Шэуджэн районым ит къуаджэу Мамхыгъэ идинлэжьхэм мы мазэм шIушIэ Iофтхьабзэхэр рагъэкIокIыгъэх. Алахьталэм ирэзэныгъэ щыгугъыхэу анэкIыгъ.

Мамхыгъэхэм яефэндэу Хьагъундэкъо Азэмат лъы­тэныгъэ зыфашIырэ, гулъытэрэ гукIэгъурэ къызэбэкIырэ цIыф. Губзыгъэу къэбар гъэшIэгъоныбэ къеIуатэ, Къур­Iаным еджэ, 2010-рэ илъэсым Чабэм щыIагъ, Ислъам диным хэшIыкIышхо фыриI. Ефэндыр упчIэжьэгъу амышIэу, къуаджэм дин Iофыгъо зыпари щырагъэкIокIырэп, ащ епхыгъэ Iофтхьабзэхэри ыгу етыгъэу егъэцакIэх.
БэмышIэу ар гущыIэгъу зытэшIым, НэкIмазэм имэхьани, шIуагъэу ащ пы­лъы­ри IупкIэу къытфиIотагъ.
Ащ къызэриIуагъэмкIэ, тызыхэт щыIакIэр зыфэ­дэр, ныбжьыкIэхэр шIум фэузэнкIыгъэнхэр, гукIэгъур, цIыфыгъэр, зэфа­гъэр, къэрарыр къябэкIэу пIугъэнхэр – джары анахь шъхьаIэр. НыбжьыкIэу нэкI зыIыгъхэм япчъагъэ зэрэхэхъуагъэм ар лъэшэу егъэгушIо. Къоджэ­дэсхэм мазэм къыкIоцI тэрауихь нэмазыр зэда­шIыгъ.
— НэкIмэзэ мазэм хэтрэ быслъымэнкIи мэхьанэшхо иI, — еIо Азэмат — Ащ нахь мэзэ лъапIэ илъэ­сым хэтэп. А мазэм цIыфхэр нахь зэпэблагъэ ешIых, зыкIыныгъэ ахелъхьэ. Пегъымбар Мухьамэдым къы­Iуагъ: «Алахьым шIошъхъуныгъэ фашIэу, ипсапэ цIыфхэр щыгугъхэу НэкIмазэм нэмаз зышIыгъэхэм Тхьэм ягунахьхэр афигъэгъущт». Сыд фэдэрэ Iофэу Алахьталэм цIыфым къытырилъхьагъэм, нэкIым нэмыкIырэм, псапэу къыкIакIорэр гъэнэфагъэу щыт. НэкIмазэм псапэу къыкIакIорэр гъэнэфагъэп, Тхьэр зыфаем фэдиз. ЦIыфым шIоу ышIэрэм тефэрэ псапэр Алахьталэм къыретыжьы, ау НэкIмазэм тефэрэр зыми ымылъэ­гъоу къыIуегъэкIэжьы.
Диным къызэрэфэкIогъэ шIыкIэри тигущыIэгъу къыт­фиIотагъ.
— ИлъэсипшIым ехъурэ нэкIыр сIыгъыгъ нэмаз сымышIэу, — къеIуатэ Азэмат. — 2008 -рэ илъэсым диным нахь зестыгъ, сыукIытэзэ апэрэу мэщытым сычIэхьагъ, апэрэ нэмазым сищыIэныгъэ къызэбли­хъугъ. Сихъу ГъукIэ ихьатыркIэ мэщытыр ятIонэрэ унэ сфэхъугъ. Нэбгырэ пэпчъ охътэ кIыхьэ иI къышIошIы, ау нахь псынкIэу диным укъыфакIомэ, уигъашIэ нахьышIукIэ зэблэхъугъэ хъущт. Диныр гъашIэм илIыкIу, гукъэбзэныгъэм игъогу уфищэщт. Уешъоу, уешхэу, учэфэу ухэткIэ быслъымэн ухъущтэп.
Шэуджэн районым ифтар щызэхащагъ
— Шэуджэн районымкIэ Хьакурынэхьаблэ щыпсэурэ нэбгырэ 300-м ехъу пчыхьэ нэмазым ыуж ифтар зэхатщи, хэдгъэIэжьыгъэх. ШIушIэ Iофтхьабзэм хэлэжьагъэхэм Тхьэр разэ афэхъунэу тафэлъаIо, — къыхигъэщыгъ Азэмат.
Ислъам диныр зылэжьыхэрэм Бирамыр къэмысызэ фытырыр атымэ нахь тэрэзэу ефэндым еIо.
Алахьым телъэIу Адыгэ Республикэм щыпсэухэрэм зэкIэми псауныгъэ тиIэу, мамырныгъэрэ рэхьатныгъэрэ тигъогогъухэу илъэсишъэ пчъагъэхэм тызэдигъэлэжьэнхэу.
Быслъымэнэу дунаим тет пстэуми, нэмыкI динхэр зылэжьыхэрэми рэхьатныгъэр, мамырныгъэр азыфагу илъынэу, заохэм, къинхэм тащиухъумэнэу, Бирам хъяр Алахьталэм тыригъэхьащтхэм ащыщ тишIынэу тэлъаIо.
Лъэпшъыкъо Фатим.