Гъатхэм дахэу зыкъештэ

Уахътэр нэдэплъыпIэ уримыгъафэу мачъэ. Гъэт­хапэр зэдиштэ-зэтетэу кIуагъэ, джы мэлылъфэгъур къихьагъ.

Дунаир нэр пIэпихэу дахэ: тыгъэр нэгушIу, жьыр къабзэ, къэкIырэ лъэпкъхэр — мэз ыкIи шъоф къэгъагъэхэр, щагухэм адэтхэр ыкIи пкIышъхьэ-мышъхьэ чъыг лъэпкъ зэфэшъхьафхэр пасэми, мы аужырэ мэфипшIым, етIупщыгъэу мэкъэгъагъэх. Бзыу­хэм яорэд жъынч макъэ зэфэдэкIэ чIышъхьашъом щэIу, гъэтхэ мафэ пэпчъ аузэ, дунаир зэрэщытэу дэкIэжьы.
Ти Адыгей зэхэпшIапэу гъат­хэм дэIорышIэ: чIыгур къэплъы, мафэхэр кIыхьэ хъугъэх, сыдрэ IофшIэни цIыфыIэр якIоу, егугъухэу гъэтхэ мафэхэм зэшIуа­хых. КIэлэеджакIохэр гъэтхапэм ыкIэм загъэпсэфыгъэу еджэным фежьэжьыгъэх, мэзитIум нахь загъэчанмэ оценкэ дэгъухэр яIэхэу къыкIэлъыкIорэ классым ихьащтых.
Iоф цIыкIу хъурэп, анахьэу Iофыбэр зызэIукIэу ыкIи зы­щызэшIуахырэр гъэтхапэр ары. Пхъэни, къэгъэкIыни, ахэм ящэн-IугъэкIыни, унэгъо Iофыгъохэри цIыфхэм къапыщылъых, джащ пае ини-цIыкIуи алъэкIырэр зэфэдэу зэрашIэщтым дэгуIэх. Сыхьатыпэ ыкIи мафэ пэпчъ пшIоIофэу зыбгъэулэумэ, укIэгушIужьэу бэ къыбдэхъущтыр. ЕтIани хэткIи анахь Iэзэ­гъу хъурэр тичIыопс ихьалэмэт-­шъырытыгъ. Дунэе нэф тынчыр зымыуасэ щыIэп, тыдэкIи тидунай мамырныгъэ-зэфагъэр, зэ­гурыIоныгъэр щыбэгъонэу, Iэягъэм тыIумыкIэнэу, тимурад ехьыжьагъэхэр хэткIи дахэу зэшIохыгъэ хъунхэу тэлъаIо.
Н. Дзэукъожь.