АР-м хэдзынхэмкIэ и Гупчэ комиссие иIэгъэ зэхэсыгъом Iофыгъуи 10-мэ щатегущыIагъэх, унэшъо гъэнэфагъэхэр щашIыгъэх. Iофтхьабзэр зэрищагъ ащ и Тхьаматэу Сэмэгу Нурбый.

Пэублэм Урысые олимпиадэу «Софиум» зыфиIорэм хэлэжьэгъэхэ ыкIи зэрифэшъуашэу зыкъыщызгъэлъэ­гъогъэ Татьяна Дорошенкэмрэ Елизавета Логиновамрэ афэгушIуагъэх.
Урысые Федерацием хэдзынхэмкIэ и Гупчэ комиссие ибгъэхалъхьэу «За заслуги в организации выборов» зыфиIорэр къызытефэу алъытэгъэ нэбгыритIумэ ацIэ къыраIуагъ, джащ фэдэу щытхъу тхылъхэр зыфагъэшъошэнэу агъэнэфагъэхэр къыхагъэщыгъэх.
Президентым ихэдзынхэм япхыгъэу республикэ бюджетым къыхахыгъэ ахъщэмкIэ ашIыгъэ баннерхэр зэрагъэкIодыжьыщтхэм, джащ фэдэу хэдзынхэм языфэгъэхьазырынкIэ федеральнэ бюджетым къытIупщыгъэ мылъкур зэрагъэфедагъэм атегущыIагъэх.