«КъокIыпIэм имузей сакурэр къыщытIэмыгъ» зыфиIорэ Iофтхьабзэр КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр Кавказ къутамэу Мыекъуапэ щыIэм щыкIуагъ.

Хабзэ зэрэхъугъэу, къэгъэлъэгъонхэр, IэрышI пкъыгъохэм ягъэхьазырынкIэ егъэджэнхэр, сурэтшIынхэр, джэгукIэ ыкIи нэмыкI гъэшIэгъоныбэ мэфэкIым къыдыхэлъытэгъагъэх.
Сакурэм икъэтIэмын фэгъэхьыгъэ фестивалыр мы музеим мыгъэ яплIэнэрэу зэхищагъ. А илъэсхэм къакIоцI бэхэр зэжэхэрэ гъэтхэ мэфэкIхэм ар ащыщ хъугъэ. Ащ иамалкIэ культурэ анахьы­жъэу дунаим тетым изы мафэ къэлэдэс­хэмрэ ихьакIэхэмрэ щыщ мэхъух. Тхы­лъыпIэ остыгъэхэм, къэгъагъэр зыпиз къокIыпIэ чъыгхэм, мэкъамэхэм Японием ущыI къыпшIуагъэшIы, сакурэм икъэтIэмыгъом ащ щыхагъэунэфыкIырэ мэфэкIэу «Ханами» нэIуасэ уфешIы.

Музей Iупэм мэфэкIыр къыщызэIуа­хыгъ. Мыекъуапэ итворческэ купхэр, АР-м искусствэхэмкIэ иеджапIэу Тхьабысымэ Умар ыцIэ зыхьырэм щеджэ­хэрэм къагъэхьазырыгъэ къэгъэлъэгъон­хэмкIэ фестивалым ихьакIэхэм апэ­гъокIыгъэх. СурэтышIхэм, лъэпкъ IэшIагъэхэмкIэ IэпэIасэхэм, ятIэм Iоф дэзышIэхэрэм, къэкIыхэрэм адэлажьэхэрэм якъэгъэлъэгъуапIэхэр щагум щыгъэпсыгъагъэх. Джащ фэдэу музей кIоцIым щыкIорэ къэгъэлъэгъонхэм мы мафэм Iоф ашIагъ, лекциехэр ащыкIуагъэх.
КъокIыпIэ чъыгхэм ятарихъ
Японскэ чъыгхатэм игъэтIысхьан 2014-рэ илъэсым чъыгихкIэ музеим щаублэгъагъ. Ащ ыуж 2018-м чъыг 63-рэ хагъэхъуагъ. Ар зигукъэкIыгъэр ащ дэжьым музеим ипэщагъэу Кушъу Нэфсэт. КъокIыпIэм епхыгъэ музеим ищагу а лъэныкъом къыщыкIырэ чъыгхэр дэтынхэ фаеу ащ ылъытэгъагъ ыкIи хэукъуагъэп. Ахэр цIыфхэм шIу алъэгъугъэхэу якъэтIэмыгъохэм яжэх, сурэт­хэр зыщытырахых. Сакурэ лъэпкъ зэфэшъхьафхэм ащыщэу апэ къызэIуихырэр «Широ-Фуген» зыфаIорэр ары. Ащ икъутамэхэр пцел чъыгым фэдэу уфэ-упцIэхэу чIыгум зыфащэи. Ащ «Канзан» ыкIи «Роял Бургунди» къыкIэ­лъыкIощтых.

— ЯкъэтIэмыгъохэм тхьамэфитIу фэдиз къыдэфэ. Гукъау нахь мышIэми, ахэр зэкIэ къызэдызэIуихыхэрэп. Ау ядэхагъэ зэрагъэлъэгъунымкIэ цIыфхэм нахь охътабэ яI, — къыIуагъ музеим ипащэу ШъэуапцIэкъо Аминэт.
МэфэкIым зекIоным зырегъэушъомбгъу
Сакурэ чъыгхатэр ныбжьыкI нахь мышIэми, музейми, республикэми янэпэеплъ шъхьаIэхэм ащыщ хъугъэ. Ащ икъэгъэгъэн, имэфэкI зекIуабэм зыкъы­тырагъафэу Мыекъуапэ къэкIох. Ащ къыхэкIэу зекIоным хахъо езыгъэшIырэ Iофтхьабзэу ар Адыгеим щалъытэ.
— ЯтIонэрэ илъэс хъугъэу мы мэфэкIым зыкъытетэгъафэ. Лъэшэу тыгу рехьышъ, къэсыфэ тежэ. Мары мыгъи блэдгъэкIышъугъэп. Сакурэ къэтIэмыгъэр тлъэгъурэ къодыеп, мэфэкI шIагъом тыхэлажьэ. Ащи изакъоп, ежь музейри гъэшIэ­гъон дэд. Къэгъэлъэгъонэу щыкIохэрэми фестивалым дакIоу нэIуасэ зафэтэшIы. Мэфэ шIагъо щыдгъэкIуагъ, — къыддэгощагъ Краснодар къикIыгъэ зекIоу Ольга Шумовар.
Фестивалыр щэджагъом къыщыублагъэу пчыхьэм нэс кIуагъэ. Концертыр ащ кIэух дахэ фэхъугъ.
Анцокъо Ирин.