Адыгэ Республикэм щыпсэурэ быслъымэнхэу лъытэныгъэ зыфэтшIыхэрэр!
ТичIыпIэгъу лъапIэхэр!
НэкIмэзэ лъапIэр зэришъухыгъэмкIэ, БирамымкIэ тышъуфэгушIо!
ЛIэшIэгъубэ хъугъэу Бирамым цIыфхэр фегъасэх агукIэ къэбзэнхэм, гукIэгъу ахэлъыным. Мыщ фэдэ мэфэ нэфхэм фэныкъохэм IэпыIэгъу афэхъунхэр, шIухьафтынхэр афашIынхэр, ягупсэхэмрэ яIахьылхэмрэ зэрагъэлъэгъунхэр, шхын IэшIукIэ гъунэгъухэр ахьэкIэнхэр хабзэ хъугъэ. А пстэуми мэхьанэшхо яI цIыфхэм агу шIу зэфилъынымкIэ, зэгурыIонхэмкIэ, зэрэлъытэнхэмкIэ. Ахэр зэгъунэ­гъушIу зэфыщытыкIэхэм, лъэпкъ, дин зэгурыIоныгъэм ягъэпытэни афэIорышIэх.
Лъэпкъэу къызыхэкIыгъэхэм ыкIи динэу алэжьырэм ямылъытыгъэу цIыф пстэуми Ислъам диным къыди­лъытэрэ хэбзэшIухэр – зэфагъэрэ гукIэгъурэ ахэ­лъынхэр, къапэблагъэр шIу алъэгъуныр, цIыфыгъэ ахэлъыныр — агъэ­лъапIэх. Ахэр джащ фэдэу урысые обществэм изыкIыныгъэ игъэпытэни фэIорышIэх.
Адыгеим щыпсэурэ быслъымэнхэми, республикэм ис цIыф пстэуми мы мэфэкI нэфым тафэлъаIо псауныгъэ пытэ, насып яIэнэу, шIоу щыIэр зэкIэ къадэ­хъунэу, IофышIоу рахьыжьэхэрэм гъэхъагъэхэр ащашIынхэу!
Бирамым унагъо пэпчъ гушIуагъорэ хъярырэ къыферэхь, Адыгеимрэ Урысыемрэ нахь зэтегъэпсыхьагъэ хъунхэмкIэ республикэм исхэр IофыкIэхэм къаферэIэт!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет —Хасэм и Тхьаматэу Владимир Нарожнэр