ЦIыфым ифитыныгъэхэмкIэ Уполномоченнэу АР-м щыIэ Анатолий Осо­киным 2023-рэ илъэсым Iофэу ашIагъэм фэгъэхьыгъэу республикэм и Правительствэ зычIэт унэм Адыгеим и ЛIышъхьэ къыщыфиIотагъ.

Республикэм и ЛIышъхьэ зэрэхигъэунэфыкIыгъэмкIэ, цIыфхэр зыгъэгумэкIырэ Iофыгъохэм язэшIохын дэлэжьэрэ къэралыгъо, общественнэ къулыкъухэр республикэм итых, цIыфым ифитыныгъэхэмкIэ Уполномоченнэм иаппарати ахэм зэу ащыщ.
«ЦIыфхэм ятхьаусыхэ тхылъхэр нахь макIэ зэрэхъу­гъэр непэ тинэрылъэгъу. Ау хэушъхьафыкIыгъэ дзэ операцием, Донбассрэ Новороссиемрэ ащыщхэр республикэм къызэрэкIуагъэхэм япхыгъэу IэпыIэгъу къыкIэлъэIухэрэр джыри щыIэх. ЦIыфым ифитыныгъэ­хэмкIэ Уполномоченнэм иаппарати, фондэу «Хэгъэгум иухъумакIохэр» зыфиIорэми, волонтерхэми, нэмыкI къулыкъухэми мы лъэныкъом нахь лъэшэу анаIэ тырагъэтын фае. Урысыем и Президентэу Владимир Путиным джащ фэдэ пшъэрылъ къытфишIыгъ», — къыIуагъ КъумпIыл Мурат.
Къащ Плъыжьым и Дунэе комитетэу Урысыемрэ Беларусьрэ ащызэхэщагъэхэм, зыдэхъугъэхэр амышIэу кIодыгъэхэм алъыхъурэ Гупчэм, чIыпIэ заохэмрэ Iэшэ зэIуупIэныгъэхэмрэ яветеранхэм яфедэхэр къэзыухъу­мэрэ Лигэм зэдэлэжьэныгъэу адыриIэм фэгъэхьы­гъэу Анатолий Осокиным къыIотагъ.
Ащ зэрэхигъэунэфыкIыгъэмкIэ, лъэIу тхылъхэм ахаплъэхэ зэхъум Уполномоченнэм иаппарат Урысыем зыухъумэжьынымкIэ и Министерствэ, Дзэ прокуратурэ шъхьаIэм, Къыблэ дзэ округым и Дзэ прокуратурэ зафигъэзэн фаеу хъугъэ. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм ятхылъ 30-м ехъу къаIэкIэхьагъ. Къулыкъур зэрахьырэм, Iэзэгъу уцхэр, дзэ шъуашэхэр, ахъщэр, заом иветеран истатус къазэраратырэм, дзэ къулыкъушIэу кIодыгъэхэм зэралъыхъухэрэм япхыгъэ Iофыгъохэр ыкIи нэмыкIхэр ахэм къащаIэтыщтыгъэх.
ЦIыфым ифитыныгъэхэмкIэ Уполномоченнэу АР-м щыIэм къызэрэхигъэщыгъэмкIэ, гъэрекIо тхылъ 367-рэ аппаратым къыIэкIэхьагъ. 2022-рэ илъэсым егъэпшагъэмэ, процент 19-кIэ ар нахь макI. Нэбгыри 195-рэ рагъэблэгъагъ, ахэм ащыщэу 124-мэ Уполномоченнэр ышъхьэкIэ адэгущыIагъ. «Линие плъырым» ителефонкIэ нэбгырэ 200-мэ упчIэжьэгъу афэхъугъэх. Мы аужырэ илъэсищым къыкIоцI тхьаусыхэ тхылъэу къаIэкIахьэрэр процент 23-м нэсэу къеIыхыгъ. Правэм ылъэныкъокIэ анахьэу ухъумэгъэн фаехэр пенсионерхэр, ветеранхэр, сэкъатныгъэ зиIэхэр ары. Тхьаусыхэ тхылъхэм япроцент 48-рэ фэдизмэ къащыраIотыкIыщтыгъэр псэупIэхэмрэ мылъкумрэ япхыгъэ фитыныгъэхэр зэраукъуагъэхэр, энергетическэ компаниехэм яIофшIэн зэрэзэхащэрэм, социальнэ IэпыIэгъоу къаратырэм зэримыгъэразэхэрэр ары. Псауныгъэм икъэухъумэнкIэ ыкIи медицинэ IэпыIэгъумкIэ фитыныгъэу яIэхэр укъуа­гъэ зэрэхъухэрэм епхыгъэ тхылъхэр фэди 2-кIэ нахь макIэ хъугъэх. Гъэсэныгъэм фэгъэхьыгъэу тхьаусыхэ тхылъ къаIукIагъэп. Мыекъуапэ дэсхэм тхылъ 223-рэ, Мыекъопэ районым исхэм — 56-рэ, Тэхъутэмыкъое районым исхэм — 20 къаIэкIагъэхьагъ. Тхьаусыхэ тхылъхэм япроцент 59-мэ къащаIэтыщтыгъэ Iофыгъохэр зэрэзэшIуахыгъэхэр Уполномоченнэм хигъэунэфыкIыгъ.
Республикэм и ЛIышъхьэ цIыфым ифитыныгъэхэмкIэ Уполномоченнэу АР-м щыIэм риIуагъ цIыфхэр зыгъэгумэкIырэ Iофыгъохэр дэгъоу зэрэзэшIуихыхэрэм ыкIи теурыкIуагъэ хэмылъэу Iофым зэрекIуалIэрэм афэшI зэрэфэразэр.