Бжыхьэ дзэ дэщыгъор Мыекъуапэ зэрэщыкIуагъэр ыкIи гъэтхэ дзэ дэщыгъоу мэлылъфэгъум и 1-м рагъэжьагъэм изэхэщэн зыщы­тегу­щыIэгъэхэ зэхэсыгъо къэлэ администрацием щыкIуагъ.

Ащ хэлэжьагъэх къалэм имэрэу Геннадий Митрофановыр, ащ игуадзэу, Мыекъуапэ иветеранхэм я Совет итхьаматэу Юрий Томчак, народнэ депутатхэм якъэлэ Совет ипащэу Джармэкъо Азмэт, Мыекъуапэ идзэ комиссарэу Алексей Санташовыр, дзэ частьхэм, ТОС-хэм, общественнэ ыкIи гъэсэны­гъэ организациехэм ялIыкIохэр.
2023-рэ бжыхьэ дзэ дэщы­гъор зэрэкIуагъэм А. Санташовыр къытегущыIэзэ, республикэ дзэ комиссариатым къафигъэнэ­фэгъэ пшъэрылъыр проценти 100-м нэсэу зэрагъэцэкIагъэр хигъэунэфыкIыгъ.
— УIэшыгъэ КIуачIэхэм ядзэ зэфэшъхьафхэм къулыкур ащызыхьыщт нэбгырэ 90-рэ фэдиз ащагъ. Дзэ дэщыгъом аныбжьыкIэ къулыкъу ахьынэу зытефэрэ нэбгырэ 800-м ехъу чIыпIэ ко­миссариатым къекIолIагъ. Къы­хэзгъэщымэ сшIоигъу мы пчъагъэм ыпэкIэ къулыкъум зыщызыдзыещтыгъэ нэбгы­рабэ зэрэхэтыр, — къыIуагъ Алек­сей Санташовым.
Къулыкъур пIэлъэ гъэнэфагъэ­кIэ зыфызэкIахьагъэхэм япчъа­гъэ мы илъэсым хэпшIыкIэу хэхъуагъ. Ащ лъапсэ фэхъугъэр аныбжьыкIэ къулыкъур зыхьынэу къызтефэхэрэм ащыщыбэм апшъэрэ гъэсэныгъэ зызэрагъэ­гъотырэ нэуж магистратурэм, аспирантурэм зэрачIэхьажьыгъэхэр ары. Джащ фэдэу къэлэ дзэ комиссарым къызэриIуа­гъэмкIэ, бжыхьэ дзэ дэщыгъор окIофэ ежь яшIоигъоныгъэкIэ еджэныр зэпагъэуи къулыкъум кIогъэ студентхэр къыхэкIыгъэх.
— Шъугу къэзгъэкIыжьымэ сшIоигъу ыныбжьыкIэ дзэ къулы­къур зыхьынэу къызтефэхэрэм ядэщын хэушъхьафыкIыгъэ дзэ операцием зыкIи зэремыпхыгъэр ыкIи ахэр ащ зэрамыщэщтхэр. ЯпIалъэ къызэраухыгъэм тетэу игъом ядэжь къагъэкIо­жьыщтых. Ау ахэм шIоигъоныгъэ яIэмэ, зэзэгъыныгъэкIэ къулыкъу ахьын фитых, — хигъэу­нэфыкIыгъ къэлэ дзэ комис­сарым.
Джащ фэдэу Мыекъуапэ идзэ комиссар анаIэ зытыраригъэ­дзагъэхэм ащыщ 2024-рэ илъэ­сым къыщегъэжьагъэу хъулъ­фы­гъэхэу илъэс 18-м къыщегъэ­жьагъэу илъэс 30-м нэс зы­ныбжь­хэр дзэ къулыкъум зэращэщтхэр. Физическэ лицэхэм ыкIи IофшIапIэхэм аIутхэу дзэ къулыкъур ыхьынэу зытефэхэ­рэм игъом макъэ язымыгъэIухэ­рэм тазырэу атыралъхьэрэм хагъэхъуагъ.
— Сицыхьэ телъ мы Iофым фэгъэзэгъэ структурэ пстэуми ткIуачIэ зэхэлъэу Iоф зыдатшIэкIэ, гъэтхэ дзэ дэщыгъори зэрифэшъуашэу зэрэзэхэтщэщтым, — къыIуагъ военкомым.
Зэхэсыгъом икIэухым къалэм имэрэу Геннадий Митрофановым къызэрэхигъэщыгъэмкIэ, зэзэгъыныгъэкIэ дзэ къулыкъур хьыгъэным ишIуагъэхэр нахьыбэрэ цIыфхэм къафаIотэн фае. Зэзэгъыныгъэм кIатхэхэрэм ыкIи ахэм яунагъохэм арысхэм УФ-м и Правительствэ, шъо­лъыр хабзэм икъулыкъухэм IэпыIэгъу зэфэшъхьафхэр арагъэгъотых.
— Социальнэ фэгъэкIонхэм ямызакъоу, ахъщэ тын гъэнэфагъэхэри дзэкъулыкъушIэхэм аратых. Непэ УФ-м и УIэшыгъэ КIуачIэхэм зэзэгъыныгъэ адыкIатхэрэм зэтыгъо ахъщэ тынэу сомэ мин 850-рэ фэдиз ратыщт. Мыщ хэхьэ дзэ шъуашэхэр къы­зэращэфын алъэкIыщт сомэ
мин 50-р, — хигъэунэфыкIыгъ Геннадий Митрофановым.
ЗэзэгъыныгъэкIэ къулыкъур зыхьы зышIоигъохэм дзэ комис­сариатхэм зафагъэзэн
алъэ­кIыщт, ахэм зэхэубытэгъэ къэбарыр ащагъотыщт. Къэлэ дзэ комиссариатым иадрес: къ. Мыекъуапэ, ур. Комсомольскэр, 217, телефоныр: 8(8772) 52-11-27.
Александра Балабась.