Мэлылъфэгъум и 11-м чэщыр хэкIотагъэу Мыекъуапэрэ джащ фэдэу поселкэу Тульскэмрэ чIыгур зэращысысыгъэр бэмэ зэхашIагъ.

Европейскэ-средиземноморскэ сейс­мологическэ гупчэм зэригъэунэфы­гъэмкIэ, сыхьатыр 01.31-м чIыгусысыныр щыIагъ. Адыгеим имызакъоу, Краснодар краим ит къалэхэу Шытхьалэ, Псыфабэ, ТIуапсэ ыкIи станицэу Динскоим чIыгур ащысысыгъ, сысыгъэ чIыпIэм километри 10 фэдиз икууагъ, магнитудэр балли 4,3-рэ хъущтыгъ.
АР-м ошIэ-дэмышIэ IофхэмкIэ и Комитет ипресс-къулыкъу къызэритыгъэмкIэ, чIыгусысыныр анахьэу зэхэзышIагъэхэр Мыекъуапэрэ Тульскэмрэ ащы­псэухэрэр ары. Зыпари зэхикъутагъэп ыкIи зыми иягъэ ригъэкIыгъэп.
Адыгэ къэралыгъо университетым хэт «Центр интеллектуальных геоинформационных технологий» зыфиIорэм къызэрэщаIуагъэмкIэ, къушъхьэм къыпэблэгъэ чIыпIэхэм мыщ фэдэ чIыгусысыныр ащыхъу хабзэ. Мы мафэхэм щыIагъэм зыпари щынагъо къызыдихьыгъэп. Мыщ фэдэ чIыгусысынхэр мэхъу зэпыт, ау ахэр ренэу зэхатшIэхэрэп. Адыгеим щыпсэухэрэр ащ щыщынэнхэу ыкIи ыгъэгумэкIынхэу щытэп.
Экспертым къызэриIуагъэмкIэ, магнитудэр балли 5-м къыщегъэжьагъэу чIыгур зысысыкIэ ары узигъэгу­мэкIыщтыр.
КIарэ Фатим.