Журналэу «Зэкъошныгъэр» мэзищым зэ къыдэкIызэ плIэгъогогъо илъэсым къытIокIэ. 2024-мкIэ апэрэ къытедзэгъур гъэтхэ напэу кIэракI.

Гъатхэм дунаир къыдэущыжьэу, псэ зыпытым зыщыхахъоу, зызиушхоу зэрэщытым фэдэ къабзэу, усэным, тхэным зылъищэхэрэми агукIэ ашIоигъоу гупшысэр зэрагъазэрэр журналым къы­дэ­хьэгъэ художественнэ тхыгъабэм нафэ къашIы. КъызэIуехы ар зэлъашIэрэ гъэ­сагъэу, шIэныгъэлэжьэу, Адыгэ къэралыгъо университетым культурологиемкIэ икафедрэ ипащэу Унэрэкъо Рае иповестэу «Нэфынэ Iабгъу» зыфиIорэм. Сэ сшъхьэкIэ бзылъфыгъэ Iушыр, творческэ мэшIочэ ин зыхэлъыр гупшысэ куу къабзэкIэ къызэрэтэтэщтым седжэнджэшыгъэп. Ащ къыкIэлъэкIох титхэкIошхоу МэщбэшIэ Исхьакъ иусакIэхэу гу­мэкI-гукIэгъу инкIэ гъэшъокIыгъэхэр.
Дэрбэ Тимур исонетхэр щыIакIэм игумыпсэф макъэх.
Журналым мызыгъэгум рассказыбэ къыщытыгъ: Хъунэ Разыет, Хьакъунэ Заремэ ыкIи тхэнымкIэ зызыгъэзагъэхэу, зызыушэтхэу Дзыбэ Саният, Сихъу СултIан, тхакIоу ГутIэ Саныет атхыгъэ­хэр. Шъэфрыкъо Адам иусэхэу адыгабзэкIэ тхыгъэхэми зафэдгъэнэIосэщт. АР-м изаслуженнэ журналистэу Мамырыкъо Нуриет илирическэ этюдхэри тхылъеджэхэм апашъхьэ къырилъхьагъ. Арышъ, художественнэ тхыгъэ зэфэ­шъхьафыбэкIэ зичэзыу къыдэкIыгъор бай.
Журналым ткъош республикэхэм ятхакIохэми нэIуасэ игъорыгъоу уафешIы. Пхъэш МуIэед иусэхэр мыщ къыщытыгъэх.
Тиюбилярхэм афэгъэхьыгъэ тхыгъэхэу Агъыржьанэкъо Симхъан — Жэнэ Къы­рымызэ къызыхъугъэр илъэси 105-рэ зэрэхъугъэм, Шэуджэн Тамарэ — ЩэшIэ Казбек къызыхъугъэр илъэс 85-рэ, Шъхьэ­лэхъо Дарико усакIоу Дэрбэ Тимур ыныбжь илъэс 50 зэрэхъугъэм афэшI къагъэхьазырыгъэхэр журналым къыдэхьагъэх.
«Непэрэ мафэм илIыкIу» зыфиIоу Къуикъо Шыхьамбый итворчествэ фэгъэхьыгъэр шIэныгъэлэжьхэу Шъхьэлэхъо Дарико, ЖакIэмыкъо Зарим, Анцокъо Сурэт, Тэу Нуриет, Атэжьэхьэ Сайхьат, тхакIоу Дэрбэ Тимур ыкIи Сихъу СултIан яеплъыкIэхэр къызщыIуагъэх.
КIэсэбэжъ Хьазрэт (студент) истатьяу «Адыгагъэмрэ адыгабзэмрэ» зыфиIорэри мыщ къыщытыгъ. Адыгэ гупшысэр, ныдэлъфыбзэр, литературэр зикIасэхэр журналым зэрежэхэрэр ыкIи зэреджэщтхэр нафэ. Хэти зышIуигъэIофэу, авторхэм ятхыгъэхэмкIэ ишIошI къыриIотыкIын амал иI, шъуфатх гъэзетым ыкIи журналым.
Дзэукъожь Нуриет.