Мэлылъфэгъум и 3-м Мыекъуапэ иурамэу Пионер­скэм, унэу N 229-м тет тучаным ыкIи къакъырым машIор къакIэнагъ.

Ар загъэунэфыгъэр пчыхьэм сыхьатыр 4-рэ такъикъ 22-р ары. Мыекъопэ мэшIогъэкIосэ-къэгъэнэжьэкIо гарнизоным иапэрэ подразделение мы чIыпIэм къызэсым ыгъэунэфыгъ стырэ къакъырым нэмыкIэу гъунэгъоу щыт тучанми машIор къызэрэкIэнагъэр. ЗэкIэмкIи квадратнэ метрэ 300 фэдиз машIом зэлъиштэгъагъ.
КъулыкъушIэхэм яIэпэIэсэныгъэ ишIуа­гъэкIэ машIор псынкIэу агъэкIосэжьыгъ. Мы хъугъэ-шIагъэм зыпари хэкIодагъэп ыкIи шъобжхэр атещагъэ хъугъэп.
Мыекъуапэ имэрэу Геннадий Митрофановыр чIыпIэм щыIагъ.
ЗэрагъэунэфыгъэмкIэ, апэ машIор къакъырым къыкIэнагъ, нэужым гъунэгъоу щытыгъэ тучаным зидзыгъ.
МашIор къызэкIэнэным лъапсэ фэхъу­гъэр мы мафэхэм агъэунэфы.
УФ-м ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэм республикэм щыпсэухэрэм закъы­фегъазэ машIор щынэгъончъэу щытыным ишапхъэхэр амыукъонхэу ыкIи сакъыныгъэ къызхагъэфэнэу. МашIо къызэкIэнагъэу шъурихьылIэмэ, телефон номерэу «101»-м ыкIи «112»-м шъуатеон шъулъэ­кIыщт.
КIАРЭ Фатим.