Къоджэ псэупIэхэм Iэрыфэгъу щыIакIэр ащыгъэпсы­гъэным фэшI республикэм щызэшIуахырэр макIэп. Гъо­бэкъое къоджэ псэупIэм хэ­хъоныгъэу ышIыгъэхэр «Адыгэ макъэм» нэрылъэгъу къыфэ-хъугъ.

Шъугу къэдгъэкIыжьын, Адыге­им щыпсэухэрэм ящыIакIэ нахьышIу шIыгъэным пае къуаджэхэм ясоциальнэ инфраструктурэ хэхъоныгъэ ышIынымкIэ, къоджэдэсхэмкIэ мэхьа­нэшхо зиIэ проектхэр пхырыщыгъэнхэмкIэ республикэм и ЛIышъхьэ пшъэрылъхэр къы­гъэнэфагъэх. Ахэр зэшIохыгъэ хъунхэм фэIорышIэрэ программэхэр тишъолъыр етIупщыгъэу щыпхыращых. Ащ ишыхьат мы аужырэ илъэсхэм Гъобэкъуае зэхъокIыныгъэу фэхъугъэхэр.
Iофхэм язытет, тапэкIэ гухэ­лъышIоу зыдаIыгъхэр къедгъэIотагъэх муниципальнэ образованиеу «Гъобэкъое къоджэ псэу­пIэр» зыфиIорэм ипащэу Тхьаркъохъо Азмэт. Мыр а IэнатIэм зыIухьагъэр илъэситIу нахь хъу­гъэп, ау Iофхэм хэшIыкI афы­римыIэу щытыгъэп, мы ад­министрацием чIыгум игъэфе­дэнкIэ иотдел Iутыгъ.
Ащ къызэриIуагъэмкIэ, муниципальнэ образованием Гъо­бэ­къуае нэмыкIэу джыри къутыр­хэу Шевченкэр, Петровыр ыкIи Чабановыр къыхеубытэх.
— Къоджэ псэупIиплIэу зэхэт­хэм щыIэкIэшIу ащыдгъэпсыныр типшъэрылъ шъхьаIэхэм ащыщ, ары ЛIышъхьэми къытфигъэнэфагъэр. АщкIэ программэ зэфэшъхьафхэм тахэлажьэ. Шъолъыр программэу «Iэрыфэгъу щыIэкIэшIу гъэпсыгъэныр» зыфиIорэм ишIуагъэкIэ Гъобэкъое культурэм и Унэ пэчIынатIэу парк цIыкIу щыдгъэпсыгъ. Ащ сомэ миллиони 6,3-м ехъу пэIухьагъ. Мыщ плиткэ зытедзэгъэ лъэсрыкIо гъогу пхырэкIы, кIэлэ­цIыку джэгупIэ щыгъэуцугъ, чъыгхэр къегъэтIысэкIыгъэх, тIы­сыпIэхэр дэтых, чIыпIэр къа­гъэнэфы, — хигъэунэфыкIыгъ Тхьаркъохъо Азмэт.
ТигущыIэгъу къызэрэхигъэщыгъэмкIэ, мыщ фэдэ парк Петровми щызэтырагъэпсы­хьагъ, джы ащ фэдэ къутырэу Шевченкэм дагъэуцоным ыуж итых.
Гъобэкъуае хэхъоныгъэу ышIыгъэхэм ащыщ физкульту­рэмрэ псауныгъэм игъэпытэнрэ атегъэпсыхьэгъэ парк цIыкIоу еджапIэм ыбгъукIэ щашIыгъэр. Бюджет зэфэшъхьафхэм къарыкIыгъэ сомэ миллион 23,2-м ехъу псэуалъэм тефагъ. Спорт джэгупIакIэу ашIыгъэм физкультурэмрэ спортымрэ апылъынхэмкIэ ящыкIагъэр зэкIэ ныбжьыкIэхэм щагъоты ыкIи цIыф кIуапIэ зэрэхъугъэр гущыIэгъу тызфэхъугъэхэми къыхагъэщы. Мыщ къыхеубытэх футбол, бас­кетбол зыщешIэщтхэ, тренажерхэр зэрыт чIыпIэхэр, къызщачъыхьан алъэкIыщт гъогухэр, кIэлэцIыкIухэм афытегъэпсы­хьэгъэ джэгупIэхэр зэрыт шъо­лъырыр. ДжэгупIэр тырагъэ­чъы­кIыгъ, искусственнэ алырэгъу ащ тырабзагъ, къашIыхьагъ, лъэс гъогоу екIуалIэрэм асфальт тыралъхьагъ.
Мы псэолъакIэхэм язытет къоджэ псэупIэм иIофышIэхэми, нахьыжъэу дэсхэми зэрафэ­лъэкIэу анаIэ атырагъэты. Зэхамыкъутэнхэу, уасэ афашIынэу, афэсакъынхэу кIэлэеджакIохэми, ныбжьыкIэхэми араIо.

