Iофэу ашIагъэм тегущыIагъэх
Адыгеим и ЛIышъхьэу КъумпIыл Мурат республикэ хэбзэгъэуцугъэм къызэрэдилъытэрэм тетэу АР-м ипредпринимательхэм яфитыныгъэхэм якъэухъумэнкIэ уполномоченнэу Къонэ Азэмат 2023-рэ илъэсым Iофэу ашIагъэм икIэуххэмкIэ къыIуагъэм едэIугъ.
Адыгеим и ЛIышъхьэ къызэрэхигъэщыгъэмкIэ, республикэм зэхъокIыныгъэ инхэр фэхъух, ахэм къахэлажьэх предпринимательствэ цIыкIумрэ гурытымрэ. МыщкIэ анахь мэхьанэ зэратыхэрэм ащыщых инвестициехэр ыкIи инвесторхэм япхыгъэ гарантиехэр.
«Инвесторхэм, джащ фэдэу предпринимательствэ цIыкIумрэ гурытымрэ ялIыкIохэм яфедэхэр къэухъумэгъэнхэр тиIофшIэнкIэ анахь лъэшэу тынаIэ зытедгъэтыхэрэм ащыщ. Къэралыгъо-унэе зэдэлэжьэныгъэм тегъэпсыхьагъэу проектхэм ащыщыбэхэр зэшIохыгъэ мэхъух. ТэркIэ мэхьанэ зиIэр предпринимательхэу Адыгеим Iоф щызышIэхэрэм яфэшъошэ IэпыIэгъу агъотыныр ары, республикэм ихэхъоныгъи ахэм яфэмэ-бжьымэ къытырехьэ», — къыIуагъ КъумпIыл Мурат.
Къонэ Азэмат къызэрэхигъэщыгъэмкIэ, предпринимательствэ цIыкIумрэ гурытымрэ алъэныкъокIэ (унэе предпринимательхэри зэрахэтхэу) нэбгырэ мин 64,3-мэ Iоф ашIэ. 2022-рэ илъэсым елъытыгъэмэ, уполномоченнэм иаппарат зыкъыфэзыгъэзагъэр процент 30-кIэ нахь макIэ хъугъэ. Илъэсэу икIыгъэм тхыгъэу лъэIу тхылъ 25-рэ, жэрыIоу — 39-рэ къаIэкIэхьагъ. Ахэр нахьыбэрэмкIэ зыфэгъэхьыгъагъэхэр предпринимательхэм яфитыныгъэхэр зыпкъ игъэуцожьыгъэнхэр, пыдзэфэ пытэхэр зэрэIуащыхэрэм пае ахъщэм хэгъэхъогъэныр, чIыгу Iахьхэр хэбзэнчъэу амыштэнхэр ыкIи нэмыкIхэр. Ащ фэдэ лъэIу тхылъхэм япроцент 60-м къыдалъытэрэ фитыныгъэхэр зыпкъ рагъэуцожьыгъэх.
Уполномоченнэм къыIотагъ предпринимательхэм адашIырэ зэIукIэгъухэм, къэралыгъо ыкIи уплъэкIокIо къулыкъухэм зэрадэлажьэхэрэм, чIыфэт организациехэм Iоф зэрадашIэрэм ыкIи нэмыкIхэм афэгъэхьыгъэу.
ИкIэухым КъумпIыл Мурат къыIуагъ Iофэу ышIагъэм пае Къонэ Азэмат зэрэфэразэр ыкIи ащ дакIоу пстэуми апэу зэшIохыгъэн фэе пшъэрылъ заулэ къыгъэуцугъ. Ахэр нахьыбэрэмкIэ зэпхыгъэхэр предпринимательствэ цIыкIумрэ гурытымрэ афэгъэзагъэхэм упчIэжьэгъу афэхъунхэр, чIыпIэхэм къащыдагъэкIыхэрэр зыщыIуагъэкIыщтхэм якъыхэхынкIэ IэпыIэгъу ятыгъэныр, къэралыгъо IэпыIэгъум ылъэныкъокIэ амалэу щыIэхэм бизнесым хэщагъэхэр нэIуасэ афэшIыгъэнхэр, хэбзэIахьхэр ателъхьэгъэнхэм, фэгъэкIотэныгъэ зыхэлъ чIыфэхэр ятыгъэнхэм ыкIи нэмыкI зигъо IофыгъохэмкIэ зэIукIэгъухэмрэ Iэнэ хъураехэмрэ зэхэщэгъэнхэр.
АР-м и ЛIышъхьэ ипресс-къулыкъу