Я XXII-у зэхащэгъэ зэнэкъокъоу «Сыхьат 24-м къыкIоцI километри 100» зыфиIорэр Адыгеим щырекIокIыгъ. Хабзэ зэрэхъугъэу, Урысыем ишъолъыр зэфэшъхьафхэм къарыкIыгъэ лIыкIохэу зекIоныр зыгу рихьыхэрэр ащ хэлажьэх.

Iофтхьабзэр зекIонымкIэ инструкторэу Хьамырзэ Рэмэзан ишIэжь фэгъэхьыгъагъ. 2012-рэ илъэсым мы хъулъфыгъэм псым ытхьалэрэр къыхихижьыгъ, ау гухэкI нахь мышIэми ежь хэкIодагъ. УФ-м и Президент иунашъо­кIэ идунай зихъожьыгъэм ыуж ащ ЛIыхъужъныгъэм иорден къыфагъэшъошагъ.
ПсэупIэу Каменномостскэм щыкIогъэ марафоным Москва, Волгоград, Краснодар, Мыекъуапэ, Шъачэ, Ставрополь, джащ фэдэу Краснодар краим хэхьэрэ Лабинскэ ыкIи Северскэ районхэм яспортсменхэр хэлэжьагъэх. ЗэкIэмкIи командэ 56-рэ, нэбгырэ 500-м ехъу.

Iофтхьабзэм кIэщакIо фэхъугъэ Адыгэ Республикэм спорт зекIонымкIэ и Федерацие зэнэкъокъу­хэр нахь гъэшIэгъон зэрэхъущтхэм пылъыгъ. Лъэныкъо анахь хьылъэу «А/24» зыфиIорэм коман­дэ 20 хэлэжьагъ. ТекIоныгъэр къыдэзыхыгъэр Ставрополь къэзыгъэлъэгъогъэ «МАТS» зыфи­Iорэр ары. Мыщ хэтхэм сыхьат 24-кIэ километри 103,3-рэ къа­кIугъ, очко 91-рэ рагъэкъугъ.
Лъэныкъоу «В/24» зыфиIорэм куп 26-рэ хэлэжьагъ, командэ пэпчъ нэбгыри 4 — 8 хэтыгъ. Анахь дэгъоу зыкъэзыгъэлъэгъуа­гъэр «Лесные пони» (Краснодар). ТекIоныгъэр къыдэзыхыгъэхэм сыхьат 24-кIэ километрэ 91-рэ къакIугъ, очко 71-рэ рагъэкъугъ.

Марафоным хэлэжьагъэхэм ялъэIукIэ зэхэщакIохэм нэмыкI лъэныкъохэри къыдалъытагъэх. ГущыIэм пае, езгъэжьэгъакIэхэм гъогоу къакIугъэм сыхьат 24-м ычIыпIэ 6 тырагъэкIодагъ. Мыхэр команди 10 хъущтыгъэх. Лъэныкъоу «А/6» зыфиIорэм командэу «Пещеходы» (Москва) текIоны­гъэр къыщыдихыгъ, «В/6-м» анахь щылъэшыгъэр «Волки» (Мые­къуапэ).
— «Сыхьат 24-м къы­кIоцI километри 100» зыфиIорэм ишIуагъэкIэ зекIоным ылъэныкъокIэ Адыгеим амалышIоу Iэ­кIэлъхэр нэмыкI шъо­лъыр­хэм къарыкIы­гъэхэм алъэгъу, осэшIу фашIы. Ащ дакIоу командэ анахь лъэшхэр къыхагъэщых, спорт зекIоным хэхъоныгъэ ешIы. Туризмэм фэ­гъэ­зэгъэ инструкторхэм яшIэныгъэхэм ахагъэхъоным, мыщ фэдэ Iофтхьабзэхэм нахьышIоу зафа­гъэхьазырын амал яIэным марафоныр фытегъэпсы­хьагъ, — къыIуагъ зэхэщакIохэм ащыщэу, Адыгеим изаслуженнэ зекIоу Хьаткъо Алый.

Джащ фэдэу зызыгъэпсэфы зышIоигъо унагъохэм хэушъхьафыкIыгъэ щынэгъончъэ гъогу къафыхахыгъагъ. ЦIыфхэр зэрэзэнэкъокъугъэхэм дакIоу зэрэгъэ­чэфыгъэх, республикэм ичIыопс идэхагъэ зэрагъэлъэгъугъ, ныб­джэгъу зэфэхъугъэх.