Театрэм и Дунэе мафэ фэгъэхьыгъэ къэгъэлъэгъонэу «О семье и в шутку, и всерьез» зыфиIорэр Пушкиным ыцIэ зыхьырэ Унэм тыгъуасэ щыкIуагъ.

ЧIыпIэ нэкI имыIэжьэу цIыфхэр ащ къыщызэрэугъоигъэх. Адыгеим иана­хьыжъ театрэхэм къащыублагъэу еджапIэхэм ащызэхэщагъэхэм анэсыжьэу а зы сценэм актер «зэмышъогъухэр» къызэдытехьагъэх. ЯмышIыкIэ къэгъэлъэгъоныр фойем щаублагъ.
Пчыхьэзэхахьэм изэхэщакIоу, АР-м итеатральнэ объединение (Лъэпкъ театрэр, Урыс драматическэ театрэр), АР-м и Камернэ музыкальнэ театрэ, Тэхъутэ­мыкъое районым идраматическэ ныбжьыкIэ театрэу Ахэджэго Мэджыдэ ыцIэ зыхьырэр, АР-м искусствэхэмкIэ иколледж, Джэджэ районым игурыт еджапIэу N 7-м ыкIи Адыгэкъалэ игурыт еджапIэу N 4-м ащызэхэщэгъэ кIэлэеджэкIо театрэхэр къэгъэлъэгъоным хэлэжьагъэх.
ЦIыфхэм сыд къащышIыгъэми, зэкъо­тынхэ, IэпыIэгъу зэфэхъунхэ зэрэфаем, хымэ лыуз зэрэмыхъурэм афэгъэхьыгъэ усэм актерхэр фойем къыщеджэхэу аублагъ, рок-оперэу «Юнона и Авось» къыхэхыгъэ пычыгъор къаIозэ къэгъэлъэгъоным къекIолIагъэхэм ахэтхэу залым адычIэхьагъэх. Сценэр къагъэ­ушIункIи дэбыбэерэ къэрэухэм яныбжьыкъу фыжьхэр къытырагъэхьагъэх. Залым чIэсыгъэхэр къэтэджыгъэх, къалэу Кра­сногорскэ къыщыхъугъэ тхьамкIа­гъоу театрэм и Дунэе мафэ ихэгъэунэфыкIын зыфызэкIахьагъэм хэкIодагъэхэм зы такъикърэ афэшъыгъуагъэх.
АР-м и Камернэ музыкальнэ театрэ къышIыгъэ едзыгъомкIэ къэгъэлъэгъоныр къызэIуахыгъ. Сценэм къытехьэрэ артистхэм пэрытныгъэр якIасэу зэрэзэ­нэкъокъухэрэр сэмэркъэу хэлъэу ахэм къагъэлъэгъуагъ.
АР-м культурэмкIэ иминистрэу Аулъэ Юрэ театральнэ искусствэм зищыIэныгъэ фэзыгъэшъошэгъэ актерхэм ясэнэ­хьат гухахъо хагъуатэу, цIыфхэм зэрящыкIагъэхэр зэхашIэу, гъэхъэгъабэхэм джыри къафэкIонхэу афиIуагъ.
УФ-м инароднэ артистэу, Урысыем итеатральнэ IофышIэхэм я Союз икъутамэу Адыгеим щызэхэщагъэм ипащэу Зыхьэ Заурбый СТД-м кIэу къыхэхьэгъэ нэбгырэ 15-м тхылъхэр аритыжьыгъэх. Джащ фэдэу Урысыем культурэмкIэ иIофышIэхэм япрофессиональнэ Союз икъутамэу АР-м щыIэм ипащэу Людмила Пузанковам культурэм иIофышIэхэу профсоюзым хэтхэм гъэхъагъэу ашIыгъэхэм апае щытхъу тхылъхэр зэритыжьыгъэхэм АР-м итеатральнэ зэхахьэ ипащэу Ацумыжъ Рустам ахэтыгъ.