Къоджэ псэупIэм ипащэ икIы­гъэ илъэсым ашIэгъэ IофшIэнэу зигугъу къышIыгъэхэм ащыщ Хэгъэгу зэошхом хэкIодагъэхэм ясаугъэтэу Гъобэкъуае дэтым къызэлъиубытырэ шъолъырым асфальт зэрэтыралъхьагъэр, къэхалъэу чылэгум итыр, къу­тырэу Шевченкэм футбол ешIапIэу дэтыр къызэрашIыхьа­гъэхэр.
Гъогухэм язытети мэхьанэ зиIэ Iофыгъохэм ащыщ. Гъогу шъхьаIэхэу псэупIэхэм апхырыкIыхэрэр «Адыгеяавтодорым» зэрепхыгъэхэм къыхэкIэу ащ къызэтырегъэпсыхьэх. Адрэхэм язытет гъэтэрэзыгъэныр муниципальнэ образованиехэм япшъэрылъ.
— Гъобэкъуае иурамхэу Лениным, Хьахъуратэм ацIэхэр зыхьыхэрэм километри 4, 5-рэ хъурэ ыкIи къутырэу Шевченкэм иурамэу Лениным ыцIэ зыхьырэм километрэ 1,5-рэ хъурэ лъэсрыкIо гъогухэр щашIыгъэх ыкIи къызэпагъэнэфыгъэх. Чылэ кIоцIым дэт урамхэм зэхэубытагъэу ягугъу къэпшIымэ, язытет дэеп, мыжъор атетэкъуагъ. Ом изытет елъытыгъэу машэхэр зафэхъухэкIэ, грейдер арытэ­гъакIо. Узымыгъэрэзэнэу щытыр икъоу къызэрэмынэфыхэрэр ары. АщкIэ дгъэнэфэгъэ IофшIэнхэм ар ахэдгъэуцуагъ. Пкъэу пэпчъ остыгъэхэр апытымылъэщтхэми, тIу-щы къыдафэу зыдгъэнэфхэкIэ, шIункIым хэтыжьыщтхэп, — къыIуагъ Тхьаркъохъо Азмэт.
Гъобэкъуае изэтегъэпсыхьан ежь къоджэдэсхэри ымыгъэгумэкIхэу щы­тэп. ГупыкIрэ лъэкIрэ зиIэ кIэлэ ныб­жьыкIэхэр зэхахьэхи къаугъоигъэ мылъкумкIэ тарихъ мэхьанэ зиIэ чIыпIэу «Шъхьал-псын» зыфиIорэм икIэ­рыкIэу псэ къыпагъэкIыжьыгъ.
— Мыщ щыпсэухэрэмкIэ сыдигъуи мы чIыпIэм мэхьанэ иIагъ. Ау аужырэ уахътэм ащ изытет дэй дэдэ хъугъагъэ. Къоджэдэсхэм аугъоигъэ мылъкумкIэ «Шъхьал-псынэр» зэтырагъэпсыхьажьыгъ, джыри ащ епхыгъэ IофшIэнхэр лъэкIуатэх, къэнагъэ щыIэп. Ащ къызэлъиубытырэ шъо­лъырыр плиткэкIэ агъэпкIагъ, жьау­пIэхэр щагъэуцугъ, псынэм узэрехыщт дэкIояпIэр мыжъокIэ гъэпкIагъэу дэхэ дэдэ ашIыгъ. Мы чIыпIэр ешхэпIэ-ешъо­пIэнэу арэп, жьы къабзэ къыщащэным, псы чъыIэ къаргъом щешъонхэм афытегъэпсыхьагъ, — къыхи­гъэщыгъ псэупIэм ипащэ.
Къихьэгъэ илъэсыкIэм гухэлъэу яIэхэм ар къащыуцугъ. Къоджэ парк цIыкIум лъыпыдзагъэу чылэгур зэрэзэтырагъэпсыхьащтыр ахэм ащыщ. Ащ пае проект гъэнэфагъэ агъэхьазыри, шъолъыр программэу «Инициативное бюджетирование» зыфиIоу 2024-рэ илъэсым телъытэгъэ зэнэкъокъум хэлэжьагъэх ыкIи текIоныгъэр къыдахыгъ. Миллиони 2 фэдиз респуб­ликэ бюджетым къафыхагъэкIыщт, процент 15-р (сомэ мин 300 фэдиз) къоджэ псэупIэм дэсхэм, предпринимательхэм къаугъоигъ.

— Мы проектым къыдыхэлъытагъэу гъобэкъое гупчэр джы зэтедгъэ­псыхьащт. Хъурэе теплъэ иIэу пчэгур идгъэчъыкIыщт, плиткэ тетыдзэщт, къэзыгъэнэфыщт пкъэухэр, тIысыпIэхэр идгъэуцощтых. Джащ фэдэу гъэ къэс ИлъэсыкIэм ипэгъокIэу пцIыкъ чъыгышхо тэщэфы, тэгъэкIэракIэ, джы лъапсэ иIэу щыдгъэтIысхьан гухэлъ тшIыгъэ. А зэпстэур къыддэхъунымкIэ IэпыIэгъу къытфэхъугъэхэм, къуаджэм инеущ ыгъэгумэкIырэ цIыфхэм зэкIэми «тхьашъуегъэпсэу» ясэIо, — хигъэунэфыкIыгъ Тхьаркъохъо Азмэт.
Къутырхэм язэтегъэпсыхьани лъэ­кIуатэ, Шевченкэм кIэлэцIыкIу джэгупIэ шIэхэу къыдэуцощт, Петровым дэт къэхалъэм икъэшIыхьан фежьэщтых. Ащ хэхьащт псэолъапхъэр къащэ­фыгъах.
Мы аужырэ илъэсхэм къэралыгъо программэхэм яшIуагъэкIэ къуаджэхэм ятеплъэ зызэрэзэрихъокIырэр тинэры­лъэгъу. Джащ фэд тыздэхьэгъэ къуа­джэу Гъобэкъуае итеплъи нахьышIум ылъэныкъокIэ зызэрэзэрихъокIырэр.
Iэшъынэ Сусан.