мэхъуба. АщкIэ Адыгеир зэрыгушхон иI. Инэм щыщ летчик-космонавтэу Анатолий Березовоир 1982-рэ илъэсым экипажым ипащэу космосым ихьагъ (жъоныгъуакIэм и 13-м — тыгъэгъазэм и 10-м), шIэ­ныгъэ-ушэтын къухьэу орбитэм итыгъэ «Союз-Т-5» быбыгъэ. «Эльбрус-1» цIэ тедзэу иIагъ. Космическэ пшъэрылъыр лIыгъэ хэлъэу зэригъэцэкIагъэм фэшI СССР-м и Апшъэрэ Совет иунашъокIэ «Советскэ Союзым и ЛIыхъужъ» зыфиIорэ щытхъуцIэр къыфагъэшъошагъ, Лениным иорденрэ «Дышъэ жъуагъу» зыфиIорэ бгъэхалъхьэмрэ къыратыгъэх.
Анцокъо Ирин.