Культурэм иlофышlэхэр Адыгеим и Къэралыгъо филармоние щагъэ­шlуа­гъэх. Сэнэхьатым фэшъыпкъэу илъэс пчъагъэхэм lоф зышlэхэрэм къалэжьыгъэ къэралыгъо тынхэр АР-м и Лlышъхьэу Къумпlыл Мурат аритыжьыгъэх.

Ахэр театрэхэм, тхылъеджапlэхэм, культурэм иунэхэм яlофышlэх, творческэ купхэм яартистых, кlэлэ­егъаджэх. Пстэури респуб­ликэм икультурэ фэлажьэх, ащ хахъо ышlыным, ар лъыз­гъэкloтэщт лlэужыкlэхэм ягъэхьазырын мы­п­шъыжьэу пылъых.
«Культурэм непэ нэбгырэ 3200-м нахьыбэ щэлажьэ, — къыIуагъ АР-м культу­рэмкlэ иминистрэу Аулъэ Юрэ. — Ахэм къэралыгъо ыкlи район учреждениехэм lоф ащашlэ. Зэкlэри культурэр шlу зылъэгъурэ лэ­жьакlох».
Непэ мы лъэныкъом зэ­хъо­кlыныгъэшхохэр щэкlох. Культурэм иунэхэр, тхылъеджапlэхэр агъэцэкlэжьых, ахэр кlэу ашIых, яlофшlэнкlэ ящыкlагъэр арагъэгъоты. А пстэури Адыгеир зыхэлэ­жьэрэ программэ зэфэшъхьафхэм яхьатыр. АР-м и Лlышъхьэ игущыlэ къызэрэщыхигъэщыгъэмкlэ, блэкlыгъэ илъэс закъом культурэм хэхъоныгъэ ышIыным рес­публикэм сомэ миллиарди 2,5-м нахьыбэ щыпэIуагъэ­хьагъ.
«Культурэм хэхъоныгъэ ышlыныр къэралыгъом ипшъэ­рылъ шъхьаIэхэм ащыщ. Лъэпкъ проектхэм, «Единэ Россием» ипартийнэ программэхэм, грантхэм ятын яшIогъэшхо къэкIо. Аужырэ илъэситфым культурэм иунакIэу 10 Адыгеим щагъэуцугъ, 50-р игъэкIо­тыгъэу агъэцэкIэжьыгъ. Ис­кусствэхэмкIэ еджэпIи 9-р агъэкIэжьыгъ, модельнэ тхылъеджэпIэ 13-рэ кре­а­тивнэ индустриемкIэ еджэпIи 2-рэ тиIэ хъугъэх. Культурэм иунэ 28-рэ ыкIи музеи 6-рэ ящыкIэгъэ техническэ Iэмэ-псымэмкIэ зэтедгъэ­псыхьагъэх. Шъхьафэу шъо­лъыр учреждениехэм Iэпы­Iэгъу ятэгъэгъоты. Мы Iоф­шIэныр тапэкIи лъыдгъэкIо­тэщт, — къыщиIуагъ мэфэкI зэхахьэм АР-м и ЛIы­шъхьэу КъумпIыл Мурат. Нэужым ащ къыкIэ­лъыкIоу къэралыгъо тынхэр къэзылэжьы­гъэхэм ахэр ари­тыжьыгъэх. «АР-м инароднэ артист» зыфиIорэ щытхъуцIэр Хьа­къуй Ас­лъанрэ Лариса Денисовамрэ афагъэшъошагъ, АР-м изаслуженнэ артист хъугъэх Къулэ Алый, Хьа­къуй Ан­заур ыкIи Цэй Любовь. Джащ фэ­дэу респуб­ликэм ипащэ ирэзэныгъэ тхылъхэр къэ­зылэжьыгъэ­хэми зэхахьэм щаратыжьыгъэх. АР-м и Къэ­ралыгъо Совет — Хасэм и Тхьаматэу Владимир Нарожнэм культурэм иIофы­шIэхэм ащыщ­хэм щытхъу тхылъхэр афи­гъэшъошагъэх.
Анцокъо Ирин.
Сурэтыр: А. Гусев.