Хабзэ зэрэхъугъэу, илъэс къэс мэлылъ­фэгъум и 7-м псауныгъэм и Дунэе мафэ хагъэу­нэ­фыкIы.

Мыгъэ ащ зэреджагъэхэр «Мое здоровье, мое право». МэфэкIым къыдыхэлъытагъэу цIыфхэм апкъышъол агъэпытэным фытегъэпсыхьэгъэ Iофтхьабзэхэр къэралыгъом ишъолъыр зэфэшъхьафхэм ащырагъэкIо­кIыщтых.
Псауныгъэм икъэухъумэнкIэ Дунэе организациер зызэха­щагъэу алъытэрэр мэлылъфэгъум и 7-м 1948-рэ илъэсыр
ары, а уахътэм ащ иустав ­аштагъ. 1950-м щегъэжьагъэу псауныгъэм и Дунэе мафэ имэфэкI хагъэунэфыкIэу рагъэжьагъ.
Специалистхэм зэралъытэрэмкIэ, цIыфым ипсауныгъэ изытет процент 20-кIэ зэпхыгъэр ар зыщыпсэурэ чIыпIэм икъэбзагъ, процент 50-р ар зэрэпсэурэ шIыкIэм, проценти 10-р псауныгъэр къэухъумэгъэным исистемэ Iоф зэришIэрэм япхыгъ, нэмыкI лъэныкъохэри агъэнафэх.
ЦIыфым ипсауныгъэ гъэпытэгъэным фытегъэпсыхьэгъэ пэшIорыгъэшъ Iофтхьабзэхэм язэхэщэн, ащ гъомылапхъэу ышхырэр шэпхъэ гъэнэфагъэхэм адиштэным, физическэ культурэм ыкIи спортым апылъыным, анахьэу лъэсэу къыкIухьаным, сыд фэдэрэ лъэ­ны­къокIи мэхьанэшхо яI. Мы пстэури зыгъэцакIэрэм узхэм нахь защиухъумэщт.

Псауныгъэм икъэухъумэнкIэ Дунэе организацием зэрилъы­тэрэмкIэ, спортым ыкIи физическэ культурэм адакIоу цIыфыр тэрэзэу шхэным мэхьанэшхо иI. Псауныгъэм игъэпытэн зишIуагъэ къекIырэ гъомылапхъэхэр — пхъэшъхьэ-мышъхьэхэр, хэтэ­рыкIхэр, нэмыкIхэр ыгъэфедэнхэ, шъоущыгъур ыкIи щыгъур зыхэлъхэр нахь макIэ ышIынхэ, джащ фэдэу аркъым ыкIи тутын ешъоным защидзыен фае.
Шъуипсауныгъэ изытет зэжъу­гъэшIэным ыкIи ищыкIагъэ хъумэ медицинэ IэпыIэгъу зэжъугъэгъо­тыным апае специалистхэм, врач­хэм игъом зафэжъугъаз.
Мы мэфэкIым фэгъэхьыгъэ спорт Iофтхьабзэхэр, зэIухыгъэ урокхэр, нэмыкIхэр Адыгеим щыкIощтых. Республикэм икъэлэ шъхьаIэ щызэхащэщт «Проф­союзным маршрутом к долголетию!» зыфиIорэр. Тишъолъыр щыпсэурэ нэбгырэ 600-м ехъу ащ хэлэжьэщт, лъэсэу лъэбэкъу мини 10 къакIущт. Ар онлайн шIыкIэм тетэу рагъэкIокIыщт. Командэ пэпчъ нэбгыри 5 — 10 хэтыщт. Ахэм Iофтхьабзэм къыгъэнэфэрэ шапхъэхэр агъэцэкIэщтых, кIэухым республикэ ста­дионэу «Зэкъошныгъэм» щызэ­IукIэщтых.
Iофтхьабзэм пшъэрылъ шъхьа­Iэу иIэр профсоюз организацием хэтхэр физическэ культурэм ыкIи спортым пыщэгъэнхэр, ахэм япсауныгъэ агъэпытэныр ыкIи ащ лъыплъэнхэр ары.

НэкIубгъор зыгъэхьазырыгъэр БзэшIу Асхьад.