Урысые олимпиадэу «Софиум» зыфиIорэм мы илъэсым кIэлэеджэкIо мин 12-м ехъу хэлэжьагъ. Хабзэ зэрэхъугъэу, ар уцугъуищэу зэтеутыгъэу кIуагъэ.

ШышъхьэIум и 17-м шъолъыр уцугъом иапэрэ Iахь республикэм щыкIуагъ. Я 10 — 11-рэ классхэм ащеджэрэ нэбгырэ 60 ащ хэлэжьагъ. КIэлэеджакIохэм хэдзынхэмкIэ фитыныгъэм ехьылIэгъэ упчIитфымэ яджэуапхэр къаратыжьыгъ, нэужым хэдзынхэмкIэ фитыныгъэм ыкIи хэдзыныр зэрэкIорэм япхыгъэ эссе атхыгъ.
2023-рэ илъэсым, тыгъэгъэзэ мазэм апэрэ уцугъом текIоныгъэ къыщыдэзыхыгъэ нэбгыриплIыр — Татьяна Дорошенкэр, Марат Цогоевыр, Елизавета Логиновар, Арина Блошкинар — шъо­лъыр олимпиадэм иятIонэрэ чэзыу хэ­лэжьагъэх ыкIи такъикъ 30-м къыкIоцI упчIэ 30-мэ яджэуапхэр къаратыжьыгъ.
Ж. Поповым ыцIэ зыхьырэ лицееу N 8-м ия 10-рэ класс щеджэрэ Татьяна Дорошенкэмрэ гимназиеу N 22-м чIэс Елизавета Логиновамрэ шIэныгъэ ку­ухэр къагъэлъэгъуагъ. Балл 30-м щыщэу 29-рэ къырахыгъ ыкIи Москва щыкIогъэ олимпиадэм хэлэжьагъэх.
Адыгеим икIыгъэ кIэлэеджакIохэр апэрэу урысые уцугъом хэлэжьагъэх. Татьяна Дорошенкэм анахь балл иныр къыдихыгъ ыкIи апэрэ чIыпIэр къыфагъэшъошагъ. Я 11-рэ классым щеджэхэ­рэмкIэ Елизавета Логиновам балли 6 ригъэкъугъ ыкIи хагъэунэфыкIырэ чIыпIэ къыдихыгъ.
Дипломхэр зэрафагъэшъошагъэм имызакъоу, «Ресурс об одаренных детях» зыфиIорэм пшъэшъэжъыехэр хагъэуцуагъэх. Москва къэралыгъо юридическэ академиеу Е. Кутафиным ыцIэ зыхьырэм чIэхьанхэмкIэ балли 2 къафыхагъэхъощт.
Я 10-рэ классым щеджэхэрэр кIэлэцIыкIу зыгъэпсэфыпIэ гупчэу «Артекым» кIонхэ алъэкIыщт ыкIи къэкIорэ илъэсым шъолъыр уцугъом хэмылажьэхэу, занкIэу урысые уцугъом зыщаушэтын амал яIэщт.
АР-м хэдзынхэмкIэ и Гупчэ комиссие текIоныгъэ къыдэзыхыгъэхэм ащыфэгушIуагъэх. Пшъэшъэжъыехэм шIэныгъэ куухэр къызэрагъэлъэгъуагъэм зэрэрыгушхохэрэр ыкIи ягъэхъагъэхэм джыри ахагъэхъонэу зэращыгугъыхэрэр комиссием ипащэу Сэмэгу Нурбый къыIуагъ.
Правэм ылъэныкъокIэ студентхэм шIэныгъэу аIэкIэлъым хэгъэхъогъэныр, нахь ашIогъэшIэгъон хъуныр, хэдзынхэм афэгъэхьыгъэ шапхъэхэр зэрашIэрэр ауплъэкIуныр ары пшъэрылъ шъхьаIэу зэхэщакIохэм зыфагъэуцужьыгъэр.
— Мыщ фэдэ мэхьанэ зиIэ олимпиадэм апэрэу сыхэлэ­жьагъ. УпчIэхэр псынкIагъэх сфэIощтэп. Балл 29-рэ къызэрэсхьыгъэр, урысые уцугъом сызэрэхэлэжьагъэр лъэшэу сигуапэ хъугъэ. Мы лъэныкъор нахь игъэкIотыгъэу зэзгъэшIэщт, юрист сэнэхьатым сыфеджэ­нэу сыфаешъ, — къыIуагъ Татьяна Дорошенкэм.
— Я 5-рэ классым къыщегъэ­жьагъэу обществознаниемкIэ олимпиадэхэм сахэлажьэ. Мы лъэныкъор сыдигъокIи сшIогъэшIэгъон. ЯтIонэрэу «Софиум» зыфиIорэ олимпиадэм сыхэлэжьагъ, хагъэунэфыкIырэ чIыпIэ къызэрэсхьыгъэм сегъэгушхо. СищыIэныгъэ гъогу медицинэм еспхы сшIоигъу нахь мышIэми, хэдзын правэр сшIогъэшIэгъонэу зэсэгъашIэ. Нэбгырэ пэпчъ ащ епхыгъэ Iофы­гъохэм хэшIыкI афыриIэн фаеу сэлъытэ, — къыIуагъ Елизавета Логиновам.
ДЕЛЭКЪО Анет.