Къыхэгъэщыгъэн фае театрэ зэфэшъ­хьафхэм якъэгъэлъэгъонхэр аублэным ыпэкIэ къашIыгъэ инсценировкэм мэхьэ­нэ куу зэрэхалъхьагъэр. ТеатралхэмкIэ тын лъапIэу «Золотая маска» зыфиIорэр тырахи ащ ычIыпIэ пчэгу гъэIагъэм адыгэ къуаер къытырагъэуцуагъ. Ащ еIагъэм икъыхэгъэщын Урыс драматическэ театрэм икъэгъэлъэгъон купкIэу фашIыгъэр. ЗэкIэ къызфэкIожьырэр къэгъэлъэгъоным анахьыжъэу хэт актри­сэу пстэуми алъыплъэрэм, IэпыIэгъу афэхъурэм тын лъапIэр фагъэшъуашэ, сыда пIомэ театрэр зы бын унагъом фэд.
Лъэпкъ театрэм икъэгъэлъэгъон Москва щыпсэурэ усакIоу Мальвина Матрасовам иусэу «Мам, поиграем?» зыфиIорэр гъэшIэгъонэу щигъэуцугъ. Уайкъокъо Асиетрэ Тамрико Осадзэрэ нымрэ пхъумрэ ярольхэр къашIыгъ. Сабыйхэм яцIыкIугъом къыщыублагъэу фэбагъэр, шIулъэгъур зэряпхьылIэн фаем, якIэлэцIыкIугъом ахэм къащыкIэрэр аныбжь зикъукIэ ны-тыхэмкIэ къазэрэфызэкIэкIожьырэр гупшысэ ин хэлъэу къагъэлъэгъуагъ.
ЕджэпIэ театрэхэм, анахьэу Адыгэкъа­лэ игурыт еджапIэу N 4-м щызэхэщагъэм, иактер цIыкIухэм якъэгъэлъэгъон непэрэ уахътэм игумэкI шъхьаIэр къыщыхагъэщын алъэкIыгъ. Телефонхэм, социальнэ хъытыухэм ахэс кIэлэцIыкIу­хэм унагъом зэращыфыримыкъухэрэр, ныжъ-тыжъхэми ахэм янэшанэхэр къа­хэфэ зэрэхъурэр сэмэркъэу хэлъэу къа­гъэлъэгъуагъ. Адыгэ къашъор телефон хэсыным зэрэфырикъурэр нафэ къа­шIыгъ.
Зыкъэзыгъэлъэгъогъэ театрэ пстэуми сэнаущыгъэ хьалэмэт, ямышIыкIэ шапхъэхэр ахэлъэу зыкъашIышъугъ. Ныбжьым ыкIи профессиональнэ гъэсэныгъэм ямылъытыгъэу ахэм уяплъынкIэ, зэбгъэпшэнхэкIэ гъэшIэгъоныгъэ. Театрэм илъэс пчъагъэрэ щылэжьагъэхэри, къычIэхьэгъакIэхэри, актер сэнэхьатым джы зыфэзыгъасэхэрэри зы бын унагъоу сценэм зэдытетыгъэх. Лъэпкъ теат­рэм иактер нахьыжъхэу Зыхьэ За­урбый, ХьэтхьакIумэ Аскэрбый, Зыхьэ Мэлайчэт, Уджыхъу Мариет, Кушъу Светлан, Кукэнэ Мурат пчыхьэзэхахьэм икIэух дахэу къызэфашIыжьыгъ. Адыгэ гущыIэжъым къызэриIоу, «жъы уимыIэу кIэ уиIэщтэп». Артист нахьыжъхэр Лъэпкъ театрэм ылъачIэу, ипкъэоу зэрэ­щытхэр Ацумыжъ Рустам гущыIэу ахэм афигъэзагъэхэмкIэ къыгъэшъыпкъэ­жьыгъ.
Гуфэбэныгъэ хэлъэу пчыхьэзэхахьэр кIуагъэ, мэфэкIыр дахэу хагъэунэфыкIыгъ.
Тэу Замир.