Адыгеир пэрытхэм ащыщ
УрысыемкIэ псауныгъэм ипсыхьан зыщыдэлэжьэхэрэ шъолъыритф пэрытхэм Адыгеир ахэт.
Республикэм щыпсэухэрэм япроцент 56,8-р физкультурэмрэ спортымрэ апылъых. А пчъагъэхэр АР-м иминистрэхэм я Кабинет 2023-рэ илъэсымкIэ Iофэу ышIагъэм изэфэхьысыжьхэм шъхьаихыгъэ къащишIыгъ.
Спортымрэ физкультурэмрэ уапылъыныр аужырэ уахътэм ишапхъ. ЦIыфхэр ащ фэщагъэ зэрэхъугъэхэми къэралыгъом иIахьышIу хэлъ. Мы лъэныкъом хахъо ышIыным программэ пчъагъэ фэлажьэ. Адыгеир пштэмэ, блэкIыгъэ илъэсым физкультурэмрэ спортымрэ язегъэушъомбгъун сомэ миллион 920-рэ пэIухьагъ. ГъэрекIо закъо Мыекъопэ районым ит псэупIэу Майскэм физкультурэмкIэ псэолъакIэ щагъэуцугъ, ГТО-м зызщыфэбгъэхьазырын плъэкIыщт чIыпIакIэ Ханскэм щагъэпсыгъ. Ащ дакIоу Мыекъуапэ испорт еджэпIихымэ яIофшIэнкIэ ящыкIэгъэ Iэмэ-псымэхэр афащэфыгъэх. Непэ спорт чIыпIэу Адыгеим итым ибагъэкIэ Урысыем игурыт къэгъэлъэгъонхэм ашъхьадэкIы — процент 62,1-рэ.
«Непэ тызнэсыгъэ лъэгапIэхэр къемыIыхынхэм ыкIи спортым пыщагъэ хъунхэмкIэ ягузэкIаблэ мыкIосэным афэшI а зы уахътэм лъэныкъо зэфэшъхьафхэмкIэ Iоф тэшIэ: инфраструктурэр тэгъэкIэжьы, ящыкIэгъэ Iэмэ-псымэхэр, псэуалъэхэр ятэгъэгъоты, спортсменхэми, ахэр зыгъасэхэрэми Iэпыгъу тафэхъу. АщкIэ лъэпкъ проектэу «Демографием» ишIогъэшхо къытэкIы. ТапэкIи а IофшIэныр лъыдгъэкIотэщт. Пшъэрылъ шъхьаIэу тиIэхэм ар ащыщ», — къыщеIо Адыгэ Республикэм и ЛIышъхьэ ителеграм-нэкIубгъо.
Мыщ фэдэ амалышIухэм яхьатыркIэ республикэ, шъолъыр ыкIи къэралыгъо мэхьанэ зиIэ зэнэкъокъухэр нахьыбэу Адыгеим щызэхащэх. Тиспортсменхэм нахь дэгъоу загъэхьазырынымкIи а пстэумэ яшIогъэшхо къэкIо. 2023-рэ илъэсым лъэныкъо зэфэшъхьафхэмкIэ Адыгеим испортсменхэм бгъэхэлъхьэ хъущэ къалэжьыгъ: Европэм ыкIи дунаим ячемпионатхэм дышъэу 4-рэ джэрзэу 2-рэ къащахьыгъ; Урысыем изэнэкъокъу зэфэшъхьафхэм дышъэ бгъэхалъхьэу 33-рэ, тыжьынэу 31-рэ, джэрзэу 56-рэ къащалэжьыгъ. КъэгъэлъэгъонышIухэр зиIэхэм ащыщ дзюдомкIэ Олимпийскэ резервым испорт еджапIэу Кобл Якъубэ ыцIэ зыхьырэр. Ныбжь зэфэшъхьафхэр зиIэ ныбжьыкIэ 523-мэ мыщ зыщагъасэ. Мы пчъагъэм щыщэу нэбгырэ 20-р спортымкIэ мастерыцIэм фэбанэх, 12-м ар къагъэшъыпкъэжьыгъ.
«523-р кIэух пчъагъэп. Мафэ къэс ныбжьыкIэхэр тштэнхэу фаехэу къытфэкIох. Арыба спортымкIэ мыщ фэдэ псэолъэшхохэр зыкIашIыхэрэр: кIэлэцIыкIухэм алъэгъунэу, къехъопсэнхэу, къэкIонхэу ары. Непэ спортым, физкультурэм уапылъыщтмэ, амалышIухэр щыIэх. ТиеджапIэ зэрэкIэм имызакъоу, кимонохэри ятэтых. ЗэкIэри сIорэп, ау якъэгъэлъэгъонхэм ялъытыгъэу илъэсым зэ ахэр тэгъэкIэжьых. Ахэр республикэ, федеральнэ гупчэм къатIупщырэ мылъкумкIэ тэщэфых, — къыддэгощагъ дзюдомкIэ Олимпийскэ резервым испорт еджапIэу Кобл Якъубэ ыцIэ зыхьырэм ипащэу Ордэн Адам.
Непэ спорт лъэпкъ зэфэшъхьафхэмкIэ Урысыем ихэшыпыкIыгъэ купхэм республикэм испортсмен 61-рэ ахэт. Спортымрэ физкультурэмрэ шъолъырым зыщягъэушъомбгъугъэнымкIэ Адыгеим зэшIуихырэ Iофхэм ари язэфэхьысыжьышIу.
Анцокъо Ирин.
Сурэтыр авторым ий.