Гурыт еджапIэхэм якIэлэеджакIохэм апае Адыгэ къэралыгъо университетым шъолъыр олимпиадэу «Юный правовед» зыфиIорэр мы мафэхэм зэхищагъ.

Апшъэрэ еджапIэм правэмкIэ и Институт АР-м гъэсэныгъэмрэ шIэныгъэм­рэкIэ и Министерствэ иIэпыIэгъоу 2022-рэ илъэсым къыщегъэжьагъэу ар рагъэ­кIокIы. НыбжьыкIэхэм творческэ сэнаущыгъэу ахэлъыр къыхэгъэщыгъэныр, еджапIэр къызаухыкIэ ящыIэныгъэ гъогу зэрапхыщт сэнэхьатыр къыхахыныр нахь IэшIэх афэхъуныр, яшIэныгъэхэм ахагъэхъоныр ары пшъэрылъ шъхьаIэу зэхэщакIохэм зыфагъэуцужьырэр.
Олимпиадэм я 9 — 11-рэ классхэм ащеджэрэ кIэлэеджакIохэр ары хэлэжьагъэхэр. Мыгъэ апэрэу республикэм ирайонхэм ыкIи икъалэхэм къарыкIыгъэ­хэри къекIолIагъэх. ЗэкIэмкIи нэбгыри 117-мэ яшIэныгъэхэр къагъэлъэгъуагъ.
— Мыгъэ ящэнэрэу олимпиадэр зэхэтэщэ. Къыхэзгъэщмэ сшIоигъу илъэс къэс хэлажьэхэрэм япчъагъэ зэрэхахъорэр. Апэрэ илъэсым нэбгырэ 45-рэ, ятIонэрэм 67-рэ, мы илъэсым 117-рэ къекIолIагъ. Мы илъэсым шъолъыр олимпиадэ ар хъугъэ. Мыекъуапэ икIэлэеджа­кIохэм анэмыкIэу республикэм икъалэхэм ыкIи ирайонхэм къарыкIыгъэх. Сигуапэу къыхэзгъэщы сшIоигъу гъэрекIо текIоныгъэ ыкIи хагъэунэфыкIырэ чIыпIэ къыдэзыхыгъэхэм балл те­дзэхэр къызфагъэфедэхэзэ тиапшъэрэ еджапIэ къызэрэчIэ­хьа­гъэхэр, непэ хэлажьэхэрэми тифакультет къыхахынэу тэгугъэ, — еIо олимпиадэм изэхэщакIохэм ащыщэу, кафедрэм идоцентэу, юридическэ шIэныгъэхэмкIэ кандидатэу Дзыбэ Саидэ.

Сыхьатищым къыкIоцI кIэлэеджакIохэм яшIэныгъэхэр къагъэлъэгъуагъ, тест IофшIэным нэмыкIэу конституционнэ, гражданскэ, унэгъо, IофшIэн, уголовнэ, административнэ правэм, уголовнэ ыкIи граждан процессхэм афэгъэхьыгъэ творческэ IофшIэнхэр агъэцэкIагъэх.
Олимпиадэм зэфэхьысыжьэу фэхъугъэхэр мэлылъфэгъум и 8-м къэнэфэщтых. Iофтхьабзэм хэлэжьагъэхэм сер­ти­фикатхэр аратыжьыщтых, текIоныгъэ ыкIи хагъэунэфыкIырэ чIыпIэ къыдэзыхыгъэхэм дипломхэр афагъэшъошэщт, я 11-рэ классым исхэм Адыгэ къэралыгъо университетым июридическэ факультет чIэхьанхэмкIэ балли 3 къафыхагъэхъощт.
ДЕЛЭКЪО Анет.
Сурэтхэр: АКъУ-м ипресс-къулыкъу.