Псауныгъэм и Дунэе мафэ ихэгъэунэфыкIын къыдыхэлъытэгъэ урысые Iофтхьабзэу «Щы­Iэныгъэм екIурэ лъэбэкъу мини 10» зыфиIорэм Адыгеим щыпсэухэрэр хэлэжьагъэх.

ЦIыфхэм апкъышъол ыкIи япсауныгъэ агъэпытэным, физическэ культурэм ыкIи спортым апыщагъэхэм япчъагъэ хэгъэхъогъэным, лъэс зекIоным зегъэушъом­бгъугъэным ар афытегъэпсыхьэгъагъ.
Мыекъуапэ ипрофсоюз организиехэр къэзыгъэлъэгъогъэ командэ 66-мэ ялIыкIохэм Iофтхьабзэм зыщаушэтыгъ. Ахэм республикэ стадионэу «Зэкъошныгъэм» къыщырагъажьи Адыгеим икъэлэ шъхьаIэ игупчэ урамхэм атетхэу лъэбэкъу мини 10 къакIугъ.
— Iофтхьабзэм изэхэщакIохэм тафэраз. СыхьатитIум къыкIоцI тигъогу къэзэрэткIугъэм дакIоу, Мыекъуапэ ичIыпIэ дахэхэр джыри зэ зэдгъэлъэгъугъэх, ахэм тыгу къыдащэягъ, — къыIуагъ акцием хэлэжьэгъэ Лариса Пышнаям.
Iофтхьабзэм зыщызыушэтыгъэхэм янахьыбэр кIэлэ­цIыкIу IыгъыпIэхэм ыкIи еджапIэхэм аIутых. Ахэм ащыщхэм командэ тIурытIу къагъэлъэгъуагъ. Зэхэща­кIохэри, хэлэжьагъэхэри рыразэхэу зэхэкIыжьыгъэх.