Быслъымэнэу дунаим тетхэм анахь агъэлъэпIэрэ мазэу НэкIмазэp ыкIэм фэкIуагъ. МэфэкI анахь шъхьаIэхэм ащыщэу Бирамыр мы илъэсым мэлылъфэгъум и 10-м хагъэунэфыкIы.

Бирамыр быслъымэн пстэухэмкIи мэфэкIышхоу щыт. НэкIмэзэ мазэу Алахьым КъурIаныр къызщыригъэхы­гъэм къыкIоцI цIыфхэм апкъышъолкIи агукIи загъэкъэбзагъ. Псапэ зэрашIэщтым, цIыфхэм гуфэбэныгъэ зэрапагъохыщтым пылъыгъэх. Бирам мафэм ахэм гукIэгъуныгъэу зэрахьагъэм хагъахъо, псэпэшIэныр лъагъэкIуатэ.
— Мы мэфэкIышхом къегъэлъагъо быслъымэн пстэухэмкIи цIыфыгъэ шапхъэхэм уатетэу узекIоным мэхьанэшхо зэриIэр. Ислъам диным ылъапсэхэм ащыщых гукIэгъур, шIушIэныр. Джащ фэдэ зекIокIэ дахэхэм, IофышIухэр ашIэнхэм цIыфхэр къафегъэущых, — къыIуагъ Гупчэ мэщытым иIимамэу Шъхьэлэхъо Ибрахьимэ. — Бирамыр мэфэкI гушIуагъоу щыт. Бирамым ыкIи НэкIмазэм Алахьталэм игъэгъуныгъэ алъегъэIэсы. ЦIыфхэр зэпыйхэми, зэшIужьынхэм, сымаджэхэм алъыIэсынхэм, псапэ ашIэным мы мафэр афэIорышIэ.
Бирам мафэр диныр зылэжьыхэрэм нэмазшIынымкIэ рагъажьэ. Ащ ини, цIыкIуи ухэлэжьэным псэпэшхо хэлъ.
— Бирам нэмазыр бэрэскэшхо пчэдыжьым сыхьатыр 8-м едгъэжьэщт, — еIо Iимамым. — Нэужым мэфэкI мафэр яIахьылхэм ягъусэхэу рахы. Къэхэлъэ кIоныр пшъэрылъэу диным къыIорэп, ау хабзэу къахэхьагъэшъ, макIох.
Джащ фэдэу тигущыIэгъу къыхигъэщыгъэхэм ащыщ нэкIыр тыухэу, неущ фэдэм Бирам зыхъукIэ, пчыхьэм зэчыр­хэр къапIохэмэ зэрэдэгъур. Бирам нэмазыр къэсыфэ Тхьэм уелъэIущт: «Алахьэу акбэр, Алахьэу акбэр, лаIилэхьэ Iилалахь. Алахьу акбэр, Алахьу акбэр, олилахьи альхьамд» (Алахьыр зэкIэми анахь ин, Алахьыр зы, ары щытхъур зиер).
Пегъымбарэу Мухьамэд къыIуагъ: «ЦIыфым НэкIмазэм гущыIэ мыхъунхэр ыIуагъэмэ, мыхъунхэр ышIагъэу щытмэ, фытырыр ытымэ зеукъэбзыжьы». Фытырыр Бирам нэмазыр рамыгъажьэзэ птын фае, ащ ыуж зыптырэм сэдакъэ мэхъу нахь, фытыр хъурэп. Ар отыфэ уинэкI кIэшIагъэу къэнэ, зыптырэ нэуж Алахьым уипсапэхэм ахегъахъо. Ашхынрэ зыщалъэнрэ щымыкIэрэ быс­лъымэн пстэуми фытыр сэдакъэр атынэу атефэ. Унагъом нэбгырэ пчъагъэу исым телъытагъэу ар аты. Адыгэ Республикэм ыкIи Краснодар краим ащыпсэурэ быслъымэнхэм я ДиндэлэжьапIэ зэригъэнэфагъэмкIэ, мыгъэ фытырыпкIэр зы нэбгырэм телъытагъэу сомэ 250-рэ. Нахьыбэ зиIэу, ипсэпэшIагъэ нахь хэзыгъахъо зышIоигъом сэдакъэу ытыщтыр нахьыбэ ышIын фит.
Дунаим тет быслъымэн пстэуми мэфэкI нэмазхэр мы мафэм мэщытхэм ащашIых, НэкIмазэр зэраухыгъэмкIэ зэфэгушIох. Янэ-ятэхэм, яIахьылхэм адэжь макIох, шIухьафтынхэмкIэ кIэлэцIыкIухэр агъэгушIох. Джащ фэдэу сымаджэхэм акIэупчIэнхэ, тхьамыкIэхэм алъыплъэнхэ, шIушIэным зыратын фае. Ислъам къэралыгъо пстэухэмкIи Би­рамыр зыгъэпсэфыгъо мафэу щыт быслъы­мэнхэр зэIукIэнхэ, мэфэкI Iанэм пэсынхэ, агукIэ загъэпсэфын алъэкIыным пае.
Быслъымэн пстэуми Тхьэм Бирам мафэ тытырегъахь!
КIарэ Фатим.