АР-м идзэ комиссариат тыгъуасэ пресс-зэIукIэ ригъэкIокIыгъ. Бжыхьэ дзэ дэщыгъоу блэкIыгъэм изэфэхьысыжьхэм, гъэтхэ дзэ дэщыгъомкIэ пшъэрылъэу яIэхэм ащ щатегущыIагъэх.

Iофтхьабзэм хэлэжьагъэх АР-м идзэ комиссариат ипащэу Александр Авериныр, цIыфхэр дзэ къулыкъум дэщыгъэн­хэмкIэ ыкIи ухьазырыгъэнхэмкIэ отделым ипащэу Виталий Лебедевыр, дзэ-врачебнэ комиссием ипащэу Игорь Буренковыр, район дзэ комиссариатхэм япащэхэр, республикэм икъэбарлъыгъэ­Iэс амалхэм ялIыкIохэр.
Республикэм идзэ комиссар шъхьаIэ Iофтхьабзэр къызэIуихызэ, Iофым хэшIыкI фызимыIэхэм къэбар нэпцIэу къы­рагъэкIокIыгъэхэм къахэкIыкIэ бжы­хьэ дзэ дэщыгъор къызэрыкIоу зэрэщымытыгъэр къыхигъэщыгъ. Арэу щыт нахь мышIэми, къафагъэуцугъэ пшъэрылъыр агъэцэкIагъ ыкIи къулыкъур зыхьыщт ныбжьыкIэ нэбгырэ 400 фэдизыр арагъэщагъ.
— Адрэ илъэсхэм афэдэу бжыхьэ дзэ дэщыгъор зыпкъ итэу редгъэкIокIыгъ. Джы мэлылъфэгъум и 1-м гъэтхэ дзэ дэщыгъоу едгъэжьагъэри зэрифэшъуашэу зэхэтщэщт, ащ епхыгъэу комиссии 10-мэ (9-р районхэм ащыIэх) яIофшIэн аублагъ. Республикэм щыщ нэбгырэ 3000-м ехъумэ къулыкъур ахьынэу щыт. Ау УФ-м зы­къэухъумэнымкIэ и Министерствэ иунашъокIэ Адыгеим щыщ ныбжьыкIэ 530-рэ фэдизыр ары мыгъэрэ гъэтхэ дзэ дэщыгъом къулыкъум ащэщтыр. Ахэм къанэрэ щымыIэу макъэ ядгъэIугъ. Дащыщтхэм инахьыбэм Урысые Федерацием и Лъэпкъ гвардие идзэхэм къулыкъур ащахьыщт. Стратегическэ мэхьанэ зиIэ ракетыдзэхэм, хыдзэ флотым, лъэсыдзэхэм, мэшIокудзэхэм, ошъогу десантыдзэхэм ахэфэщтхэр къахэкIыщтых. Джащ фэдэу Мыекъопэ гарнизоным къыдэнэщтхэри ахэтых, — къы­Iуагъ Александр Авериным.
Комиссар шъхьаIэм зигугъу къышIыгъэхэм ащыщ дзэ къулыкъум къыхи­убытэхэрэм афэгъэхьыгъэ хэбзэгъэу­цугъэм зэхъокIыныгъэу фашIыгъэр. Мыщ ыпэкIэ хъулъфыгъэу илъэс 18-м къы­щегъэжьагъэу илъэс 27-м нэс зыныбжьхэр арых къулыкъум ащэщтыгъэ­хэр, джы 2024-рэ илъэсым ищылэ мазэ и 1-м къыщегъэжьагъэу илъэс 30-м нэс зыныбжьхэр къыхиубытэщтых.
Гъэтхэ дзэ дэщыгъом къыхиубытэщт ныбжьыкIэхэм яапэрэ гъэкIотэгъу мэлылъфэгъум и 13-м тыраубытагъ.
Iофтхьабзэм къыщыхагъэщыгъэхэм ащыщ мы ныбжьыкIэхэр хэушъхьафыкIыгъэ дзэ операцием зэрамыщэщтхэр.
— Шъугу къэзгъэкIыжьымэ сшIоигъу ыпэрэ дэщын кампаниеу редгъэкIокIыгъэхэм къащысIогъагъэр къызэрагъэшъыпкъэжьыгъэр. ХэушъхьафыкIыгъэ дзэ операцием мыхэм афэдэ ныбжьыкIэхэр ащэхэрэп, офицерхэр ыкIи дзэкъулыкъушIэхэу зэзэгъыныгъэм кIэтхагъэхэр ары ащ агъакIохэрэр. Арышъ, мы лъэныкъомкIэ ны-тыхэр гумэкIыгъо хэтынхэр ищыкIагъэп, — теубытагъэ хэлъэу къы­Iуагъ Александр Авериным.
Журналистхэм яупчIабэм дзэ комиссариатхэм яIофышIэхэм джэуапхэр къаратыжьыгъ.
Iофтхьабзэм икIэухым АР-м идзэ комиссариат ищытхъу тхылъхэр къэбар жъугъэм иамалхэм ащыщхэм ялIыкIохэм Александр Авериным аритыжьыгъ.
Iэшъынэ Сусан.
Сурэтыр: Iэшъынэ Аслъан.