БлэкIыгъэ илъэсым итыгъэгъазэ къыщегъэжьа— гъэу Урысыем гандболымкIэ и Федерацие илIыкIо­хэм къэралыгъом ишъолъыр зэфэ­шъхьафхэр къакIухьэх. КIэлэцIыкIу-ныбжьыкIэ гандболым непэ иIофхэм язытет зыфэдэр зэрагъашIэ, мы спорт лъэпкъым хэхъоныгъэ ышIынымкIэ амалэу щыIэхэм атегущIэх.

Федерацием хэтхэр Астрахань, Волгоград, Ставрополь, Екатеринбург, Снежинскэ, Челябинскэ, Нижний Новгород, Дзержинскэ ыкIи Бор ащыIагъэх. Мы мафэхэм комиссием илIыкIохэр Мыекъуапэ ихьэкIагъэх. Адыгеим икъэлэ шъхьаIэ къеблэгъагъэх хъулъфыгъэ ыкIи бзылъфыгъэ гандболым афэгъэзэгъэ тренерхэу Юрий Зайцевымрэ Вячеслав Кирилен­кэмрэ.
Урысыем изаслуженнэ тренерэу Юрий Зайцевыр:
— Сэ пшъэрылъ шъхьаIэу зыфэзгъэуцужьырэр семинархэр ыкIи мастер-классхэр зэхэсщэнхэр ары. Бэхэм къашIошIы спорт­сменхэм зызэрагъасэрэм тылъыплъэнэу тыкъакIоу, ау арэущтэу щытэп. ТыздэщыIэгъэ къалэхэм зэкIэми семинархэр ащызэхэтщагъэх, ахэм Iофыгъо зэфэшъхьафхэм тащатегущыIагъ. Джащ фэдэу ныбжь зэфэшъхьафхэм ате­лъытагъэу къэралыгъом ихэшыпыкIыгъэ командэхэм ахэхьан зылъэкIыщтхэм якъыхэхын мэхьанэшхо етэты. НыбжьыкIэхэм яхэшыпыкIыгъэ командэ итренерскэ штаб сыхэхьэ, арышъ, сэнаущыгъэ зыхэлъ спортсменхэр къыхэдгъэщынхэр, ахэм зыкъызэIуахынымкIэ IэпыIэгъу тафэхъуныр ары мыщ дэжьым анахь шъхьаIэр.
Урысыем изаслуженнэ тренерэу Вячеслав Кириленкэр:
— Пэрытныгъэ зыIыгъ клубхэм ыкIи спорт еджапIэхэм ятренерхэм ухьазырыныгъэу яIэр зэдгъэшIэщт, зэдгъэлъэгъущт. КIэлэцIыкIухэм ыкIи Iэтахъо­хэм Iоф адэзышIэрэ специалистхэм япчъагъэ зэрэмакIэм лъэшэу тегъэгумэкIы, ащкIэ хэкIыпIэу щыIэхэм татегущыIэ, анахьэу тынаIэ зытедгъэтын фэе лъэныкъохэр тэгъэнафэх.

Спорт еджапIэу С.М. Джэнчатэм ыцIэ зыхьырэм зыщызыгъэсэрэ купхэм адэжь хьакIэхэр щыIагъэх, алъэгъугъэм осэшIу фашIыгъ.