Республикэм истудент 500 фэдиз ащ хэлажьэ. ТхьамэфитIум къыкIоцI апшъэрэ ыкIи гурыт сэнэхьат зыщызэрагъэгъотырэ еджапIэхэм ястудентхэм ясэнаущыгъэ къагъэлъэгъощт.

Шъугу къэдгъэкIыжьын мы Iофтхьабзэр Урысые фестивалэу «Российская студенческая весна» зыфиIорэм ишъолъыр едзыгъоу зэрэщытыр. Президент платформэу «Урысыер — амалышIухэр зыIэкIэлъ къэралыгъу» зыфиIорэм хэхьэ. ­Илъэс зэкIэлъыкIохэм студентхэм ясэ­наущыгъэ къызыщагъэлъэ­гъорэ, нэIуасэ зыщызэфэхъу­хэрэ фестиваль анахь инхэм ащыщ хъугъэ.
Я 25-рэ зэIухыгъэ студент фестивалыр Адыгэ къэралыгъо университетым культурэмкIэ и Гупчэ зэхищагъ, муниципальнэ гъэпсыкIэ зиIэ «Къалэу Мые­къуапэ» иадминистрацие гъэсэныгъэмкIэ ыкIи ныбжьыкIэ политикэмкIэ икомитет IэпыIэгъу къыфэхъугъ.

Фестивалым ишапхъэхэм къызэрэдалъытэу, зизэкъо орэдыIохэм анэмыкIэу творческэ зэхэт купхэми зыкъагъэлъэ­гъощт. ОрэдкъэIонымкIэ, теат­ральнэ искусствэмкIэ, къэ­шъонымкIэ, хэушъхьафыкIыгъэ жан­рэмкIэ ныбжьыкIэхэр зэ­нэкъокъущтых, жюрим анахь дэгъоу зыкъэзыгъэлъагъохэрэр къыхихыщтых.
Адыгэ къэралыгъо универ­ситетым, Мыекъопэ къэралыгъо гуманитар-техническэ колле­джым, АКъУ-м икъутамэу Шы­тхьалэ дэтым, Мыекъопэ къэралыгъо технологическэ университетым иполитехническэ колледж, Адыгэ кIэлэегъэджэ колледжэу Андырхъое Хъусен ыцIэ зыхьырэм, искусствэмкIэ Адыгэ республикэ колледжэу Тхьабысымэ Умар ыцIэ зыхьырэр, Мыекъопэ медицинэ колледжыр ыкIи Мыекъопэ политехническэ техникумэу станицэу Ханскэм дэтым ястудентхэр зэнэкъокъум хэлажьэх.

Творческэ ыкIи сэнаущыгъэ зыхэлъ ныбжьыкIэхэм хэхъо­ныгъэ ашIынымкIэ IэпыIэгъу афэ­хъугъэныр ары Iофтхьабзэм ипшъэрылъ шъхьаIэр. «Студентхэм ягъатхэ» сэнаущыгъэ ин зыхэлъ цIыфхэу, тиреспублики, нэмыкI шъолъырхэми ащызэ­лъашIэхэрэм ятворческэ гъогу зыщырагъэжьэгъэ площадкэу щыт. Ахэм ащыщых универ­си­тетыр къэзыухыгъэхэу, Адыге­им изаслуженнэ артистхэу ЛIы­бзыу Аслъан, Нэчэс Анжеликэ, Еутых Вячеслав, Самира Зопунян, нэмыкIхэри.
Мы фестивалым ныбжьыкIэ проектыкIэхэр къыщежьэх. Ахэм зэу ащыщ Адыгэ къэралыгъо университетым имузыкальнэ театрэу «Арт-Ритон» зыфиIорэр.
Шъолъыр едзыгъом текIоныгъэ къыщыдэзыхыгъэхэм дип­ломхэр ыкIи шIухьафтынхэр аратыщтых, ащ дакIоу Урысые фестивалэу «Урысые студенческэ гъатх» зыфиIорэм Адыгеир къыщагъэлъэгъон амал яIэщт. А Iофтхьабзэр къалэу Саратов щыкIощт.
Мэлылъфэгъум и 16-м сыхьатыр 4-м Адыгэ къэралыгъо университетым иконцертнэ зал мэфэкI шIыкIэм тетэу фестивалыр щызэфашIыжьыщт, гала-концерт къыщатыщт.
ДЕЛЭКЪО Анет.
Сурэтхэр: АКъУ-м ипресс-­къулыкъу.