Шы спортымкIэ къалэу Минеральные Воды щыкIогъэ зэнэкъокъухэм Адыгеим илIыкIохэм медалитIу къащахьыгъ.

«ТекIоныгъэм и Кубок» ыкIи «Ставрополь краим и Кубок» зыфаIохэрэм якъыдэхын спортсмен анахь лъэшхэр фэбэнагъэх, зэкIэмкIи нэбгырэ 68-рэ. Шыхэр къызэлъэнхэ фэе пэрыохъум илъэгагъэ сантиметри 130-м кIахьэщтыгъ.
Адыгеир зэнэкъокъухэм къащызыгъэлъэгъуагъэхэр шы спортымкIэ спорт еджапIэм илIыкIохэр ары, ахэр нэбгыри 5 хъущтыгъэх.
«ТекIоныгъэм и Кубок» икъыдэхын хэлэжьэгъэ Адыгеим испорт­сменкэу Дарья Бигаевар шэу «Винстон» тесэу лъэныкъо анахь хьылъэм, пэрыохъум илъэгагъэ сантиметри 120-рэ хъурэм, зыщиушэтыгъ ыкIи гъэхъэгъэшIухэр ышIыгъэх. Тазыр очкохэр къатырамылъхьэу ахэм ягъогу къакIугъ ыкIи Ставрополь краим щыщ спортсменитIумэ ягъусэхэу финалым ихьагъэх. Джы ахэр къызэлъэщтхэр сантиметри 10-кIэ нахь лъагэу аIэтыгъ — 130-м нагъэсыгъ. Дарьерэ ар зытесыгъэ шымрэ ухьазырыныгъэ дэгъу къагъэлъэгъуагъ, къафагъэнэфэгъэ гъогур охътэ кIэкIым къыкIоцI къакIугъ ыкIи текIоны­гъэр къыдахыгъ.
Джащ фэдэу «Ставрополь краим и Кубок» икъыдэхын фэгъэхьыгъэ зэнэкъокъум хэлэжьэгъэ Мыекъуапэ щыщ Валерия Ткачевам ятIонэрэ чIыпIэр къыдихыгъ. Ар шэу Кореджио тесыгъ.